Du Mu

Du Mu (杜牧)

Biografía
Nacemento	803 Chang'an
Morte	852 Chang'an
Lugar de sepultura	Wannian (en)
País de nacionalidade	Chinesa
Grupo étnico	Han
Actividade
Ocupación	Funcionario, calígrafo, poeta
Familia
Familia	Du clan of Jingzhao (en)
Fillos	Du Dexiang, Du Huici, Du Chengze, Du Xunhe
Pai	Du Congyu
Parentes	Du You
Descrito pola fonte	Wanxiaotang Huazhuan (en) Obálky knih,

Este artigo amosa escritos chineses. Sen o soporte axeitado, o texto pode mostrar símbolos sen sentido, coma caixas, marcas e outros.

Du Mu (chinés tradicional e simplificado: 杜牧, pinyin: Dù Mù; Wade-Giles: Tu⁴ Mu⁴), nado en Chang'an (actual Xi'an) no ano 803 e finado na mesma cidade no 852, foi un calígrafo, poeta e político chinés de finais da dinastía Tang. O seu nome de cortesía era Muzhi 牧之, e o seu nome artístico Fan Chuan 樊川. A miúdo inspirado por cortesás, servíase da Historia para falar da súa época. Foi especialmente recoñecido polos seus cuartetos líricos e románticos.

Considerado un dos máis grandes poetas da época dourada da poesía chinesa, o seu nome adoita aparecer xunto co de Li Shangyin; así, eran alcumados "Os pequenos Li e Du" (Xiao Li Du 小李杜), en referencia aos célebres Li Bai e Du Fu. Entre as súas influencias, atópanse os xa mencionados Li Bai e Du Fu, así como Han Yu e Liu Zongyuan.

Du Mu naceu na capital dos Tang, Chang'an (actual Xi'an), nunha familia aristócrata en decadencia, o clan Jingzhao Du. O seu avó foi Du You, un ministro da corte e compilador da enciclopedia Tongdian 通典. Aprobou o exame de jinshi no 827, aos vinte e cinco anos, comezando a súa carreira como burócrata nunha serie de postos de rango inferior.^[1] Unha destas ocupacións foi a de editor. Despois, traballou co comisionado Shen Chuanshi, primeiro en Hongzhou e, uns anos máis tarde, en Xuanzhou.^[2] No 833, foi enviado a Yangzhou con Niu Sengru. Alí, empezou a madurar como poeta. No 835, concedéuselle o cargo de censor e regresou á capital. Máis tarde, pediu traslado a Luoyang, posiblemente por temor a verse involucrado nunha disputa relativa ao seu amigo Li Gan. Isto evitoulle a purga que ocorreu ao ano seguinte.^[2]

O poeta tivo moitos postos oficiais en varias localidade, mais nunca acadou o alto rango, quizais a causa dos seus inimigos. No 837, volveu a Yangzhou para coidar do seu irmán menor, Du Yi, que quedou cego a causa dunha enfermidade. A continuación, trasladouse a Xuanzhou co seu irmán. No 838, foi nomeado Rectificador de Omisións da Esquerda e Compilador da Oficina de Historia na capital. No 840, foi ascendido a vicedirector da Oficina de Restauración e, ao ano seguinte, a vicedirector da Xunta de revisión. No 842 foi gobernador de diversas prefecturas rurais, como Huangzhou, Chizhou e Muzhou. Du Mu estaba descontento con estes postos, e culpaba ao político Li Deyu pola súa situación. Sentindo que a súa carreira era un fracaso, escribiu varios poemas expresando a súa insatisfacción.^[2]

No 848 regresou novamente a Chang'an ao recibir o título de vicedirector de Títulos de Mérito. No 849, foi trasladado ao Ministerio de Persoal, e no 850 foi gobernador de Huzhou, a petición propia. No 851 volveu á capital para desempeñar diferentes postos administrativos, até a súa morte no inverno do ano seguinte, por unha enfermidade.

Du Mu dominou os xéneros do shi, o fu e mais a prosa chinesa antiga. É máis recoñecido polos seus cuartetos románticos e líricos, que adoitan referenciar lugares históricos ou situacións amorosas. Entre os seus temas máis comúns, están a separación, a decadencia ou a impermanencia. O seu estilo mestura imaxes e dicción clásicas con xustaposicións insólitas, coloquialismos e xogos de palabras. Tamén escribiu longos poemas narrativos.

Un dos seus poemas máis famosos é Qing lai 清来 ("A festividade de Qingming"), dedicado a esta festa chinesa na que se conmemora aos mortos visitando os cemiterios.

Outro poema célebre de Du Mu é Qiu xi 秋夕 ("Unha tarde de outono"), que conta a historia dunha solitaria concubina cuxo abano perdeu o seu propósito coa fin do verán. Considérase unha alegoría das frustracións do poeta polo declive familiar.^[3] O pastor e a tecedora que figuran no poema son unha referencia á historia de dous amantes que só poden verse unha vez ao ano, que nomean ás estrelas Altair e Vega. Trátase dunha narración moi coñecida da mitoloxía chinesa.

Du Mu escribiu un comentario sobre A arte da guerra de Sunzi, xunto con varias cartas de consello a altos oficiais.^[4] Consérvase unha compilación das súas pezas en prosa en vinte libros, baixo o título de Fan chuan wen ji 樊川文集 ("Obras completas de Fan Chuan").^[4]

No 1968, Roger Waters (Pink Floyd) usou varios versos de Du Mu na canción "Set the Controls for the Heart of the Sun", do disco A Saucerful of Secrets.

1. ↑ "Du Mu". web.archive.org. 2011-05-15. Archived from the original on 15 de maio de 2011. Consultado o 2024-01-16. 
2. ↑ ^{2,0 2,1 2,2} Owen, Stephen (2006). The Late Tang: Chinese Poetry of the Mid-Ninth Century (827-860) (en inglés). Harvard University Asia Center. ISBN 978-0-674-03328-3. 
3. ↑ Pine, Red, ed. (2003). Poems of the Masters: China's Classic Anthology of T'ang and Sung Dynasty Verse (en inglés). Copper Canyon Press. ISBN 9781556591952. 
4. ↑ ^{4,0 4,1} 小項目事典,百科事典マイペディア,世界大百科事典内言及, 精選版 日本国語大辞典,デジタル大辞泉,日本大百科全書(ニッポニカ),改訂新版 世界大百科事典,ブリタニカ国際大百科事典. "杜牧(とぼく)とは？ 意味や使い方". コトバンク (en xaponés). Consultado o 2024-01-16. 

• Du Mu (La literatura china traducida en España)