გაეროს ეკონომიკური და სოციალური საბჭო

გაეროს ეკონომიკური და სოციალური საბჭო (ECOSOC) — გაერთიანებული ერების ორგანიზაციის ორგანო, რომელიც გენერალური ასამბლეის ზედამხედველობის ქვეშ ახორციელებს გაეროსა და მისი სხვა ინსტიტუტების ეკონომიკური და სოციალური საქმიანობის კოორდინაციას. უფლებამოსილია ჩაატაროს გამოკვლევები და შეადგინოს ანგარიშები საერთაშორისო საკითხებზე ეკონომიკის, სოციალურ ურთიერთობათა, კულტურის, განათლების, ჯანდაცვის, ადამიანთა უფლებების, ეკოლოგიის და სხვა სფეროებში, მისცეს რეკომენდაციები გენერალურ ასამბლეას, მის წევრებს, გაეროს სპეციალიზებულ დაწესებულებებს, კოორდინაცია გაუწიოს მათ საქმიანობას, გააფორმოს ხელშეკრულებები (რომლებიც მტკიცდება გენერალური ასამბლეის მიერ), მიიღოს მათგან ანგარიშები, წარუდგინოს უშიშროების საბჭოს შესაბამისი ინფორმაცია. საბჭოს სესიები, როგორც წესი, ტარდება წელიწადში ორჯერ. იგი შედგება გენერალური ასამბლეის მიერ არჩეული გაეროს 54 წევრისაგან.^[1] ყოველწლიურად ხდება წევრთა 1/3-ის გადარჩევა. საბჭოს აქვს რეგიონული კომისიები.

საბჭო ანგარიშვალდებულია გენერალური ასამბლეის წინაშე ბევრი სასიცოცხლო მნიშვნელობის საკითზე, რომლებიც მოიცავს ადამიანის უფლებებს, კულტურას, სიღარიბეს, მეცნიერებას, ნარკოტიკების გადაზიდვას და ა. შ. ასევე ატარებს კვლევებს და ამზადებს ანგარიშებს ეკონომიკურ და სოციალურ მდგომარეობაზე და მიიჩნევა ამ ორ დარგში სტატისტიკური მონაცემების ლიდერად. გარდა კვლევისა და ანგარიშებისა, საბჭოს ეკისრება საკოორდინაციო ფუნქციაც. ის ზედამხედველობს გაეროს 14 სპეციალიზებულ სააგენტოს, მათ შორის ჯანდაცვის მსოფლიო ორგანიზაციას, მსოფლიო ბანკს, საერთაშორისო სავალუტო ფონდს, და გაეროს არაერთ პროგრამასა და ფონდს (მსოფლიო კვების პროგრამა, გაეროს მოსახლეობის ფონდი, გაეროს გარემოსდაცვითი პროგრამა).^[2]

საბჭო წარმოადგენს საერთაშორისო ეკონომიკური და სოციალური საკითხების განხილვის და ამ სფეროებში არსებული პრობლემების მოგვარების გზების ძიების მთავარ ფორუმს. მისი მიზანია ცხოვრების მაღალი დონის შექმნა, სრული დასაქმებისა და სოციალური პროგრესის უზრუნველყოფა და ადამიანის უფლებებისა და ძირითადი თავისუფლებების პატივისცემისა და დაცვის წახალისება.^[3]

ვადა	აფრიკის ქვეყნები (14)	აზია-წყნარი ოკეანის ქვეყნები (11)	აღმოსავლეთ ევროპის ქვეყნები (6)	ლათინური ამერიკა და კარიბის ქვეყნები (10)	დასავლეთი ევროპა და სხვა ქვეყნები (13)
2023 – 2025	ბოტსვანა  კაბო-ვერდე  კამერუნი  ეკვატორული გვინეა	ჩინეთი  ლაოსი  კატარი  სამხრეთ კორეა	სლოვაკეთი  სლოვენია	ბრაზილია  კოლუმბია  კოსტა-რიკა	დანია  საბერძნეთი  ახალი ზელანდია  შვედეთი
2022 – 2024[4]	კოტ-დ’ივუარი  ტუნისი  ტანზანია  ესვატინი  მავრიკი	ავღანეთი [ა] [ბ][5]  ინდოეთი  ომანი  ყაზახეთი	ხორვატია  ჩეხეთი	ბელიზი  ჩილე  პერუ	ბელგია  იტალია  კანადა  აშშ
2021 – 2023[6]	ლიბერია  ლიბია  მადაგასკარი  ნიგერია  ზიმბაბვე	ინდონეზია  იაპონია  სოლომონის კუნძულები	ბულგარეთი	არგენტინა  ბოლივია  გვატემალა  მექსიკა	ავსტრია  საფრანგეთი  ისრაელი  პორტუგალია  გაერთიანებული სამეფო

