Tomeza, Pontevedra

Tomeza
Igrexa de San Pedro de Tomeza.
Concello	Pontevedra[1]
Provincia	Pontevedra
Coordenadas	42°24′08″N 8°37′32″O / 42.40222222, -8.62555556
Área	4,23 km²
Poboación	1.000 hab. (2017)
Densidade	236,41 hab./km²
Entidades de poboación	11[1]
[ editar datos en Wikidata ]

San Pedro de Tomeza é unha parroquia situada no suroeste do concello de Pontevedra. Segundo o padrón municipal de 2017 tiña 1000 habitantes (472 homes e 528 mulleres), 104 menos ca en 1999. Ten once entidades de poboación.

Limita coas parroquias de Salcedo, Marcón, Mourente e A Canicouva, á que pertenceu cando era concello de seu. A parroquia está atravesada pola ruta portuguesa do camiño de Santiago, que transcorre paralela ao río dos Gafos.

No seu momento pertenceu ao concello de Mourente.

A ermida de San Cibrán está situada no monte do mesmo nome. O luns de Pascua celébrase unha romaría na honra do santo. Segundo a tradición, para afastar o meigallo cómpre dar sete voltas á capela tirando sete pedras no seu tellado. No templo hai unha imaxe da Virxe da Peregrina.

As festas parroquiais de San Pedro celébranse o 28 e 29 de xuño no lugar de Lusquiños.

A parroquia é terra de canteiros. O mestre Daniel, célebre canteiro de Tomeza, autor entre outras pezas das escaleiras da Casa do Concello de Pontevedra ^{[Cómpre referencia]}.

O primeiro domingo de agosto celébrase a Festa do Canteiro, homenaxeando cada ano o labor dun escultor da pedra. Entre outros, un dos homenaxeados foi Sebastián Casalderrey, autor da imaxe da Virxe da Peregrina do Albergue dos Peregrinos e das figuras representadas na fonte da praza de Compostela, en Pontevedra.

• 
  Capela de San Cibrán.
• 
  Monumento aos canteiros.
• 
  Lavadoiro.

• Lugares de Pontevedra