I Guerra Mundial

La Primel Guerra Mundial hue una guerra ena que runchun abondus paisis. Ocurrió en deferentis partis del mundu, asinque se llamó guerra mundial. Conduró endi 1914 hata 1918. Tamién hue llamá La Gran Guerra i La Guerra p'acabihal tolas guerras. 135 paisis participun ena guerra.

La Primel Guerra Mundial hue la primel guerra ondi ubun tanquis i una e las primeras ondi se gastun de avionis i górvunsi mu emportantis. Tamién gastosi dunos barcus que diban pombahu el áugua, hucheaus sumarinus.

La guerra encetó aluspués el Archiduqui Fernandu d'Áustria, quien p'abonda henti sedrie Rei d'Áustria, hue estirancau pol Gavrilo Princip, un membru duna balburda terrorista sérbiu. Estu acaeció en Sarajevu, uguañoti en Bósnia Ercegovina. Peru áin algotras radonis polas qu'encetó.

Los paisis d'Uropa huerun suzalachaus en dos hadis. Eran argu asina cumu un hadi e collácius que se comprometun a ayualsi si angunu huesi atacau. Si un pais era atacau pol angún enemigu, los sus collácius eberien uñilsi ena guerra entri los dos. Pol mé destus alcuerdus, cuantis c'un pais huesi atacau, tolos paisis uropeus tomarien parti e la Gran Guerra.

Iban dos hadis: los Aliaus i los Pueris Centralis. Los Aliaus era Rússia, Fráncia i Gran Bretaña; i aluspués Itália i los Estaus Unius s'apellun a ellus. Los Pueris Centralis era Áustria-Ungria, Alemaña i el Empériu Otomanu.

Nel pais d'Áustria-Ungria, vivian abonda henti que palraban deferentis luengas. Nel sul, desistia una balburda henti llamás eslavus que palraban luengas mu autás. Muchus dellus cavilaban que eberien vivil huntus nun pais colos de huera e Áustria-Ungria, en Montenegru i Sérbia. Una destas partis eslavas hue Bósnia. La radón pola c'a los eslavus les petaba sel parti e Sérbia era que Bósnia iba siu parti d'Áustria-Ungria duranti una mihina d'añus. Sérbia i Bósnia huerun andinantis parti dun país mayol, Turquia. Peru Sérbia gorviosi un pais própiu, mentris Bósnia, en cámbeu, era parti e Áustria-Ungria. Estu pusu rabiñosus a mucha henti en Bósnia, especialmenti a los eslavus. Un balburda chiquenina e eslavus nuevinus que vivian en Bósnia pensun que los eslavus del sul 'eberien matal pa puel vivil huntus nun país - huerun terroristas. Se llamaban a sí mesmus "Hovin Bósnia". Una balburda e Sérbia hucheá la Manu Negra los apuchó.

Antoci, el Archiduqui Hernandu d'Áustria, vinu pa Sarajevo, la ciá más emportanti e Bósnia. El pairi de Hernandu era el elmanu el Emperaol. Pa la mayoría la henti en Áustria-Ungria, que sedrie emperaol en lugal del su tiu. Los eslavus nuevinus de la 'Hovin Bósnia' los estirancun. Hernandu estaba nel su cochi, cuandu Gavrilo Princip s'entrepusu. Disparó i mató tantu a Hernandu cumu a la su muhel, el 28 e Húniu de 1914.

El gobielnu austru-úngaru ihu qu'esti hue un asesinatu repunanti. Acusun a Sérbia, pus la su henti iban ayuau a la 'Hovin Bósnia'. Piiun a Sérbia que estuviera dalcuerdu con abondus miias pa detenel asesinatus cumu esi. El gobielnu sérbiu estaba dalcuerdu cola mayoria, peru ihu qu'iba una que nu puerien acetal, polque ellus eran un pais deferenti. Esta era que s'afechasin tolos perióicus. Los austriacus querian que apucharan tolas condicionis. Alemaña era colláciu de Áustria-Ungria, asinque los apuchun.

Sérbia nu afechó los sus perióicus i Áustria-Ungria gastó destu cumu escusa pa prencipial una guerra escontra Sérbia polque cumu pasó con Bósnia andinantis, querian el territóriu sérbiu. Rúsia estaba el lau sérbiu i el Zal (el rei de Rúsia) pusu en movición al ehércitu rusu. El Kaiser (prencipal derihenti alemán), pusu en movición a su armá tamién, polque quería ayual a Áustria-Ungria, i combatil a Rúsia. Alemaña sabía que Fráncia apuchaba a Rúsia i que Fráncia l'ayuaríe nuna guerra, asinque mesmaenti declaró la guerra a Fráncia.

La radón pola que Alemaña declaró la guerra a Fráncia i Rúsia tan aina, hue polque barruntaban que puerien ganal la guerra si atacaban en primel lugal. Hidun la movición mu liheru. Tinian un listau de tolos ombris que s'iban uñiu al ehércitu, pandi esus ombris eberien dil i las vedis que cá tren enhilarie a esus ombris pandi tuvieran que runchal. Fráncia hidu lo mesmu, peru nu puu sel tan liheru.

