Mumbai

Mumbai
Kelk imaji pri Mumbai.
Lando:	India
Stato:	Maharashtra
Informo:
Latitudo:	18º58'30" N
Longitudo:	72º49'33" E
Altitudo:	14 m
Surfaco:	437,71 km²
Habitanti:	13 830 884[1] (2010)
Denseso di habitantaro:	22.922 hab./km²
Horala zono:	UTC+ 5:30
Urbestro:	Shraddha Jadhav
Mapo:
Oficala retosituo:
www.mcgm.gov.in

Mumbai, olim nomizita Bombay esas urbo en India, e chef-urbo dil stato Maharashtra. Mumbai esas la maxim populoza urbo di India e la duesma maxim populoza urbo di la mondo kun preske 14 milion habitanti en la yaro 2010.^[1]. L'urbocentro, kun la vicina urbeti Navi Mumbai e Thane, esas un ek la maxim populoza urbala regioni di la mondo. Mumbai jacas an la westala marbordo di India e posedas profunda, naturala portuo. Ol anke esas la maxim richa urbo dil sudala, westala, o central Azia.

La sep insuli qui konstitucas Mumbai esis olim vilajeti en qui la precipua okupado esis peskado. Dum multa yarcenti l'insuli esis sub intersequanta imperii Indiana, ante ke cedesis a Portugalani e pose a Britaniana Est-India Kompanio. Dum la 18ma yarcento, Britaniana koloniigisti developis l'urbeto aden importanta komerco-centro per granda konstrukto-projeti. Mumbai kreskis kom l'ekonomial ed edukadala centro dum la 19ma yarcento. Ta kresko divenis forta fundamento por la movado pri l'autonomeso di India dum la frua 20ma yarcento. Kande India ganis sua autonomeso, l'urbo enkorpigesis en la stato Bombay. Dum la yaro 1960 la stato Maharashtra kreesis, ed Bombay divenis lua chef-urbo. L'urbo oficale rinomizesis Mumbai en 1995.

Mumbai esas la komercal e filmo-industriala chefurbo di India, produktante preske 5% ek la totala nacionala produkturo e 70% de la komercaji di India. Mumbai esas hemo di importanta financal institucuri, exemple la Banko di India, la Borso di Mumbai, la Nacionala Borso di India, e la sideyi di multa Indiana kompanii e plurnaciona korporacioni. Ol gastigas la chefa nukleara institucuri, exemple la Centro Bhabha por Atomal Inquesto, la Korporaciono Indiana pri Nukleara Povo, e l'Institucuro Tata pri Bazala Inquesti. L'urbo anke lojigas la filmo e televizionala industrii di India, precipue ti qui produktas filmi en la lingui Hindi e Marathi, maxim konocata kom "Bollywood". Kun medio favoroza a komerco, e potencialo pri ofrar plu bona moyeno por entrateno, Mumbai atraktas multa migranti de tota India. Konseque, la mixo di multa socii e kulturi existas en la urbo.

Mumbai jacas sur streta peninsulo sude del insulo Salsete, qua cirkondesas da Araba maro weste, golfeto Thane este, e golfeto Vasai norde. Lua reliefo esas plana en arei olim kovrita da la maro, qua pose drenesis, kun kelka kolini. La mezavalora altitudo dil urbo esas 14 metri e lua maxim alta punto jacas 450 metri super la marala nivelo. Mumbai dividesas en du parti: city district, kovranta 157 km² kun 3 085 411 habitanti; e suburban district, kun 446 km² e 9 356 962 habitanti en 2011. La tota surfaco dil urbo esas 437,71 km².

Lua klimato esas tropikala influata da musono kun du sezoni (Aw segun la klimatala klasifikuro da Köppen). La mezavalora temperaturo en mayo (printempo) esas 30,5°C, kontre ke la mezavalora temperaturo en januaro (vintro en nordala misfero) esas 24,9°C.

La pluvoza sezono iras de junio til septembro. La mezavalora yarala pluvo-quanto esas 2184,1 mm, e la maxim pluvoza monato esas julio, kun mezavalore 711,6 mm. Inundadi esas frequa dum pluvoza sezono. Cikloni esas rara: la maxim mala ciklono enrejistrita en la historio dil urbo eventis en 1948, e produktis 38 morti e 47 plusa homi desaparinta.

• Sankt-Peterburg, Rusia^[2]
• İzmir, Turkia^[3]
• Espoo, Finlando^[3]
• Victoria de Durango, Durango, Mexikia^[3]
• Stuttgart, Germania^[2]
• Berlin, Germania^[2]
• London, Unionita Rejio^[2]
• Yokohama, Japonia^[2]
• Honolulu, Havayi, Usa^[3]
• Los Angeles, Kalifornia, Usa^[2]
• Busan, Sud-Korea^[2]
• Shanghai, PR Chinia^[4]