Luigi Giorgi (1848-1912)

Luigi Giorgi
Nome orixinal	Raffaele Evaristo Luigi Giorgi
Biografía
Nacemento	1848; Lucca, Toscana; Italia
Morte	24 de agosto de 1912; Roma; Italia
Educación	Academia de Belas Artes de Lucca.
Q89547790	Moedas de Vítor Manuel III.
Actividade
Ocupación	Deseñador e gravador de Medallas e moedas.

Para outras persoas chamadas igual, véxase a páxina de homónimos Luigi Giorgi

Non confundir con Luigi Giorgi (1880-1954), gravador xefe da Ceca de Tianjin, na China.

Luigi Giorgi, nado en Lucca, Toscana, en 1848 e finado en Roma o 24 de agosto de 1912,^[1] foi un ourive, escultor, medallista e deseñador e gravador de moeda italiano, que ocupou o posto de gravador xefe da Casa da Moeda de Roma.

Traxectoria

Primeiros anos e formación

Raffaele Evaristo Luigi Giorgi, nado en Lucca en 1848, era fillo de Paolo Giorgi, un ourive cicelador que se viu obrigado a emigrar ao Brasil, de onde nunca regresou, polo que quedou ao coidado unicamente da súa nai.^[2]

A súa primeira infancia estivo marcada por tres sucesos desgraciados: sendo aínda un bebé, a varíola que padeceu deixoulle unha deficiencia visual; pouco despois, un incidente cunha carruaxe fixo que perdese o seu ollo esquerdo; e finalmente, ficou orfo de nai cando el tiña só sete anos, como resultado da epidemia de cólera do inverno de 1855-1856, polo que, xunto cos seus tres irmáns, acabou ingresando na Pía Casa de Beneficencia de Lucca.^[2]^[3]^[4]

Nese período asistiu a unha escola mutua en Lucca, onde aprendeu o oficio de paraugueiro e amosou aptitudes para o debuxo. Aos 17 anos abandonou a institución benéfica para vivir co seu irmán maior. Comezou entón a acudir á Academia de Belas Artes de Lucca, ao tempo que traballaba como aprendiz nun obradoiro de ourivaría.^[2]^[3]^[4]

En 1866 intentou alistarse como voluntario partidario de Garibaldi, aínda que non puido conseguilo por mor das súas limitacións visuais, e sendo aínda menor de idade, casou con Cesira Fannucchi.^[2]

Madureza artística

Medalla do Centenario da Universidade de Boloña (1888).

Giorgi deixou o obradoiro onde traballaba como aprendiz e estableceu un propio, onde produciu obxectos de ourivaría e gravado como xoias, custodias e matrices para selos, así como as súas primeiras medallas.^[2]

Condecoración da Campaña de Libia (1913).

A sona que foi collendo como artista levouno a trasladarse a Florencia, a onde foi chamado en 1882 para participar nas honras a Giuseppe Garibaldi co gallo do seu pasamento. Nesta cidade instalou un novo estudio, perfeccionou a súa técnica de gravado e especializouse na arte da medalla, na que acadou un gran recoñecemento,^[2] sobre todo como retratista.^[4] A esta época corresponden medallas tan sobranceiras como a da visita de Vitoria de Inglaterra a Florencia, a do Centenario da Universidade de Boloña, a da morte de Humberto I, a conmemorativa da fin das obras de Santa Maria del Fiore e outras dedicadas a personaxes históricos como Amerigo Vespucci, Dante Alighieri ou Giuseppe Verdi, así como condecoracións.^[5]^[6] A gran produción de Giorgi entre a fin do século XIX e o principio do XX converteuno nun dos gravadores máis recoñecidos de todo o Reino de Italia.^[2]

Nos seus traballos, Luigi Giorgi inscribiu, a modo de marca de gravador, diversas iniciais; as utilizadas adoito foron as seguintes: LGI, LGIORGI e L. GIORGI.^[2]

Gravador xefe da Real Casa da Moeda

En 1906 participou no concurso para ocupar o posto de gravador xefe da Real Casa da Moeda de Roma, do que resultou gañador, polo que sucedeu no posto a Filippo Speranza (1839-1903).^[5] Do mesmo xeito, o ano seguinte, ao se inaugurar a Escola de Arte da Medalla na casa da moeda, foi elixido como un dos seus profesores e exerceu tamén como o primeiro director da institución.^[2]

Na Real Casa da Moeda ocupouse do deseño e o gravado de toda a serie monetaria italiana emitida a nome de Vítor Manuel III a partir de 1908, incluídas as moedas da Somalia italiana, desde 1909.^[2]^[3]^[4]^[7]