Sacristie

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Sacristie, van Latiense sacristia dat kèrkbewaarder beteikent en van sacer dat heilig of gewiejd beteikent, ies in de Katholieke Kèrk 'n ruumde in 'n kèrkgeboew of 'n aangeboewd gedeilte, woa ’t liturgisch vaatwerk (bv kelk, ciborie, monstrans), kruus, keertseluuchtersj, wierouksvaat en beursjtel, kèrkbeuk of missale, lezenaere, örgelke (piano) en de paramente ( ’t liturgisch textiel, bv kazuivel, toga) bewaard were.

Preestersj, diakes, misdenersj en acoliete kleie ziech hie um veur en nao de ièredeens (Eucharistieviering of Heilige Mès), biech of boeteviering.

De, sóms fraai geborduurde of geapplikeerde mèskleier were, gehange, bewaard in 'n garderobekas of sacristiekas.
De sacristiecredens deent veur 't opsjloon van kleiner en platte mèsbenuèdighede: altaorkleier, taofelklèdsjes, taofelluipersj, kaorde etc.