Noordzie
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Noordzie is 'n zie vaan de Atlantische Oceaan die tösse Groet-Brittannië en 't Europees vasteland ligk. De len aon de Ooskant vaan de zie zien Noorwege, Denemarke, Duitsland, Nederland, 't Belsj en 't allernoordelekste stök vaan Fraankriek. In de zie ligke wieneg eilande; boete Helgoland ligke alle eilande in kusgebeje en in ing archipelle, wie de Shetland-eilande, de Orkney-eilande en de Wadde-eilande. D'n Doggersbaank moot kortstoondeg, tösse de lèsten iestied en de wermen tied, 'n eiland zien gewees. De Ooszie löp in de Noordzie euver, zjus wie de es natuurgebeed tamelek unieke Waddezie. De reviere de Maos, de Rijn, de Schelde, de Elbe, de Weser, de Eems, de Theems en de Humber loupe drin oet.
De Noordzie is relatief werm, door invoer vaan werm water door de Golfstruim. Daodoor kinne de strande aon 't zuielek deil vaan de zie, die breid en zandeg zien, e bleujend toerisme. De werm zie gief de len roontelum e mèld klimaat, mèt rillatief zachte winters en keul zomers. De fauna in de zie is divers, al steit ze oonder groete drök vaan de milieuvervojling.
De Noordzie is de dröks bevare zie op de wereld, mèt Maos en Rijn es weeg vaan en nao 't achterland en de Atlantische Oceaan es transportgebeed vaan en nao Afrika en Noord- en Zuid-Amerika. De belangriekste havestei aon dees zie zien Zeebrugge, Antwerpe, Vlissinge, Rotterdam, Amsterdam, Den Helder, Delfzijl, Emden, Bremerhaven, Wilhemshaven, Hamburg, Esbjerg, Oslo, Bergen, Reykjavík, Edinburgh en Londe.
