Maibudde

Maibudden weert de Budden vun Mai- un Junikäver nömmt. Man de Naam kann ok bruukt weern for all Budden ut de Böverfamilie vun de Scarabäuskävers (Scarabaeoidea). Dor höört ok de Neeshoornkäver, de Gollen Rosenkäver un de Goornkäver mit to.

De Budden vun Mai- , Juni- un Goornkävers weert as Untüüch ankeken, man de Budden vun Rosen- un Neeshoornkävers hölpt den Minschen bi Goorn- un Ackerbo, sunnerlich bi’t Maken vun Kumpost. Vundeswegen staht se dör de Bundesartenschutzverordnung unner Schuul.^[1] Se dröövt nich fungen, ramponeert oder doodmaakt weern.

De Maibudden an sik (vun Mai- un Junikävers) sünd vörn so dick, as achtern. An’n Kopp sitt lange, dannige Been an, mit’n düütlichen „Knick“. Se könnt 5-7 cm lang weern. Dat duert veer bit hen to sess Weken, ehr se ut’n Ei utkruupt. Dat Lief is wat witt, de Kopp is bruun. Dat hangt vun de Aart af, man se leevt twuschen twee un veer Johre in’e Eer. Toeerst freet se Humus, achternah gaht se bi zorte Gras- un Kruudwuddeln bi, later gaht se ok an Boomwuddeln ran. Wenn dat dull kummt, kann dat angahn, dat grote Bökenböme dorvun kaputt gaht, datt de Maibudden an ehre Wuddeln freten doot. In’n Kumpost sünd se nich to finnen, vunwegen datt se lebennige Wuddeln to’n Freten bruukt. Wenn dat Weer in’n Sommer schöön is, geiht de Maibudde bi un verpoppt sik. Denn duert dat nochmol veer bit sess Weken un de Käver kann utkrupen. Over Winter blifft he avers in’e Höhlen unner de Eer. Dat hangt vun dat Weer af, man in’n April- oder Maimaand vun dat neegste Johr krabbelt he ut de Eer rut.^[2]. De Budden vun Goldkävers (Cetonia aurata) sünd achtern en beten dicker, as vörn un hefft bloß man lüttje Stummelbeen. Se leevt sunnerlich in’n Kumpost un weert faken ut Bangigkeit doodmaakt, wiel de Minschen meent, se weern Untüüch, wat ehre Planten tweimaakt. Man se freet Holt- un Plantenrottels un hölpt vundeswegen bi’n Kumpostmaken.^[2]. Den Neeshoornkäver (Oryctes nasicornis) siene Budden sünd unbannig groot. Se weert bi 7 cm groot, faken ok noch grötter.

• 
  Maibudden
• 
  En Bulkten Maibudden vun’n Rosenkäver ut’n Mestbulten
• 
  Maibudde vun vörn bekeken (Maikäver)
• 
  Budden vun Cotinis mutabilis.
• 
  Maibudden vun’n Neeshoornkäver

1. ↑ Schutzstatus und Taxon-Info Rosenkäfer. Bundesamt für Naturschutz, afropen an’n 2. März 2015. 
2. ↑ ^{a b} Maikäfer, Engerlinge und Verwandte, Abschnitt Engerlinge. Afropen an’n 2. März 2015.