Edmund Hillary

Sir Edmund Percival Hillary (Auckland, 20 lûggio 1919 – Auckland, 11 zenâ 2008) o l'è stæto un alpinista e esploratô neozelandeise.

Edmund Hillary

Edmund Hillary, 29 mazzo 1953, depoî a-a ascenscion do Monte Everest (part.)

Dæti personâli

Nàscita: Auckland, 20 lûggio 1919
Mòrte: Auckland, 11 zenâ 2008
Pàize: Nœuva Zelanda

Âtre informaçioìn

Profesción: alpinista, esploratô

O l'é stæto un di ciu noti alpinisti e esploratoî do mondo. O deve a so famma a-a primma ascenscion do monte Everest avvegnua o 29 mazzo 1953 insemme a-o sherpa Tenzing Norgay.

Nasciuo a Tuakao a sud de Auckland in Nœuva Zelanda, Hillary o s'appascionò a-a lettua fin da figgiœu. O l'ea ben timido e o paiva ascì ciu graçile di so compagni de scœua. O trovava alloa rifuggio inti libbri, ch'o poeiva leze durante e quattr'ôe che gh'ócorivan pe andâ e tornâ da-a scœua. A sezz'anni, durante una gita scolastega a-o monte Ruapehu inte Arpe Neozelandeixi, o scrovì che o so fixico o l'ea ciu rescistente di so compagni de camminâ. Fu coscì ch'o començò o so interesse pe l'arpinismo.

Oltre a-e montagne da Nœuva Zelanda, Hillary o frequentò ascì i Arpe, e da pœu l'Himalaya, dove o scalò unze vette sovia i 6000 metri de quota. Durante a segonda guæra mondiâ o fu navegatô de l'aviaçion neozelandeize.

Into 1948, insemme a Ruth Adams, Harry Ayres e Mick Sullivan, o l'effettuò a primma ascenscion do Canto Sud do Mount Cook. Succescivamente o parteçipò a doe spediçioin de ricogniçion in Himalaya: uña inta zoña de l'Everest into 1951 e l'atra a-o Cho Oyu into 1952. Fu coscì notao da John Hunt, ch'o l'invitò a piggiâ parte a-a fortunâ spediçion britannega do 1953. A conquista da çimma (29 mazzo 1953) a fu annonçiâ contemporaniamente a l'incoronaçion da regiña Elisabetta II do England. Hillary, ormai famoso in tutto o mondo, o preize da pœu parte a nomiose spediçioin insce l'Himalaya tra o 1956 e o 1965.

O fu ascì in Antartide, e o razonse o Polo Sud o 4 zenâ 1958 co-a Commonwealth Trans-Antarctic Expedition, una spediçion motorizzâ (composta de trei trattoî Massey Ferguson TE20) conduta con Vivian Fuchs. O fu o terço ommo da stoia a razonze tâ punto via tæra doppo Amundsen e Scott into 1911-12.

O fu inscignio de nomiose ónoifixençe: o 16 luggio 1953 o fu nominao Cavaggeo Comandante de l'Orde de l'Impeo Britannego (KBE); into 1987 o vègne membro de l'Orde da Nœuva Zelanda (Onz); o 23 arvî 1995 fu nominao Cavalie de l'Ordiñe da Giarrettea (KG); into 2003, in ócaxon do çinquantenaio da conquista de l'Everest, o governo do Nepal o ghe confeì a çittadinança ónoaia durante un speciâ giubileo commemorativo tegnuose inta capitâ Kathmandu. Sir Edmund o l'é o primmo foresto a riçeive un scimile ónô da-i nepaleixi. O l'é stæto l'unico neozelandeize ancon in vitta a êse apparso in sce 'na banconotta.

Hillary o l'ha dedicao gran parte da so vitta a agiuttâ o poppolo nepaleize di sherpa tramite o Himalayan Trust da lê fondao, ariescendo a costruî de scœue e di uspiæ. O destin o vosse che durante questo periodo perissan a moggê Louise Mary Rose e a figgia Belinda, into 1975, in te un incidente aereo doppo o decollo da Katmandu. O l'ea ascì prescidente ónoaio de l'American Himalayan Foundation, un'associaçion non-profit ch'a çerca de megioâ l'equilibrio ecologico e e condiçioin de vitta di popoli himalayen. Hillary, che inta vitta de tutti i giorni o l'esercitava o mestê de apicoltô, o l'ha affermao de consciderâ i so succesci in campo umanitaio comme a so ciu gran conquista.

O moì a 9 oe circa (21 in Italia) de l'11 zenâ 2008 inte o Auckland City Hospital, pe insuffixença cardiaca, a l'etæ de 88 anni. O 29 frevâ 2008 con çeimonia privâ a ciu gran parte de so çennie son stæte disperse inta baia de Auckland, mentre e rimanente son stæte tumulæ in te un monasteio nepaleize.

Hillary o sposò Louise Mary Rose o 3 settembre 1953. Ebban trei figgi: Pete (1954), Sarah (1955) e Belinda (1959-1975). Hillary o sposò in segonde noççe June Mulgrew, viddoa do so megio amigo Peter Mulgrew, o 21 dexembre 1989.

• Wikimedia Commons a contêgne di files in sce Edmund Hillary