Pomp (Maschin)

En Pump (Pomp) eß en Maschien, wo mer jät met bewäje kann, wat mer sönß och schödde kann, ävver och Luff. Bänzin, Jertraide un Määhl, Bier un Wing, Stöbb, dat weed all met Pumpe bewääsh. Rin in dä Silo, rus us däm Silo, rin en dä Kahn, en der Waaren, en der Tank oder zom Verjaaser, övverall sin Pompe am Werreke.

Me kann Pompe noh verschiedener Aarte endeele. Et jebräuchlichste ees die Endeilung noh däm Funktionsprinziip.

Dat Funktionsprinzip erkläärt an dem Beishpill vun Wasser en_ener Kolevepomp:

En Kolevepump besteijt us enem Zylinder, enem Koleve, enem Rückschlachventill, eh bischje Rühr un enem Pompeschwengel. Dä Pompeschwengel is vun bouven an dem Koleve befestich un kan dä en enem Rühr erop un eraf bewäje. Jeijt dä Koleve jetz erope, dann widd en däm Roum unger däm Koleve ene Ungerdruck erzeuch. Dodorch widd Wasser dorch eh Rühr anjesauch. Bewäch sich dä Koleve jetz noh unge, widd dat Rückschlachventill opjedröck un dat Wasser kann en dä Roum över däm Koleve jelange. Ändert dä Koleve jetz widder sing Richtung widd dat Wasser över em wigger huhjedeut, weil dat Rückschlachventill zoh jeijt un dat Wasser nit zeröck loufe kann.

En Verdrängerpomp verdrängk also emmer ene bestimpte Roumeenhalt. Dä ees avhängisch vun dä Baujröße vun dä Pomp. Die Pompeaart ees en de Rejel selevesaansauchend. Andere Verdrängerpompe sin:

• Förderschnecke (Archimedische Schruvv)
• Balechpompe
• Kolevepompe
• Rotationskolevepompe
• Zahnradpompe
• Membranpompe
• Driehschieverpompe
• Schlauchpompe
• Äxzänterschnäckepompe
• Schruvvepompe un Schruvveverdichter

Strömungspompe beschleinije eijentlich nur dat Medium wat se pompe dun. Se sin nit seelevesaansauchend un künnen et ja nit av, wenn se drüch louve. Dann jon se kapott. Beishpille för Strömungspompe sin:

• Kreiselpomp (widd em Feuerwehrwache eenjesatz)
• Axialpomp
• Diajonalpomp
• Radialpomp

Ene Sunderfall sen die sujenannte Strohlpompe. Dobei widd dorch zem Beishpill ene Wasserstrohl Jaas metjerisse un somit avjesauch. Et jitt do:

• Bloosenpomp
• Wasserstrohlpomp
• Dampfstrohlpomp
• Stoßheber (Hydraulischer Widder)

Meh kann die Pompe natürlich och noh däm eendeele, wat se pompe. Su jitt et dann:

• Luffpompe
• Wasserpompe
• Jüllepompe
• Benzinpompe

Oder meh benennt se noh dä Anwendung wofür se jemaat wudde sin. Wie zem Beishpill:

• Einspritzpomp
• Lenzpomp
• Vakuumpomp

• Et jitt noch mieh Bedeutunge fun Pump → Pump (Watt ėßß datt?)
• Et jitt noch mieh Bedeutunge fun Pomp → Pomp (Watt ėßß datt?)
• un Bedeutunge fun Pompe → Pompe (Watt ėßß datt?)

 Commons: Pumpe – Album mit Bilder, Filemche un Tön op Wikimedia Commons

Mieh Aatikkel övver Weßßeschaaf & Teschnigk fingßte op dä Pooz:Weßßeschaaf & Teschnigk