Ottmar Hitzfeld

Ottmar Hitzfeld (* 12. Januar 1949 in Lörrach) is en düütsch Footballtrainer un ehmalger Footballspeler. Van 2008 bit 2014 weer he Trainer vun de Swiezer Natschonalmannschap. Dornah hett he sien Loopbahn afslooten.

In sien Jöögd hett he bi TuS Stetten un later henn bi de Amateure vun FV Lörrach speelt. Af 1970 hett he bi de Swiezer Natschoonalligist FC Basel speelt, mit de he 1972 un 1973 Swiezer Meester wurr. 1973 wurr he ok noch Dorschützenkönig in de Swiez. Bi de Olympisch Sommerspelen 1972 in München hett he ok in de Düütsche Olympiautwahl speelt. Dor hett he fiev Mal van Anfang an speelt un in diesse Spelen immer mindst een Door schaaten. All tosommen hett he 8 Mal in de Amateurmannschap spelt.^[1]

1975 is Hitzfeld to VfB Stuttgart wesselt, de jüst ut de eerste Bundsliga afstegen weern. In twee Johren in de tweete Bundsliga hett Hitzfeld 55 Ligaspelen makt un 33 Doren schaaten. Mit Stuttgart is he denn aber ok weer upstegen un hett denn ok noch in de Johren 1977/78 in 22 Spelen 5 Doren schaaten. Dornah is he weer in de Swiez wesselt un hett denn eerst bi FC Lugano un denn bi FC Luzern speelt. 1983 hett he denn sien Spelerkarriere beend.

Nah sien Spelerloopbahn wurr he Trainer in Zug, bi FC Aarau un bi Grasshopper Zürich, wo he 1990 un 1991 mit sien Mannschap Swiezer Meester wurr. 1991 wurr he Trainer vun Borussia Dortmund, de he vun Horst Köppel övernemmen de un de ut de Tabellenkeller to de Viezméesterschap föhrt hett. In de Folgesaison keem he mit sien BVB in de UEFA-Cup Finale, dat se tegen Juventus Turin woll verloren hebbt, aber völ Geld kasseert hebbt. Dormit kunnen se sück denn good und düür Spelers koopen. Dormit wurrn se Düütsch Meester in de Johren 1995 un 1996 un hebbt Juventus Turin 1997 in'n Endspeel vun de Champions League slahn. Dornah is Hitzfeld as Trainer torüchtreden un is Sportdirekter in Dortmund wurrn.

Van 1. Juli 1998 an wurr he den Trainer bi FC Bayern München, de he to en Hoopen Titel verhulpen hett (Meester 1999, 2000, 2001, 2003; Pokalsieger 2000, 2003; Champions-League Winner 2001; Weltpokalwinner 2001). Ottmar Hitzfeld is nah Ernst Happel (Feyenoord Rotterdam (1970), Hamburger SV (1983)) eerst de tweete Trainer, de dat gelungen is mit twee verscheeden Vereenen de Champions League bzw. de Europapokal vun de Landsmeester to winnen.

Ok wenn dat bi Bayern München good leep, hebbt se hüm an 18. Mai 2004 verklart, dat sien Verdrag to'n 30. Juni 2004 uplööst wurrd. Blots wiels se in dat Johr nett kien Titel kregen harrn, hemms hüm rutschmeeten. Dat keem in de Press gar nich good an. Felix Magath wurr denn sien Nahfolger.

Bundstrainer is he denn ok nich wurrn. 2004 vör de Europameesterschapp wull he woll, aber se hebbt hüm nich nommen. Nah de EM wull he nich mehr. Dornah hett he denn en Tiet lang bi'd Ferrnsehn as Kommentator arbeit.

An 1. Februar 2007 hett he Felix Magath as Trainer bi Bayern München weer bearvt. He hett ankündigt, sien Verdrag in' Sömmer 2008 utloopen to laaten. Sien Nahfolger wurr denn Jürgen Klinsmann. He sülvst hett en Verdrag as Trainer vun de Swiezer Natschonalmannschap ünnerschreben, de af 1.7.2008 gellen deiht.

1. ↑ Kicker-Almanach 1995. Copress Verlag Gmbh, München 1994, S. 142, ISBN 3-7679-0447-0