საბჭო გაეროს ქარტიამ 1945 წელს დააფუძნა და თავდაპირველად მასში 18 წევრი იყო. თუმცა, 1965 და 1974 წლებში დოკუმენტში ცვლილებები შევიდა, რამაც სახელმწიფოების რაოდენობა 54-მდე გაზარდა. ამ ორგანოს წევრობა გადანაწილებულია გეოგრაფიულად: 14 ადგილი ეკუთვნის აფრიკის კონტინენტს, 11 — აზიას, 6 — აღმოსავლეთ ევროპას, 10 — ლათინურ ამერიკასა და კარიბის აუზის ქვეყნებს, 13 — დასავლეთ ევროპასა და სხვა რეგიონებს.^[7]

გენერალური ასამბლეა საბჭოს წევრ სახელმწიფოებს 3 წლის ვადით ირჩევს. გადაწყვეტილებები მიიღება ხმათა უბრალო უმრავლესობით.^[8]

ყოველ წლის პირველი შეხვედრის დროს საბჭო ირჩევს პრეზიდენტს და 4 ვიცე-პრეზიდენტს, რომელთაც თავის მხრივ უნდა ჩამოაყალიბონ ბიურო. პრეზიდენტის რეკომენდაციით საბჭო თითოეულ ვიცე-პრეზიდენტს განუსაზღვრავს სპეციალურ პასუხისმგებლობებს. იმ შემთხვევაში, თუ საბჭოს პრეზიდენტი ვერ ესწრება შეხვედრას, მანდ ერთ-ერთი ვიცე-პრეზიდენტი უნდა დანიშნოს მის მოვალეობის შემსრულებლად. პრეზიდენტის მოვალეობებია შეხვედრების თავჯდომარეობა, დისკუსიების ორგანიზება, ამ მიზნით ინიციატივების გამოჩენა და საბჭოსთვის წარდგენა და საბჭოს დღის წესრიგით გათვალისწინებულ საკითხებზე კონსენსუსის ხელშეწყობა. რაც შეეხება ბიუროს, მისი მთავარი ფუნქციები მოიცავს დღის წესრიგის წარდგენას, სამუშაო პროგრამის შედგენას და გაეროს სამდივნოსთან მხარდაჭერით სესიის ორგანიზება.^[9]

საბჭო წლის მანძილზე ატარებს რამდენიმე მოკლე სესიას, სპეციალური მიზნისთვის განკუთვნილ შეხვედრებს, მრგვალ მაგიდებს და პანელურ დისკუსიებს დაინტერესებული არასამთავრობო ორგანიზაციების მონაწილებით ოთხკვირიანი მთავარი სესიის მოსამზადებლად, რომელიც ივლისში იმართება. აღნიშნული სესია 5 სეგმენტადაა დაყოფილი, რაც მოიცავს მაღალი დონის, საკოორდინაციო, საოპერაციო აქტივობების, ჰუმანიტარული საქმეებისა და ზოგად სეგმენტებს. ამასთანავე, საბჭოს საქმიანობა ხორციელდება დახმარე ორგანოების მეშვეობით, რომლებიც მოიცავს ფუნქციურ და რეგიონულ კომისიებს.

