Salamo faha-89

Ny Salamo faha-89 dia salamo ao amin' ny Bokin' ny Salamo ao amin' ny Baiboly. Tafiditra ao amin' ny fizaràna atao hoe "boky fahatelo" (Sal. 73 - 89) ity salamo ity.

¹Fihirana nataon'i Etàna, Ezrahita.

²Te-hihira mandrakizay ny hatsaram-pon'ny Tompo aho: hanambara ny fahamarinanao amin'ny taranaka rehetra, ny vavako.

³Fa hoy aho: Ny hatsaram-po no tranobe soa mandrakizay; naorinao any an-danitra ny fahamarinanao.

⁴Efa nanao fanekena tamin'ilay nofidiko aho; fianianana efa nataoko tamin'i Davida mpanompoko,

⁵fa ta-hampiorina mafy mandrakizay ny taranakao aho, sy hanamafy ny seza fiandriananao, hatramin'ny taranaka rehetra. - Selà.

⁶Ry Iaveh, ny lanitra mankalaza ny fahagagana ataonao, mbamin'ny fahamarinanao eo amin'ny fiangonan'ny olona masina.

⁷Fa iza any an-danitra no hitaha amin'ny Tompo? Iza amin'ireo zanak'Andriamanitra no manahaka an'ny Tompo?

⁸Mahatahotra Andriamanitra eo amin'ny fiangonam-ben'ny olo-masina, mahatahotra ho an'ireo rehetra manotrona azy izy.

⁹Ry Iaveh, Andriamanitry ny tafika, iza no tahaka anao? Mahery hianao, Iaveh, ary manodidina anao ny fahamarinanao.

¹⁰Hianao no mamolaka ny fianjonanjon'ny ranomasina; hianao no mampitony azy raha misamboaravoara ny onjany.

¹¹Hianao no nanorotoro an-dRahaba toy ny faty; sy nampiely ny fahavalonao, tamin'ny herin-tsandrinao. ¹²Anao ny lanitra, anao koa ny tany; ny tany sy izay rehetra ao aminy, hianao no nanorina azy.

¹³Ny atsimo sy avaratra, hianao no nahary azy. Tabora sy Hermona indray mientana amin'ny anaranao.

¹⁴Ary fitaovana hiady ny sandrinao, dia ny heriny, mahery ny tànanao, avo ny tànanao ankavanana.

¹⁵Ny rariny sy ny hitsiny no iorenan'ny seza fiandriananao, ny famindram-po sy fahamarinana no eo anatrehan'ny tavanao.

¹⁶Sambatra ny vahoaka mahalala ny hobin-kafaliana, sy mandeha amin'ny fahazavan'ny tavanao, ry Iaveh!

¹⁷Mifaly mandrakariva amin'ny anaranao izy; ary misandratra amin'ny fahamarinanao.       ¹⁸Fa hianao no voninahiny amam-pahefany, ary ny fanambinanao manondrotra ny herinay.   ¹⁹Satria avy amin'ny Tompo ny ampinganay; ary avy amin'ilay Masin'Israely ny mpanjakanay.

²⁰Fahiny hianao niteny tamin'ny malalanao, tamin'ny fahitana nanao hoe: Izaho namonjy fanampiana ny mahery anankiray; nanandratra zatovolahy anankiray avy eo afovoan'ny vahoaka;

²¹nahita an'i Davida mpanompoko; nanosotra azy tamin'ny diloilo masina.

²²Homba azy lalandava ny tanako; ary hankahery azy ny sandriko.

²³Tsy hotampohin'ny fahavalo izy; ary tsy haharesy azy ny zanaky ny tsy fahamarinana.

²⁴Izaho hanorotoro ny mpanohitra azy eo anatrehany; sy hamely an'izay mankahala azy.

²⁵Homba azy ny fahamarinako aman-katsaram-poko; ary ny anarako no hitomboan'ny heriny.

²⁶Hahatrako amin'ny ranomasina ny tanany; ary amin'ny ony ny tanany ankavanana.

²⁷Izy hiantso ahy hoe: Hianao no raiko, sy Andriamanitro ary vatolampy famonjena ahy.      ²⁸Ary izaho kosa hanao azy ho lahimatoa, ambony indrindra amin'ny mpanjakan'ny tany.

²⁹Hitahiry ny hatsaram-poko aminy mandrakizay aho; ary ny fanekeko aminy tsy hivadihana.

³⁰Hampitoeriko haharitra mandrakizay ny taranany; ary ny seza fiandrianany haharitra toy ny andron'ny lanitra.

