Cultur Starčevo

La cultur Starčevo, ance nomida Starčevo–Körös–Criş, es un cultur arceolojial de Europa sude-ueste, datinte a la periodo neolitica entre sirca 6200 a 4500 aec. Lo es nomida per la vileta de Starčevo a la riva norde de la Rio Danubio en Vojvodina, fasante Beograd. La nomes Körös–Criş es de cultures simil, nomida per la Rio Körös o Criş en Magiar e Romania. Otra cultures paralel e simil inclui la cultur Karanovo en Balgaria e la cultur pre-Sesklo en Elas. La cultur Starčevo ia covre un area grande cual ia inclui la plu de Serbia presente, con partes de Bosnia e Hersegovina, Balgaria, Corvatsca, Magiar, Macedonia Norde, e Romania.

Lo es la sosia cultivante e stable la plu vea en la area, an si xasa e colie ia furni alora un parte sinifiante de la dieta de la abitantes. La seramica es tipal ru, ma vasos plu refinada, con ranures e pinta, ia emerje plu tarde. Un tipo de spatula de oso, posible per copi farina, es un fabricada distinguinte.

Restas umana de la cultur en cuatro samples ia ave tre aplogrupos de la cromosoma Y (H2, G2a2a1, e G2a2b2b1a), e cuatro grupos de aplogrupos de la mitocondria (T1a, N1a1a1, K1a4, e W5). Tota de cual ia es comun en la cultivores de Europa neolitica.

On ave du opinas diferente sur la orijin etnical e linguistical de la popla de la cultur Starčevo. Seguente un opina, la cultures neolitica de la Balcanes ia es non-indoeuropean, e la popla indoeuropean ia coloni esta area ante la periodo eneolitica. Seguente un otra opina, la cultures ia es ja indoeuropean, arivada plu temprana de Anatolia, cual alga rexercores vide como la orijin de la indoeuropeanes. Esta teorias es nomida la ipotese de curganes e la ipotesa anatolian. Un plu teoria sujeste ce la Balcanes es la loca orijinal de la indoeuropeanes.