მაღალი დონის პოლიტიკური ფორუმი განიხილავს მდგრადი განვითარების ვალდებულებების შესრულების პროგრესს და პოლიტიკურ ლიდერებს სთავაზობს რეკომენდაციებსა და მითითებებს ამ მიმართულებით. აღნიშნული ფორუმი ეკონომიკური და სოციალური საბჭოს ფარგლებში ყოველ წელს იმართება და გრძელდება 8 დღე, რაც ასევე მოიცავს 3 დღიან მინისტერიალს. თუმცა, გარდა აღნიშნული ფორმატისა, 4 წელიწადში ერთხელ გენერალურ ასამბლეაში იმართება შეხვედრები სახელმწიფოთა და მთავრობის მეთაურთა დონეზე.^[10]

განვითარებისათვის თანამშრომლობის ფორუმი განიხილავს უახლეს ტენდენციებსა და პროგრესს საერთაშორისო განვითარებაზე თანამშრომლობის მიმართულებით და ხელს უწყობს სხვადასხვა აქტორისა და აქტივობის კოორდინაციას. ფორუმზე ერთად იკრიბებიან მინისტრები და უფროსი ექსპერტები განვითარებული და განვითარებადი ქვეყნებიდან, ასევე სამოქალაქო საზოგადოების, საერთაშორისო ორგანიზაციებისა და ბანკების, კერძო სექტორისა და საქველმოქმედო ფონდების წარმომადგენლები.^[11]

სტატისტიკის კომისია — 1947 წელს დაფუძნებული გლობალური სტატისტიკური სისტემის უმაღლესი ორგანო, რომელიც აერთიანებს წევრი სახელმწიფოების მთავარ სტატისტიკოსებს. კომისია საბჭოს ეხმარება ეროვნული სტატისტიკების განვითარების ხელშეწყობაში, სპეციალიზებული სააგენტოების სტატისტიკური საქმიანობის კოორდინაციაში, სტატისტიკური ინფორმაციის მოგროვების, ანალიზისა და გავრცელების ეტაპზე გაეროს ორგანოებისათვის მხარდაჭერაში.^[12]

მოსახლეობისა და განვითარების კომისია — საბჭოსთვის ახორციელებს კვლევებსა და გასცემს რჩევებს მოსახლეობისა და მასთან დაკავშირებულ განვითარების პოლიტიკასა და პროგრამებზე, მოსახლეობისა და განვითარების სტრატეგიების ინტეგრირებაზე და სხვ. ამასთანავე, კომისია ახორციელებს მოსახლეობასა და განვითარებაზე საერთაშორისო კონფერენციის აქტივობების პროგრამის მონიტორინგს, განხილვასა და შეფასებას ეროვნულ, რეგიონულ და გლობალურ დონეზე.^[13]

სოციალური განვითარების კომისია — კოპენჰაგენში ჩატარებული სოციალური განვითარების სამიტის შემდეგ, კომისია არის კოპენჰაგენის დეკლარაციის და აქტივობათა პროგრამის განხორციელების ზედამხედველობაზე პასუხისმგებელი მთავარი ორგანო.^[14]

კომისია ქალთა სტატუსის შესახებ — მთავარი გლობალური მთავრობათაშორისი ორგანო, რომელიც გენდერულ თანასწორობის ხელშეწყობასა და ქალთა გაძლიერებაზეა ორიენტირებული. ის პასუხისმგებელია ასევე ქალთა უფლებების განვითარებაზე და გენდერული თანასწორობისა და ქალთა გაძლიერებისათვის საჭირო გლობალური სტანდარტების ჩამოყალიბებაზე.^[15]

ნარკოტიკების კომისია — შეიქმნა 1946 წელს იმ მიზნით, რომ დახმარებოდა საბჭოს საერთაშორისო ნარკოტიკების კონტროლის თაობაზე არსებული შეთანხმებების ზედამხედველობაში. დღეს კომისია შეისწავლის და განიხილავს მსოფლიოში არსებულ სიტუაციას ნარკოტიკების მიმართულებით და ამ სიტუაციაში სამ ერთმანთთან დაკავშირებულ საკითხს: ნარკოტიკების არასწორი გამოყენების თავიდან აცილება, ნარკოდამოკიდეული პირების რეაბილიტაცია და უკანონო ნარკოტიკებით ვაჭრობას.^[16]

