Julie Walters

Julie Walters

Biografía
Nacemento	(en) Julia Mary Walters 22 de febreiro de 1950 (74 anos) Edgbaston, Reino Unido (en)
Residencia	Plaistow (en)
Educación	Universidade Metropolitana de Manchester St Paul's School for Girls (en) Escola de Teatro de Manchester
Actividade
Ocupación	actriz, escritora, actriz de cinema, actriz de teatro, humorista
Período de actividade	1972 - 2020
Premios
Premio Laurence Olivier  premios Empire  BAFTA á mellor actriz  Premio Globo de Ouro  Comandante da Orde do Imperio Británico  Dama comandante da Orde do Imperio británico

Dame Julia Mary Walters, CBE, nada en Birmingham o 22 de febreiro de 1950, é unha actriz e novelista británica, dúas veces candidata ao Óscar e seis veces gañadora do premio da BAFTA, en cinema e televisión.^[1]

Julia Mary Walters naceu no St Chad's Hospital^[2] na zona de Edgbaston de Birmingham,^[3] filla de Mary Bridget, carteira descendente de irlandeses, e de Thomas Walters, construtor e decorador. Walters asistiu á Holly Lodge Grammar School para rapzas de Smethwick en Holly Lane, aínda que a expulsaron debido ao seu mal comportamento. Preparouse para ser enfermeira no Hospital Queen Elizabeth de Birmingham, despois de traballar dezaoito meses.^[4] O seu primeiro mozo marchou a Manchester para estudar socioloxía e, pouco despois Walters decidiu renunciar á súa carreira como enfermeira para converterse en actriz e vivir con el en Manchester, onde estudou na English and Drama at Manchester Polytechnic con bos resultados. Alí tivo de compañeiro o actor Pete Postlethwaite. Nunha entrevista con Alison Oddey, Walters dixo sobre a súa escolaridade:

Eu nunca ía ser universitaria, polo que a miña nai me suxeriu que tratase o ensino ou a enfermaría [...] Pedíronme que abandonase a escola, e eu pensei que era o mellor.^[5]

Walters comezou a facerse famosa como compañeira ocasional da cómica Victoria Wood, que coñeceu en Manchester. Primeiro traballaron no espectáculo de revista In At The Death (1978), á que seguiu a adaptación televisiva de Wood interpretando a Talent. Despois pasaron a aparecer na súa propia serie de televisión para o canal Granada Television, Wood and Walters, en 1982. Durante os seguintes anos volveron a traballar xuntas en varias ocasións.

Despois de debutar nos escenarios londinienses con Educating Rita, Walters traballou no circuíto de teatro rexional (incluído o Everyman Theatre de Liverpool), na comedia de situación e no cabaré. O seu primeiro papel de televisón serio foi no clásico Boys from the Blackstuff en 1982, e posteriormente entrou no cinema cunha candidatura ao Óscar, un BAFTA á mellor actriz e un Globo de Ouro pola súa interpretación na adaptación cinematográfica do éxito do West End Educating Rita (1983), onde compartiu protagonismo con Michael Caine. En 1991 protagonizou con Liza Minnelli Stepping Out,^[6] que incluía contribucións no guión de Victoria Wood e Alan Bennett.

Walters gañou numerosos premios e foi nomeada Oficial da Orde do Imperio Británico (OBE) en 1999 e Comandante da Orde do Imperio Británico (CBE) en 2008 polos seus servizos ao drama. En 2001, gañou un premio Olivier pola súa participación en All My Sons, de Arthur Miller. Walters recibiu a súa segunda candidatura ao Óscar e un novo premio da BAFTA polo seu papel de profesora de ballet en Billy Elliot (2000). En 2002, gañou o premio da BAFTA á mellor actriz de televisión pola súa interpretación da nai de Paul Reiser en My Beautiful Son (2001).

Ademais interpretou a Molly Weasley na serie de filmes sobre Harry Potter, que se converteron nun grande éxito de público.

En 2006, Walters quedou cuarta nunha enquisa de ITV dun total de cincuenta estrelas. Ese mesmo ano interpretou o papel principal na produción para ITV Driving Lessons xunto con Rupert Grint (que interpretou o seu fillo nos filmes de Harry Potter). Despois obtivo o papel protagonista na adaptación da BBC de The Ruby in the Smoke, de Phillip Pullman. No verán de 2006 publicou a súa primeira novela, Maggie's Tree.^[7]

En 2008 apareceu na comedia Mamma Mia!, o seu segundo gran papel musical despois de Acorn Antiques. Tamén interpretou a Mary Whitehouse na produción da BBC The Mary Whitehouse Story, inspirada na vida real da coñecida activista británica.^[8]

A relación de Walters con Grant Roffey, axente da Automobile Association (AA), comezou de forma turbulenta. A parella tivo unha filla, Maisie Mae Roffey, nada Westminster en 1988, mais non casaron ata 1997, cando marcharon a Nova York. A parella vive nunha granxa orgánica dirixida por Roffey preto Plaistow (West Sussex).^[9]

O 4 de agosto de 2008 revelouse que cando era nova, Walters e outras tres rapazas foron secuestradas por un descoñecido que abusou sexualmente delas: «Intentou meternos nunha casa en ruínas, e tocoume [dixo ela]. Foi un signo de asalto sexual». Walters fala detalladamente do que ocorreu na súa autobiografía That's Another Story.

Walters foi diagnosticada con cancro de intestino en fase III en 2018. Tras ser sometida a cirurxía e quimioterapia entrou en remisión. Porén, a súa recuperación supuxo que fose eliminada dalgunhas escenas de The Secret Garden e que non puidese asistir á estrea de Mamma Mia! Here We Go Again.^[10]

Wikimedia Commons ten máis contidos multimedia na categoría:  Julie Walters

• Páxina web de Julie WaltersArquivado 25 de maio de 2021 en Wayback Machine.
• A Conversation with Julie Walters – interactive video interview presented by BFI Screenonline and British Telecom
• Walters named as CBE