Rúsia tinia un gran ehércitu, peru tomarie abondu tiempu hadel la movición de la su trupi andinantis d'atacal Alemaña. Los alemanis atacun Fráncia aina, metris Rúsia nu estaba aprepará. Estaban acagazaus de que si asperaban pa palral con Rúsia i Fráncia pa landeal la pas, antoci Rúsia ya estarie aprepará p'atacal i Alemaña nu tendrie tiempu pa derrotal a los dos paisis a la vedi.

Agañu Alemaña estuvu en guerra con Fráncia, indirgó la su trupi i tomó París aina pa ganal la guerra. Los alemanis barruntaban que puerien hadelu denuevu facilmenti. Estu avelgüenzó a Fráncia i asperaba vengalsi de los alemanis.

Rússia estaba rabiñosa con Alemaña pus los alemanis unta los sus collácius estaban a la escontra los eslavus, que estaban aliaus colos rusus. A Alemaña le petaba el territóriu rusu arreol Mari Bálticu, qu'iba preteneciu a Alemaña duranti abondu tiempu i los rusus estaban desemprentaus de c'Alemaña les arrepañasi partis del su territóriu qu'eran mu ricas. Los alemanis pensaban que los rusus estaban a la escontra del su Zal i el ehércitu nu era muelnu comparándulu col alemán.

Inque era aliau de Fráncia i Rúsia, Gran Bretaña nu entró ena guerra aina, peru sí que hue deque Alemaña atacó al su emportanti colláciu Bélhica pa consiguil Fráncia. Gran Bretaña tinia un pahu empériu i estaba acagazau de c'Alemaña arrepañasi las coloñas fracesas, se gorviesi más puerosa i cuaharingasi un empériu entovia mayol. Gran Bretaña tamién estaba a téncias del crecimientu el puel milital d'Alemaña polque el predomiñu británicu iba siu total hata antoci pol su númiru de balcus i su mayol ehércitu. Los alemanis, mu liherus, cuaharingun balcus, los apellun pal su ehélcitu i llegun a sel tan puerosus cumu Gran Bretaña.

Dambus dos paisis, endigual que Rúsia i Fráncia cuaharingun las sus navis i los sus ehércitus pa sel los mehoris endenantis la guerra nun chascu hucheau "carrera almamentística. El rei de Gran Bretaña, el Zal de Rúsia i el Kaiser d'Alemaña ("Tsar" i "Kaiser" dambus dos senifican "emperaol" i ahorran del nombri e Húliu Cesa) eran tós familiaris (primus) peru estu nu ayuó en asolutu.

Turquia entró ena guerra polque iba descuadrilau abondu del su empériu andinantis la guerra i queria arrecuperalu. Odiaba a Sérbia polque s'endependizó de Tulquia i arrepañó territóriu tulcu. Deque Áustria hue pala guerra a la escontra Sérbia, Tulquia tamién lo hidu.

Grécia entró ena guerra polque era aliau de Sérbia duranti muchu tiempu. Serbia i Grécia górvunsi libris endispués que iban pretenecius a Tulquia duranti cientus d'añus. Peru abondus griegus vivian entovia en territóriu tulcu c'audechaban pretenecel a Grécia. Los griegus querian especialmenti la su emportanti ciá de patrás de Costantinopla (huchea Estambul uguañoti). Pol mé destu Grécia declaró la guerra a Tulquia.

Bulgária, cumu Grécia i Sérbia, pretenecia a Tulquia endenantis, s'endependizó i arrepañó abondu territóriu tulcu. Peru los griegus i los serbius se sintun ofendius polque los búlgarus tomun tierras de dambus dos. Los sérbius i griegus envadun parti e Bulgária, lo que le pusu rabiñosu i le hidu aliau del su enemigu de patrás, Tulquia.

Itália estaba al lau d'Alemaña i Áustria-Ungria en primel lugal, peru cambeó deque barruntun c'Áustria-Ungria arrepañarie tierras nel norti e Itália cumu iba hechu endenantis.

Rumania era colláciu de Rúsia i enemigu e Bulgária, asinque s'assitiarun nel Hadi Aliau.

Pa muchus, que sedrie una guerra brevi. Barruntaban que las trupis se muverien liherus p'atacalsi unus a algotrus i puerien estirancal al rival sin abondas bahas. Pensaban que la guerra sedrie al tentu soldaus valientis i nu sabian lo qu'era enverá. Namás p'angunus cumu Lord Kitchener, la guerra sedrie larga.