დანაშაულის პრევენციისა და სისხლის სამართლის კომისია — კომისია ვალდებულია, გააუმჯობესოს საერთაშორისო ქმედებები ეროვნული და ტრანსეროვნული დანაშაულის წინააღმდეგ საბრძოლველად და გაზარდოს სისხლის სამართლის მართვის სისტემების ეფექტიანობა და სამართლიანობა. ასევე, ის წარმოადგენს გაეროს წევრ სახელმწიფოთათვის გამოცდილების, ცოდნისა და ინფორმაციის გაცვლის ფორუმს იმ მიზნით, რომ განვითარდეს ეროვნული და საერთასორისო სტრატეგიები და განისაზღვროს დანაშაულთან ბრძოლის პრიორიტეტები.^[17]

აფრიკის ეკონომიკური კომისია — მისი მანდატი მოიცავს ეკონომიკური და სოციალური განვითარების ხელშეწყობას წევრი სახელმწიფოებისათვის, შიდარეგიონული ინტეგრაციის გაზრდას და აფრიკის განვითარებისათვის საერთაშორისო თანამშრომლობის ხელშეწყობას.

აზიისა და წყნარი ოკეანის აუზის ქვეყნების ეკონომიკური და სოციალური კომისია — წარმოადგენს გაეროს რეგიონულ ჰაბს, რომელიც ორიენტირებულია ინკლუზიური და მდგრადი განვითარების მიღწევაზე რეგიონის ქვეყნებს შორის თანამშრომლობის განვითარებით. კომისია სახელმწიფოებს სთავაზობს ანალიტიკურ მასალებს, რომლებიც ეხება რეგიონის ცვალებად დინამიკას ეკონომიკური, სოციალური და გარემოსდაცვითი საკითხებზე. ის ასევე წარმოადგენს საკონსულტაციო ორგანოებს და სთავაზობს სახელმწიფოებს შესაძლებლობების გაძლიერებას და ტექნიკურ დახმარებას.

ევროპის ეკონომიკური კომისია — ხელს უწყობს პან-ევროპულ ეკონომიკურ ინტეგრაციას, მდგრად განვითარებასა და ეკონომიკურ კეთილდღეობას პოლიტიკური დიალოგის, ნორმებისა და რეგულაციების შემუშავების, ეკონომიკური და ტექნიკური გამოცდილებისა და საუკეთესო პრაქტიკის გაზიარებისა და გამოყენების გზით.

ლათინური ამერიკისა და კარიბის აუზის ქვეყნების ეკონომიკური საბჭო — მისი მიზანია რეგიონის ეკონომიკური, სოციალური და გარემოსდაცვითი მდგრადი განვითარება განგრძობადი საერთაშორისო თანამშრომლობით. საბჭო ახორციელებს ყოვლისმომცველ განვითარების პროცესის კვლევასა და ანალიზს და წარმოადგენს შესაბამის ნორმატიულ, ოპერაციულ და ტექნიკური თანამშრომლობის სერვისს რეგიონის განვითარების მხარდასაჭერად.^[18]

დასავლეთ აზიის ეკონომიკური და სოციალური კომისია — მისი ფუნქცია-მოვალეობები მოიცავს დასავლეთ აზიაში ჩართულობის გაზრდას და სხვა რეგიონებთან თანამშრომლობის ხელშეწყობას, წევრი ქვეყნების საჭიროებებისა და არსებული გარემოებების შესახებ გლობალური ცნობიერების გაზრდას და გამოცდილებისა და ცოდნის გაზიარების წახალისებას.^[19]

გაეროს ქარტიის 71-ე მუხლის თანახმად, ეკონომიკურ და სოციალურ საბჭოს შეუძლია კომპეტენტურ არასამთავრობო ორგანიზაციებთან კონსულტაციების წარმოება. შეთანხმება კონსულტაციების თაობაზე შესაძლოა მოხდეს საერთაშორისო ორგანიზაციებთან, ან, სადაც შესაძლებელია, ეროვნულ ორგანიზაციებთან შესაბამის წევრ ქვეყანასთან შეთანხმების შემდეგ.

