Shpeznaame

Enne Shpeznaame eß ene Name för Minsche, die alld jedäuf wohre, udder förren Saach, wo sesch Andere spääder doför ußjedaach han. Janz öff maach mer dä Speznaam besser känne, wie dä Deufnaam.

En Kölle jiddet de Lanxess-Arena. Ävver frooch ens noh'm Henkelmännsche. Loor et aan, un do weeß wesse, worüm se et esu jennannt han. „Henkelmännsche“ es enne Spetznaame för die Hall.

En Kölle hät die Müllers Aap jellääev. Ävver wie hät dä reschtesch jeheiße? Peter Müller. „Müllers Aap“ es däm singe Spetznaam jewääse.

Em Vrings-Veedel lääf dä Schang Jülich. En singem Paß steiht „Jean“. Dat is ähnlich, evver nit et selve.

Böckderök Wau Wau han de Päntz ene Frou nohjeroofe, die evver Anna Maria Zaudig jeheiße hät, un ald zick 1876 dud es. An dä eijentlesche Name er-ennert sesch kein Sou mieh, evver „Böckderök Wau Wau“ un dä Furrel kennt der Kölsche höck nooch.

De Mussiker, die Hip-Hop un Rap maache, do sen Spetznaame janz jeläufig. Mar es dä Jan Philipp Eißfeldt vell bekannter unger dämm Name „Jan Delay“, evver och als „Eizi Eiz“ un „Boba Ffett“. Dä bikannte düütsche Rapper „Samy Deluxe“ heeis mem börjerlesche Name Samuel Sorge. Bekannt es he evver bloß unger singe Spetznaame Samy Deluxe, WickedaMC un SamSemilia. Bei de Bläck Fööß spellt eine, dä es als dä „Bömmel“ bekannt. Datte ens op dä Name Antonius jedeuf wohd, un Lückeroth heiß, wä et weiß.

Ene Spetznam es keine Künslername. Dä jäve sich de Künsler selver, udder dä ier Mänatscher deit en ußdenke. Et künnt sin, dat vun dä Hip-Hopper un Räper bover der ein udder andere Name kein Spez- söndisch ene Künslername wohr. Wä weiß dat esu jenau ze saage?

Manch Mol bruch mer ene Spezname, öm zwei Minsche ze ungerscheide, die am sellve Plaaz udder em sellve Veedel zohus sin, un die eeifach mem selve Name erüm loofe. Peter Müller, Jupp Schmitz, un Pütze Änn un Kätt hammer ze baasch em Tellefoonbooch. Wat well mer maache? Mer moß se „Müllers Plaat“, „Schmitze Lang“, et „schääle Änn“ un „Kätt vun dr Kett“ roofe, domet mer wesse kann, wä jemeint es.

Och en Kölle, do han se en Zick lang dä Läärer am Gumminasium aan de Eck vom Katthäuser-Wall noh bei de Waisehus-Jaß Spezname nohm Förname jejovve, evver nit alldemohle. Doof, dat eine mem Noname „Ludwig“ heeß. Hä kräät dä Speznam „Lui“ o „Louis“ verpaß. Emm sellver wohr et ejal, hä woß jo, dat em sing Schöler enn gähn hatte un enn reschpekteere dähte. Ävver dä Schulleider, övverijjens mem Spetzname „Bello“, hät ene fiese Braß op die Kender, weil hä jedaach hät, dat se en ene Lui schempfe dähte. Hät nit jestemmp, un die Puute han sesch och der Muul nit verbeede lohße. Se han dä Name dann noch extra jebruch, un enn met Krigg druße aan de Schollwand jeschrevve, för dä „Bello“ en Roosch ze brenge. Dat hät jeflup, un eine dä „Lui“ aan de Wand jemohlt hat, es jeflooge un wohd doför jeschaß.