Los heneralis alemanis iban decidiu que la mehol horma pa derrotal a Fráncia era pasal pol Bélhica. Puerien antoci atacal a los francesis pol norti i el sul a la vedi. Los alemanis huerun pa Bélhica el 4 d'Agostu. Nel mesmu dia, Gran Bretaña encetó la guerra a la escontra Alemaña, polque era aliau de Bélhica. Los británicus iban alvertiu en 1839 que nu eharien que naidi envadiesi Bélhica i mantuvun la su promesa.

Deque los alemanis tomun la ciá belga e Lieha, los belgas runchun huertienti p'atollalus enantis de los alemanis entral ena ciá. Estus amenalmenti hundun pa huera la ciá a los belgas, peru les llevó más tiempu de lo qu'iban praneau. Antoci los alemanis atacun el norti el ehércitu francés. Estus colos británicus enhilun los sus ombris pa runchal colos alemanis. Estu hue posibri pol mé el tiempu que los belgas mantuvun acupaus a los alemanis en Lieha. Nu estanti Alemaña arrempuhu patrás a los francesis i británicus hata que huerun atollaus nel riu Marne.

Ena runcha, abondus ombris esperezun. Las metralletas huerun mu curpabris pus disparaban balas cumu si lloviera. Asinque pa defendelsi tuvun que zachal auherus. Los auherus s'apellaban hormandu trincheras, de mó i maea que diban endi Suiza hata el Mari el Norti. Enfrenti las trincheras, iban alambrás que cuertaban cualisquiel que tratasi subilas i minas qu'estempanaban al que corriesi pola zona hucheá "tierra e naidi" qu'iba entri las trincheras.

Nel esti, los rusus iban atacau a los alemanis. Estus huerun arrempuhaus peru los alemanis venzun ena Batalla e Tannenburg. Antoci tól mundu nel esti zachun trincheras, cumu nel oesti.

Nel dia de Naviá de 1914, abondus soldaus nu quisun runchal. Cantun cancionis de Naviá i en angunus lugaris del lindi oesti, salun de las trincheras i se daban las manus unus a algotrus. Tamién huegun furbol. Desta maea, alsotru dia a muchus nu les petaba runchal tapocu. Los heneralis s'acagazun i lo detuvun.

Las metralletas, las trincheras i las minas hidun mu enteosu atacal. Los heneralis nu lo entendian i, a pesal destu, ordenaban atacal. Ena Batalla del Somme en 1916 abondus británicus esperezun nun dia namás. Hue el dia mas sangrientu ena estória del ehércitu británicu.

En 1917, encetó una revolución en Rúsia. El Zal tuvu que ehal de selu i dal el puel pal puebru. Al prencípiu paecia que los rusus runcharien mas huerti agora, peru el puebru rusu nu queria runchal mas. Encetun a cohel rabiña al su gobielnu pol nu detenel la guerra. Antoci ocurrió la Revolución d'Otubri, una segundera revolución en rúsia enhilá polos comunistas, cuyas ideas ahorraban de Karl Marx. Le derihenti e la revolución i de Rúsia era Vlademir Lenin. El nuevu gobielnu ofreció la pas a los alemanis. Estus i los rusus ehun e runchal i filmun el tratau de Brest-Litovsk, el cual daba a Alemaña abondu territóriu en Uropa oriental i el Bálticu.

Los heneralis alemanis deciun gastal de sumarinus p'atacal los barcus que trasportaban papáncia i armamentu pa Gran Bretaña. Los alemanis pensaban que los americanus ayuaban a los británicus namás i nu eran nutralis. Peru angunus americanus esperezun polos sumarinus. Nesi inti, los Estaus Uñius entrun en guerra con Alemaña.

Ena primavera e 1918, los heneralis alemanis decidun atacal enantis que los soldaus americanus llegasin pa Uropa p'atacalus. Alemaña atacó duna horma nueva. Atacarien enos lugaris en que los Aliaus huesin débilis i eharien los lugaris ondi hueran huertis. Arrempuhun a los británicus i francesis en angunas zonas, peru cá vedi los alemanis huerun atollaus. Antoci los americanus llegun. Británicus, francesis i americanus huntus esmienzun a vencel a los alemanis. Estus nu puian paralus. Amenalmenti, los heneralis alviertun al su gobielnu de que la guerra tinia que paral, polque Alemaña nu puia runchal pol mas tiempu. Pidió la pas a los Aliaus i la guerra tuvu acaberu el 11 e Noviembri e 1918.

Aluspués la guerra, Alemaña tuvu c'acetal el Tratau de Versallis. Tinia que pagal $33 billonis a los venceoris. Parti el tratau idia que los paisis del mundu eberien casalsi pa hadel una organidación entrenacional pa evital las guerras entri ellus, hue hucheá la Liga e las Nacionis. El Senau de los Estaus Uñius nu estaban dalcuerdu con estu, encrusu huendu idea del Presienti americanu Woodrow Wilson. Esti trató de comencel al puebru americanu e c'acetasin, peru los EEUU enhamás s'uñun a la Liga e las Nacionis.

• En Commons ai conteníu multimedia sobre I Guerra Mundial.