გაერო არასამთავრობო ორგანიზაციებთან სამი გზით თანამშრომლობს: საკონსულტაციო სტატუსი ეკონომიკურ და სოციალურ საბჭოსთან, ასოცირებული სტატუსი საჯარო ინფორმაციის დეპარტამენტთან და არასამთავრობო სამეკავშირეო სამსახურის წევრობა. თუმცა, მიიჩნევა, რომ ჩამოთვლილი სამი ურთიერთობის ფორმიდან ეკონომიკური და სოციალური საბჭო მიიჩნევა ოფიციალური აღიარების ყველაზე მაღალ დონედ, ვინაიდან არასამთავრობო ორგანიზაციებს უწევთ გაიარონ ფორმალური სააპლიკაციო პროცესი და შემოწმდნენ გაეროს მიერ. საბჭოსთან აღნიშნული ორგანიზაციების თანამშრომლობა ფართოდ აღიარებული სქემაა გაეროსა და არასამთავრობო ორგანიზაციების ურთიერთობების რეგულირებისათვის.

ზემოაღნიშნული ორგანიზაციების საკონსულტაციო სტატუსის 3 კატეგორიად იყოფა: ზოგადი კატეგორიის არასამთავრობო ორგანიზაციები, რომლებიც მოიცავს მრავალი მიზნისა და აქტივობის მქონდე ორგანოებს; სპეციალური კატეგორიის ორგანიზაციები, რომლებიც საბჭოს კონკრეტულ საქმიანობებზე არიან სპეციალიზებულნი და ბოლოს ის ორგანიზაციები, რომლებიც პერიოდულად ინტერესდებიან გაეროს აქტივობებით.^[20]

გარდა ზემოთჩამოთვლილი ფუნქციებისა, ეკონომიკური და სოციალური საბჭო აქტიურად არის ჩართული ისეთი მექანიზმების შექმნაში, რომლებიც ეხმარება კონფლიქტის შედეგად დაზარალებული ქვეყნების პრობლემების მოგვარებას და ადამიანის უსაფრთხოების გაუარესების თავიდან ასაცილებლად. ამ მიზნით საბჭო აქტიურად თანამშრომლობს მშვიდობის მშენებლობის კომისიასთან. ამ ორ ორგანოს შორის სამართლებრივი ურთიერთობების საფუძველია რეზოლუცია 60/180 და 61/16. ეს უკანასკნელი რეზოლუცია აღნიშნავს საბჭოსა და კომისიას შორის თანამშრომლობის მნიშვნელობას კონფლიქტის შემდგომი აღდგენის, რეინტეგრაციისა და რეკონსტრუქციის პროცესში, რაც, თავის მხრივ, მდგრადი განვითარების საწინდარია. რეზოლუცია 61/16 ხაზს ასევე უსვამს საბჭოს გამოცდილებას მშვიდობის მშენებლობის საქმეში და მოუწოდებს კომისიას, მიიღოს სარგებელი ამ გამოცდილებით.^[21]

ეკონომიკური და სოციალური საბჭოს 7 წევრი წარმოდგენილია მშვიდობის მშენებლობის კომისიის საორგანიზაციო კომიტეტში და საბჭოს შეუძლია დაიწყოს მოქმედება კომისიის რეკომენდაციების საფუძველზე.^[22]

2002 წელს საბჭომ სპეციალური მიზნით შექმნა საკონსულტაციო ჯგუფები, რათა ხელი შეეწყო კონფლიქტის შედეგად დაზარალებული ქვეყნებისათვის გრძელვადიანი მხარდაჭერის პროგრამების შექმნისათვის. თავდაპირველად შეიქმნა გვინეა-ბისაუსა და ბურუნდის, მოგვიანებით კი ჰაიტის ჯგუფები. მიუხედავად იმისა, რომ ჯგუფების მანდატი მთლიანად მშვიდობის მშენებლობის კომისიამ შეითავსა, საბჭო დიდი ხნის მანძილზე ამზადებდა ჰაიტის გრძელვადიანი განვითარების სტრატეგიას სოციო-ეკონომიკური აღდგენისა და სტაბილურობის ხელშესაწყობად.^[23]

ვიკისაწყობში არის გვერდი თემაზე:

გაეროს ეკონომიკური და სოციალური საბჭო

• გაეროს ეკონომიკური და სოციალური საბჭო
• United Nations Economic and Social Council
  • UN Economic and Social Council – Background
• United Nations Department of Economic and Social Affairs
• Congo – Conference of UN NGO's
• Global Policy Forum – Social and Economic Policy at the UN
• United Nations
• The Group of Eight, ECOSOC and the Constitutional Paradox

