Makoto Kobayashi

Makoto Kobayashi (japaansch: 小林 誠, Kobayashi Makoto; * 7. April 1944 in Nagoya) is en japaansch Physiker, de för sien Arbeiten up dat Rebeet vun de CP-Verletzung bekannt is. He kreeg 2008 den Nobelpries för Physik.

Makoto Kobayashi hett an de Universität Nagoya studeert un denn an de Universität Kyōto arbeit.^[1]

Sien beropen Artikel CP Violation in the Renormalizable Theory of Weak Interaction^[2], de he 1973 tosommen mit Toshihide Masukawa verdaat hett, is de an' dartmeesten titeert Artikel up SPIRES (Stand 2006^[3]). Dat Resultat vun disse Arbeit is de CKM-Matrix, de de Mischungsparameter vun de Quarks bestimmt.

De CKM-Ansatz postuleert de Existenz vun en dart Generatschoon vun Quarks, de veer Johr later mit den Nahwies vun den Bottom-Quark bestätigt wurr. Buterdem wurrd doröver de all fröher opdeckt CP-Verletzung in dat Standardmodell inbaut.

1985 wurr he mit den Sakurai-Pries uttekent un 2007 mit den High Energy and Particle Physics Prize vun de EPS. To Tiet (2007) is he an den Deelkenbeschleuniger vun dat KEK in Tsukuba tätig, de sien tietwielig Baas he ok weer. He is dor „Diamond Fellow“ an dat Institute for Nuclear and Particle Studies (INPS). 2001 wurr he to en Person mit besünner kulturell Verdeensten nömmt.^[1]

2008 kreeg he gemeensam mit Toshihide Masukawa un Yōichirō Nambu den Nobelpries för Physik.

Kobayashi is mit Emiko Kobayashi verheiraadt un hett twee Kinner, Yuka un Junichiro Kobayashi.

1. ↑ ^{a b} http://kotobank.jp/word/小林誠, japaansch:小林誠 , japaansch: |デジタル版 日本人名大辞典+Plus bi kotobank.jp, afropen an' 18. Juli 2012
2. ↑ M. Kobayashi un T. Masukawa: CP Violation in the Renormalizable Theory of Weak Interaction in Progress of Theoretical Physics 49 (1973), 652-657 doi:10.1143/PTP.49.652
3. ↑ Top Cited Articles of All Time (2006 edition)

• Who's Who in Japan, 1991-92, ISBN 4-900618-01-2

Makoto Kobayashi. Mehr Biller, Videos oder Audiodateien to’t Thema gifft dat bi Wikimedia Commons.

• Makoto Kobayashi up de Sieden vun den Nobelpries (engelsch)