Corrina

A corrina ^[1][2][3] é un composto heterocíclico formado por catro grupos pirrol reducidos total ou parcialmente (ver tetrapirrol). Dous dos seus pirrois reducidos están unidos por enlace directo entre os seus carbonos, e os demais únense por un =CH- ^[4]. É o macrociclo básico do que se obtén o derivado substituído que se encontra na vitamina B₁₂.^[5] Os compostos baseados no anel de corrina denomínanse corrinoides.

Ao desprotonarse, o anel corrinoide pode unirse ao cobalto. Na vitamina B₁₂, o complexo resultante tamén presenta un ligando derivado do bencimidazol, e o sexto sitio do octaedro serve como centro catalítico.

O anel de corrina é moi semellante ao de porfirina, o cal aparece na hemoglobina. Ambos os dous constan de catro subunidades tipo pirrol (tetrapirrol) unidas formando un anel. A diferenza das porfirinas, as corrinas carecen dun dos grupos =CH- que unen as unidades de tipo pirrólico. Así, o anel interno de corrina ten 15 átomos, entanto que o de porfirina ten 16. Debido ao gran número de centros de carbonos sp³, as corrinas son máis flexibles ca as porfirinas e non son tan planas. Non teñen un carácter completamente conxugado (sucesión de enlaces dobres e sinxelos) arredor de todo o anel, senón que se di que o anel ten unha conxugación de "3/4".

Un corrol (octadeshidrocorrina) é un derivado completamente aromático da corrina.

• IUPAC Nomenclatura dos Tetrapirrois.