ხ • გ • რ გაერთიანებული ერების ორგანიზაცია გენერალური მდივანი: ანტონიუ გუტერეში • გენერალური მდივნის მოადგილე: ამინა ჯეინ მოჰამედი • პრეზიდენტი: დენის ფრენსისი გაეროს სისტემა ქარტია პრეამბულა ძირითადი ორგანოები სამდივნო გენერალური მდივანი (არჩევა) გენერალური მდივნის მოადგილე Under-Secretary-General გენერალური ასამბლეა პრეზიდენტი მართლმსაჯულების საერთაშორისო სასამართლო წესდება უშიშროების საბჭო არჩევნები წევრები პრეზიდენტი ეკოსოსი პრეზიდენტი სამეურვეო საბჭო ფონდები, პროგრამები და სხვა ორგანოები სამშვიდობო ძალები მშვიდობის კულტურა ITC IPCC აესს MINURSO UNAIDS SCSL UNCTAD UNCITRAL UNCDF UNDGC UNDP UNDPO მშვიდობისდაცვა UNEP OzonAction UNEP/GRID-Arendal UNEP-WCMC UNFPA UN-HABITAT OHCHR UNHCR UNHRC UNICEF UNICRI UNIDIR UNITAR გაერო-ოკეანეები UNODC UNOPS UNOSAT UNRISD UNRWA UNSDG UNSSC UNU UNU-OP UNU-CRIS UNV გაეროს ქალები WFP სპეციალიზებული სააგენტოები FAO ICAO IFAD ILO IMF IMO IOM ITU UNESCO UNIDO UNWTO UPU WFEO WHO WIPO WMO მსოფლიო ბანკი IBRD IDA IFC სამდივნოს ოფისები და დეპარტამენტები შტაბ-ბინა სამდივნოს შენობა კონფერენციის შენობა გენერალური ასამბლეის შენობა დესპანი ახალგაზრდებთან გენერალური მდივნის სპიკერი ჟენევა ერებს სასახლე ნაირობი ვენა ეკონომიკური და სოციალური საქმეები პოლიტიკური და სამშვიდობო საქმეები დაგ ჰამარშელდის ბიბლიოთეკა მშვიდობა და უშიშროება პალესტინელთა უფლებები სამშვიდობო ოპერაციები საშინაო ზედამხედველობა იურიდიული საქმეების UN-OHRLLS სპორტი მშვიდობისა და განვითარებისთვის განიარაღების საქმეები კოსმოსური საქმეები თანამშრომლობები ჰუმანიტარული საქმეების კოორდინირება გაეროს ორგანიზაციების ადგილსამყოფელი სექსუალური ძალადობა კონფლიქტებში წევრები და დამკვირვებლები წევრები დამფუძნებელი წევრები უშიშროების საბჭოს მუდმივი წევრები მუდმივი წარმომადგენლობები გაეროში სია გენერალური ასამბლეის დამკვირვებლები ევროპის კავშირი ისტორია წინმდევი წლები საერთაშორისო ტელეკომუნიკაციების კავშირი საერთაშორისო საფოსტო კავშირი ჰააგის 1899 და 1097 წლების კონვენციები მუდმივმოქმედი საარბიტრაჟო სასამართლო სახალხო ჰიგიენის საერთაშორისო ოფისი ერთა ლიგა არქივები ქარტია ორგანიზაციები წევრები საერთაშორისო მართლმსაჯულების მუდმივმოქმედი პალატა მომზადების წლები ლონდონის დეკლარაცია (1941) ატლანტიკური ქარტია (1941) გაეროს დეკლარაცია (1942) მოსკოვის კონფერენცია (1943) თეირანის კონფერენცია (1943) დუმბარტონ-ოქსის კონფერენცია (1944) იალტის კონფერენცია (1945) სან-ფრანცისკოს კონფერენცია (1945) აქტივობები მშვიდობისდაცვა მისიები პერიოდიზაცია მართული ტერიტორიები ადამიანის უფლებათა საყოველთაო დეკლარაცია მიღება ადამიანის უფლებათა დღე გაფართოება სამოქალაქო და პოლიტიკურ უფლებათა პაქტი კომიტეტი ეკონომიკური, სოციალური და კულტურული