Manuel Esquivel

Manuel Amadeo Esquivel (* 2. Mai 1940 in Belize-Stadt; † 10. Februar 2022 in Belize-Stadt^[1][2]) weer en Politiker ut Belize (UDP). He weer von 1984 bet 1989 un 1993 bet 1998 Premierminister von Belize.

Esquivel is 1940 in Belize-Stadt (to de Tied noch Deel von Brietsch-Honduras) boren un hett dat St. John’s College besöcht.

He hett an de Loyola University New Orleans in New Orleans (USA) Physik studeert un dat Studium mit en Bachelor of Science afslaten. An de Universität Bristol hett he denn noch wieder studeert. Na dat Studium is he na Belize-Stadt trügggahn un hett dor an dat St. John’s College Ünnerricht geven.

He weer bet to sien Dood verheiraadt mit siene Fro Kathy Esquivel. De beiden hebbt dree Kinner.

Esquivel is na 1969 Maat un denn ok Baas von de Liberal Party ween. De Liberal Party is 1973 mit annere Gruppen to de United Democratic Party (UDP) tohoopgahn. Von 1976 bet 1982 weer he Vörsitter von de UDP.

1974 un 1977 is he för de UDP in’n Stadtraad von Belize-Stadt wählt worrn. Bi de Wahl 1980 weer he ok wedder Kannedaat, kunn sik aver nich dörsetten.^[3]

Bi de Parlamentswahl in Belize 1979 weer he Kannedaat för de UDP in’n Wahlkreis Freetown un hett de Wahl mit 47,9 % von de Stimmen gegen Premierminister George Cadle Price von de PUP verloren. He is denn aver as Maat von de Oppositschoon in’n Senaat beropen worrn. Bi de Wahl von’n UDP-Parteibaas (nadem Theodore Aranda sien Amt as Parteibaas afgeven harr) in’n Januar 1983 hett he sik gegen Philip Goldson dörsett.

Bi de Wahl 1984 weer he Kannedaat in’n Wahlkreis Karibische Küst un hett sik mit 66,0 % von de Stimmen gegen Louis Humbhreys von de PUP dörsett. Ok bi de Wahl 1989 (54,8 % von de Stimmen gegen Humbhreys) un Wahl 1993 (50,8 % gegen Jose Coye, PUP) kunn he sik in’n sülven Wahlkreis wedder dörsetten. Bi de Wahl 1998 hett he aver blots 43,58 % haalt un hett gegen Coye verloren.

Dormit weer Esquivel von 1979 bet 1998 Afornten von dat Repräsentantenhuus von Belize. Nadem de UDP bi de Wahl 1984 de Mehrheit in dat Repräsentantenhuus wunnen hett, is Esquivel an’n 17. Dezember 1984 Premierminister von Belize worrn un hett tosätzlich de Ämter as Minister för Finanzen un Natschonale Sekerheit övernahmen (Kabinett Esquivel I).

Bi de Wahl 1989 hett de UDP de Mehrheit wedder verloren. Esquivel weer denn von’n 7. September 1989 bet 3. Juli 1993 Oppositschoonsföhrer.

Bi de Wahl 1993 hett de UDP de Mehrheit trüggwunnen un Esquivel weer von’n 3. Juli 1993 bet 28. August 1998 wedder Premierminister. Ok de Ministerien för Finanzen un Natschonale Sekerheit hett he in dat Kabinett Esquivel II wedder övernahmen. Dat Ministerium för Natschonale Sekerheit hett he in’n Januar 1995 denn aver an Dean Barrow afgeven.

Bi de Wahl 1998 hett de UDP nich blots de Mehrheit verloren, man ok Esquivel sien Seet in dat Repräsentantenhuus.

Nadem de UDP ünner Dean Barrow de Wahl 2008 wunnen harr un Barrow Premierminister worrn is, hett Barrow Esquivel to’n Senior-Berader mit Ministerrang maakt.^[4]

Esquivel hett 1986 en Ehrendokter von de Loyola University New Orleans kregen.

1986 is von Königin Elisabeth II. in dat Privy Council opnahmen worrn un to Neejohr 2010 is he Knight Commander of the Order of St Michael and St George worrn.

• Kathy Esquivel: Still Waters: Biography of Manuel Esquivel with Memoire of Kathy Esquivel. 2021, ISBN 979-8517016836

1. ↑ Sir Manuel Esquivel passes, Amandala an’n 12. Februar 2022
2. ↑ Former Prime Minister Sir Manuel Esquivel passes away, San Pedro Sun ann 11. Februar 2022
3. ↑ Myrtle Palacio: Belize City Council Election Results 1962 to 2003
4. ↑ Prime Minister Dean Barrow announces new Cabinet, San Pedro Sun an’n 14. Februar 2008

Premierministers von Belize

1981–1984: George Cadle Price | 1984–1989: Manuel Esquivel | 1989–1993: George Cadle Price | 1993–1998: Manuel Esquivel | 1998–2008: Said Musa | 2008–2020: Dean Barrow | 2020–: Johnny Briceño