Ohnsorg-Theater

Dat Ohnsorg-Theater is en plattdüütsch Theater in Hamborg-St. Georg.

Dat Theater hett Richard Ohnsorg an’n 12. Oktober 1902 grünnt. De Naam weer toeerst Dramatische Gesellschaft Hamburg. Dat weer ok keen richtig Theater, dat weer mehr so’n Klub vun Theaterfrünn, de de Stücken blots reziteren un nich spelen. Ok Plattdüütsch weer nich vörsehn. Vun 1906 an heet dat denn Gesellschaft für dramatische Kunst. Richard Ohnsorg övernehm 1910 denn Vörsitt un nu eerst füng dat mit plattdüütsche Stücken an. Den 24. Januar 1914 harrn se den eersten rein plattdüütschen Theateravend. 1920 hett dat Theater dat denn ok mit en ne’en Naam wiest: Niederdeutsche Bühne Hamburg e. V.. 1922 kreeg dat Theater dat eerste Maal en faste Adress, se spelen nu in’t Stadttheater vun Wandsbek, wat do noch buten de Stadt Hamborg leeg. 1936 eerst kreeg dat Theater sien egen Huus in de Groten Bleken, wo se noch bit 2011 speel. 1944 mutt de Speelbedrief wegen den Tweten Weltkrieg instellt warrn. Eerst 1946 warrt wedder Stücken opföhrt un dat Theater harr ok den ne’en Naam Richard-Ohnsorg-Theater. Hüüt is dat Ohnsorg-Theater as GmbH indragen, de Egendömer is de Stadt Hamborg.

Dat Theater kriggt in’t Johr so üm un bi 1,6 Millionen Euro an Geller vun de Stadt toschaten.

An den 13. März 1954 geev dat dat eerste Stück vun’t Ohnsorg-Thater in’t Feernsehn to sehn. De Stücken in’t Feernsehn warrt aver nich op plattdüütsch utstrahlt, dat de Hoochdüütschen dat beter verstaht, warrt dor Missingsch bruukt.

An’ 8. Juli 2011 weer nah 75 Johren Sluss mit de Upführen an de vörige Speelstäe. Dat Theater is den umtrucken. An’ 28. August 2011 fung de nee Saison an den Heidi-Kabel-Platz 1 mit en plattdüütsch Faaten vun William Shakespeare sien „A Midsummer Night’s Dream“. Regie führ de Ex-Intendant vun dat benaverte Schauspeelhuus Michael Bogdanov. De nee Speelstäe in dat 1909 baut un hüüd ünner Denkmalschuul stahn Bieberhuus in den Hamborger Stadtdeel St. Georg is moderner un grötter. Dat hett de modernste Technik un tosätzlich en Studiobühne. De Kapazität is um etwa 50 Plätz grötter wurrn.