უფლებების შესახებ საერთაშორისო პაქტი კომიტეტი წამების აკრძალვის კონვენცია კომიტეტი კონვენცია რასობრივი დისკრიმინაციის წინააღმდეგ კონვენცია ქალთა დისკრიმინაციის წინააღმდეგ კონვენცია ლტოლვილთა სტატუსის შესახებ კონვენცია ბავშვის უფლებების შესახებ კომიტეტი დამატებითი ოქმი ფაკულტატიური ოქმი შეზღუდული შესაძლებლობის მქონე პირთა უფლებების კონვენცია აბორიგენი ხალხების უფლებათა დეკლარაცია საზღვაო სამართლის კონვენცია კონვენცია ნარკოტრეფიკინგის წინააღმდეგ გარემოს ცვლილების აკრძალვის კონვენცია კონვენცია ტრანსნაციონალური ორგანიზირებული დანაშაულის წინააღმდეგ კონვენცია გენოციდის საქონლის საერთაშორისო რეალიზაციის კონვენცია კორუფციის წინააღმდეგ კონვენცია მსოფლიო მემკვიდრეობის კონვენცია რეზოლუციები უშიშროების საბჭოს ვეტოები გენერალური ასამბლეის რეზოლუციები გაეროს უშიშროების საბჭო კვიპროსი ირანი ერაყი ისრაელი ლიბანი მთიანი ყარაბაღი ჩრდილოეთი კორეა პალესტინა სირია დასავლეთი საჰარა იემენი არჩევნები გენერალური მდივანი (2021) (2016) მართლმსაჯულების საერთაშორისო სასამართლო (2023) (2022) (2021) (2020) (2017) (2014) (2011) გენერალური ასამბლეის პრეზიდენტი (2016) უშიშროების საბჭო (2016) დაკავშირებული ბრეტონ-ვუდსის სისტემა ბირთვული გამოცდების ყოვლისმომცველი აკრძალვის ხელშეკრულება კრიტიკა Delivering as One ნარკოტიკის მართვის ხელშეკრულებები დროშა ღირსების დროშა ოთხი ერის ინიციატივა გაეროს გლობალური შეთანხმება სისხლის სამართლის საერთაშორისო სასამართლო წესდება ნარკოტიკის კონტროლის საერთაშორისო საბჭო მშვიდობის საერთაშორისო დღე მშვიდობის კულტურის და არაძალადობის ათწლეული მსოფლიოს ბავშვებისთვის ინტერპრეტატორები laissez-passer სამხედრო შტაბის კომიტეტი ოფიციალური ენები ქიმიური იარაღის აკრძალვის ორგანიზაცია რალფ ბანჩის პარკი SDG Publishers-ის შეთანხმება მდგრადი განვითარების მიზნები გაეროს საფოსტო ადმინისტრაცია UN Block By Block ბეიძინის წესები მანდელას წესები ბირთვული იარაღის გაუვრცელებლობის ხელშეკრულება ბირთვული იარაღის აკრძალვის ხელშეკრულება გაეროს სარეკომენდაციო კომიტეტი ადგილობრივი ხელისუფლებებისათვის გაეროს დღე ათასწლეულის დეკლარაცია უშიშროების საბჭოს ვეტოს ძალა გაეროს რეფორმა გაეროს უშიშროების საბჭოს რეფორმა გაეროს ხელოვნ ების ნიმუშების კოლექცია გაეროს უშიშროების საბჭოს ფრესკა გაეროს ფედერალური კრედიტების კავშირი გაეროს საერთაშორისო სკოლა ჰანოი გაეროს მანდატი გაეროს მემორიალური სასაფლაო UN Sacco მშვიდობის უნივერსიტეტი ქმედების ვენის დეკლარაცია და პროგრამა ვუდრო უილსონის მემორიალი გაეროს ასოციაციის მსოფლიო ფედერაცია სხვა მონახაზი გაეროს პრიზი ადამიანის უფლებათა სფეროში გაეროს მედალი გაეროს რადიო გაეროს სატელევიზიო ფილმების სერიები (1964–1966) UN Special გაზეთი Ex Tempore გაზეთი გაერო პოპ-კულტურაში გაეროს მოდელი გაეროდან გასვლა