Trigo

Trigo (Tritico) es un erba domada de Asia sude-ueste cual es cultivada tra la mundo. Trigo es un comeda importante per umanas: numero un es mais, du es trigo, e tre es orzo. La gran de trigo es usada per pan, tortas, tortetas, pasta, e cuscus, e per fermenta per bir, alcol, vodca, e biocombustables. Trigo es ance cultivada como un colieda per bestias, e la palia per bestas e per un materia de construi per tetos.

Trigo es un planta anial cual ateni un altia promedia de 1,2 metres. La folios apare temprana e es segueda par rametas magra cual fini con spinas de gran (nomida "spigas").

Spesies de trigo en un area spesifada es elejeda per sua ajustablia a altia, clima, e cuantia de colieda. La trigos cultivada en la republicas pasada de Uni Soviet, la SUA, e Canada es trigos de primavera e inverno, cual es cultivada o en primavera per colie en estate o en autono per colie en primavera.

Trigo durum ave spesial un gran dur. Lo es creseda en la areas norde sentral de la SUA. Trigos nova produinte resiste a maladia ia es developada de pos 1960 per usa en paises developante. La usa xef de trigo es en la fabrica de farina. Jeneral, spesies dur es usable en fabrica de farina de pan, e spesies mol per la farina de confeta. Trigo es usable ance en produi de come de matina e a grado limitada en la prepara de bir, uisce, e alcol industrial. Trigo de grado basa es usada per nuri bestias de produi. La produi mundal de trigo en la temprana de la desenio de 1990 ia es plu ca 590 tones metral, un aumenta de sirca 30 persentos supra la promedia de la periodo de 1979 a 1981. Rusia ia continua es la produor gidante mundal, ma la produi ia diminui par causa de la cade de la governa sentral en 1991. Xina ia es la produor du de la plu grandes en 1990, e la SUA ia es numero tre.

Trigo orijina en Asia sude-ueste. La relata a monococo (Tritico beotico) e dicoco (Tritico dicoco) indica ce la area la plu probable de doma ia es prosima a Diyarbakir en Turcia. Esta trigos savaje ia es domada en la comensa de cultiva en la "cresente fertil". Formas ia muta con spigas forte e granes plu grande. La cultiva de trigo ia comensa estende estra la cresente fertil en la eda neolitica. A sirca 5000 anios ante aora, trigo ia estende a Itiopia, India, Er, e Espania. Pos mil plu anios, lo ia estende a Xina. A 3000 anios ante aora, la usa de arados traeda par cavalos ia aumenta la produi de granes sereal. En la sentenio 18, la inventa de la forador de semes ia aumenta plu la produi. Ma 2006 ia es la prima anio cuando la mundo ia consuma plu trigo ca lo ia produi. Esta es un problem cual es cisa seria.