³¹Raha mahafoy ny lalàko ny taranany, ka tsy mandeha araka ny fitsipiko;

³²raha mandika ny teniko izy, ka tsy mitandrina ny didiko,

³³dia hosaziko amin'ny tsora-kazo ny fahadisoany, ary amin'ny kapoka ny helony;

³⁴fa tsy hesoriko aminy ny hatsaram-poko ary tsy hampandainga ny toky nomeko azy aho.

³⁵Tsy handika ny fanekeko aho, ary tsy hanova ny teny navoaky ny vavako.

³⁶Efa nianianako indray mandeha tamin'ny fahamasinako, ka tsy handainga amin'i Davida aho.

³⁷Haharitra mandrakizay ny taranany, ho tahaka ny masoandro eo anoloako ny seza fiandrianany;

³⁸tahaka ny volana izy dia tafaorina ho mandrakizay, ary mahatoky ny vavolombelona eny amin'ny lanitra. - Selà.

³⁹Kanjo narianao sy tsy nasianao raharaha, ary notezeranao ilay Voahosotrao!       ⁴⁰Nahatofoka anao ny fanekena tamin'ny mpanomponao, natsipinao amin'ny tany ny satro-boninahiny efa voatevateva.

⁴¹Nazeranao ny mandany rehetra, noravanao ny trano mimandany.

⁴²Izay mandalo mamabo azy avokoa, tonga fandatsan'ny mpiray monina aminy izy.

⁴³Fa nasandratrao kosa ny tànana ankavanan'ny mpampahory azy, nampifalianao ny fahavalony rehetra.

⁴⁴Nalefitrao hihodina ny lela-sabany, ary tsy nanohana azy tamin'ny ady hianao.

⁴⁵Nendahanao ny voninahiny, ary nazeranao amin'ny tany ny seza fiandrianany.

⁴⁶Nohafohezinao ny andron'ny fahatanorany, ary nosaforanao henatra izy. - Selà.

⁴⁷Mandra-pahoviana, ry Iaveh, no hierenao lalandava? sy hirehitra hoatry ny afo ny hatezeranao?

⁴⁸Tsarovy ny hafohezan'ny andro iainako, sy ny zavatra tsinontsinona naharinao ny zanak'olombelona!

⁴⁹Iza moa no velona tsy hahita fahafatesana, ary zovy no hahafaka ny fanahiny amin'ny herin'ny Seoly? - Selà.

⁵⁰Aiza ny hatsaram-ponao fahiny, Tompo ô, izay nianiananao tamin'i Davida, tamin'ny fahamarinanao?

⁵¹Tsarovy, Tompo, ity latsa manjo ny mpanomponao, fa mitondra ato amin'ny tratrako ny faniratsiran'ny firenena aho;

⁵²dia ny faniratsiran'ny fahavalonao, ry Iaveh, faniratsirana nanoherany ny dia nandrosoan'ny Voahosotrao.

⁵³Isaorana mandrakizay anie Iaveh!

Amena! Amena!

• Boky voalohany: Sal. 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28 - 29 - 30 - 31 - 32 - 33 - 34 - 35 - 36 - 37 - 38 - 39 - 40 - 41.

• Boky faharoa: Sal. 42 - 43 - 44 - 45 - 46 - 47 - 48 - 49 - 50 - 51 - 52 - 53 - 54 - 55 - 56 - 57 - 58 - 59 - 60 - 61 - 62 - 63 - 64 - 65 - 66 - 67 - 68 - 69 - 70 - 71 - 72.
• Boky fahatelo: Sal. 73 - 74 - 75 - 76 - 77 - 78 - 79 - 80 - 81 - 82 - 83 - 84 - 85 - 86 - 87 - 89.
• Boky fahefatra: Sal. 90 - 91 - 92 - 93 - 94 - 95 - 96 - 97 - 98 - 99 - 100 - 101 - 102 - 103 - 104 - 105 - 106.
• Boky fahadimy: Sal. 107 108 - 109 - 110 - 111 - 112 - 113 - 114 - 115 - 116 - 117 - 118 - 119 - 120 - 121 - 122 - 123 - 124 - 125 - 126 - 127 - 128 - 129 - 130 - 131 - 132 - 133 - 134 - 135 - 136 - 137 - 138 - 139 - 140 - 141 - 142 - 143 - 144 - 145 - 146 - 149 - 150.

• Salamo apôkrifa: Salamo faha-151 - Salamo faha-152 hatramin' ny faha-155.*

• Elohim