Alida Valli

D'Alida Valli, gebuer den 31. Mee 1921 zu Pola an Istrien, a gestuerwen den 22. Abrëll 2006 zu Roum, mam richtegen Numm Baroness Alida Maria Laura Altenburger von Marckenstein und Frauenberg, war eng italieenesch Schauspillerin.

Alida Valli
Portrait vun 1947
Gebuertsnumm	Baroneasa Alida Maria Laura Altenburger von Marckenstein-Frauenberg, Baroness Alida Maria Laura Altenburger von Marckenstein-Frauenberg
Gebuer	31. Mee 1921 Pula
Gestuerwen	22. Abrëll 2006 Roum
Nationalitéit	Italien, Kinnekräich Italien
Educatioun	Centro Sperimentale di Cinematografia
Aktivitéit	Sänger, Theaterschauspiller, Filmschauspiller, Filmregisseur, Schauspiller
Famill
Bestuet mat	Giancarlo Zagni, Oscar De Mejo
Kanner	Carlo De Mejo

Hir éischt Rollen hat d'Alida scho mat 15 Joer a klenge Rolle beim italieenesche Film. An de Joren drop gouf se déi beléiftst a gefrootsten italieenesch Schauspillerin, si hat souguer de Spëtznumm "La Fidanzata d'Italia" (D'Fiancée vun Italien). D'Lidd "Ma l'amore no", dat s'am Film "Stasera niente di nuovo" (1942) gesongen huet, war jorelaang en Hit. 1943 huet s'an der däitsch-italieenescher Coproduktion "I pagliacci" (Bajazzo) no der Oper von Leoncavallo matgespillt. Well se sech weeder vun Nazidäitschland, nach vum faschisteschen Italie fir Propagandazwecker aspane loosse wollt, huet se bis d'Enn vum Krich keng Filmrolle méi ugeholl.

Nom Krich huet se duerch e Kontrakt mam Produzent David O. Selznick probéiert, nees an d'Filmgeschäft ze kommen. Mä eréischt eng Roll am Alfred Hitchcock sengem The Paradine Case (1947) an d'Haaptroll - nieft dem Orson Welles an dem Joseph Cotten - an der Graham-Greene-Verfilmung "The Third Man" (1949, Regie: Carol Reed) huet hir international zum Duerchbroch verhollef. Duerno hat se zu Hollywood awer just nach méi kleng Rollen. 1951 ass se nees an Italien hannescht gaangen, wou s'ënner dem Luchino Visconti an dem Bernardo Bertolucci (Novecento) Filmer mat Succès gedréint huet.

Hir lescht Filmroll hat d'Alida Valli an "Semana Santa" (2002). Am Ganzen huet s'a méi wéi 130 Kinofilmer an Tëleesproduktioune matgeschafft. Do donieft hat si och am Theater gespillt, z. B. d'Gräfin Geschwitz am Frank Wedekind sengem Lulu an der Inszenierung vum Patrice Chéreau, oder a Stécker vum Gabriele D'Annunzio oder Henrik Ibsen.