Lionel Messi

Con nacionalidade arxentina e un mínimo de dous anos de residencia en España, Lionel Messi cumpría os requisitos esixidos pola lei para obter a dobre nacionalidade hispano-arxentina, que adquiriu en 2005. En 2007 quedou segundo na votación do FIFA World Player e terceiro na elección do Balón de Ouro. En 2008 foi campión de fútbol nos Xogos Olímpicos de 2008 coa súa selección, quedando esta vez en 2º posto na elección do Balón de Ouro e do FIFA World Player. En 2009 foi designado como Balón de Ouro, éxito que repetiu no 2010, 2011, 2012 e 2015.

Ao inicio da tempada 2006/2007 Messi fixo goles moi importantes, como o do 27 de setembro fronte ao Werder Bremen, no segundo partido da fase de grupos da Champions league: a un minuto do final do tempo regulamentario, Messi materializou o empate. Mais, desgraciadamente, o 12 de novembro fronte ao Real Zaragoza sufriu unha lesión no quinto metatarsiano que o deixou fóra do equipo de Frank Rijkaard e dos terreos de xogo durante varios meses.

Xa recuperado da súa lesión, volveu ás canchas o 11 de febreiro, e o 10 de marzo de 2007 converteuse no heroe da xornada ao completar un hat-trick no empate 3-3 ante o Real Madrid, disputado no Camp Nou. Co Barcelona sempre debaixo no marcador, Messi logrou a igualdade no minuto 90. Dende había doce anos ningún xogador marcaba tres goles no Clásico español (o último fora Iván Zamorano nun 5-0 para o Madrid) e trece dende que non o facía un xogador do Barcelona (Romário nun 5-0 para o Barça).

A tempada seguiu adiante e o Barcelona non conseguiu ningún título, porén sería a mellor tempada de Messi até ese momento xa que ficou marcada polo seu famoso gol na Copa do Rei ante o Getafe CF, comparado co Gol do Século de Diego Armando Maradona. Poucos días despois de que finalizase a competición ligueira, Messi foi elixido Mellor Xogador Iberoamericano da Liga Española.

A tempada 2007/2008 seguiu adiante e o FC Barcelona non gañou título ningún, aínda que estivo moi preto de logralo, chegando a semifinais na Copa do Rei e na Liga de Campións. Porén, a tempada quedou marcada pola boa actuación do arxentino, que marcou mais de 10 goles na liga regular, 6 en champions e fixo unha boa actuación na Copa do Rei.

 

Lionel Messi debutou na selección sub-20 da Arxentina en xuño de 2004, nun amigábel contra Paraguai. En xuño de 2005 gañou a Copa Mundial Sub-20, sendo o Bota de Ouro da competición con 6 goles e o Balón de Ouro como mellor xogador do Mundial.

Tras o seu impresionante Mundial sub-20, Messi foi convocado polo seleccionador arxentino José Pekerman para debutar coa selección absoluta. Fronte a Hungría, o 17 de agosto de 2005, saíu ao campo no minuto 63 e tan só 47 segundos despois foi expulsado polo árbitro Markus Merk tras agarrarse co defensor húngaro Vilmos Vanczák, nun fallo moi polémico.

Posteriormente debutou na Copa Mundial de Alemaña en 2006 no segundo partido de Arxentina, ante Serbia e Montenegro. Arxentina chegou ata os cuartos de final e o xogador disputou tres partidos e marcou 1 gol. Tamén participou nos Xogos Olímpicos de 2008, en Pequín, nos que Arxentina gañou a medalla de ouro.

En 2010, participou en Suráfrica na súa segunda Copa do Mundo, na que Arxentina foi eliminada novamente nos cuartos de final. Leo Messi xogou cinco partidos e non marcou ningún gol.

 

(*) Incluíndo a Selección

• Sitio oficial do xogador (en castelán)
• Ficha de Messi no sitio oficial do Barcelona (en castelán)
• Ficha de datos no sitio da Asociación do Fútbol Arxentino Arquivado 16 de maio de 2010 en Wayback Machine. (en castelán)