Michelangelo

Michelangelo di Lodovico Buonarroti Simoni (6 Meurth 1475 – 18 Hwevrel 1564), godhvedhys avel Michelangelo, o lymner, gravyer, pennser, prydydh, hag ynjynor a Itali y'n Dastinythyans (Renaissance). War-barth ha Leonardo da Vinci, y'n gylwir yn fenowgh "den a'n Dastinythyans" a styr y'n jeva roas meur yn lies devnydh.

Michelangelo a vewa bewnans bysi dres ehen, yn unn wruthyl niver bras a oberennow. Yma rann a oberennow Michelangelo yn-mysk an re moyha aga bri a'n jeves an bys. Ynna yma diw dhelow varbel gerys-da, an Pieta yn Basilica Sen Peter ha Davydh a sevi unnweyth yn piazza yn Florens mes yma lemmyn y'n Virva Accademia. Y lymnansow an moyha gerys-da yw frescos hujes, nen an Chapel Sistin hag an Vreus Dhiwettha. Y oberen an moyha gerys-da a bennserneth yw penn est ha dom Basilica Sen Peter.

Y hwodhor meur a vewnans Michelangelo drefen ev dhe asa lies lyther, bardhonek ha jornal. Drefen y vos a gemmys bri, ev a veu an kynsa artydh dhe weles dyllo bewskrif a'y vewnans hag ev byw hwath.^[1] Treweythyow y'n gylwir Il Divino.^[2] Artydhyon erel a leveris y'n jeva terribilità, (ow styrya y perthys own a'y oberennow drefen aga bos mar vras ha leun a amovyansow krev). Lies artydh aral hag a welas y ober a assaya kopia an keth gnas a amovyansow. Dhyworth an tybyans ma a terribilità y teuth gis artydh henwys Mannerism.

1. ↑ Michelangelo. (2008). Encyclopædia Britannica. Ultimate Reference Suite.
2. ↑ Emison, Patricia. A - Creating the "Divine Artist": from Dante to Michelangelo (Brill, 2004) ISBN 9789004137097