UK 2014

UK 2014
Loko	Bonaero,  Argentino
Ekde	26-a de julio 2014
Ĝis	2-a de aŭgusto 2014
← Antaŭa	Sekva →
v • d • r

La 99-a Universala Kongreso (UK) de Esperanto okazis ekde la 26-a de julio ĝis la 2-a de aŭgusto 2014 en Bonaero, la ĉefurbo de Argentino. Ĝi estas la unua UK en Argentino. La estraro de UEA elektis la kongresurbon el tri argentinaj urboj sekve de surlokaj vizitoj fare de la Konstanta Kongresa Sekretario Clay Magalhães, kaj la elekto estis diskonigita la 8-an de junio 2012^[1].

Responde al la alvoko de argentinaj esperantistoj Mauricio Macri, estro de la registaro de la urbo Bonaero (urbestro), akceptis iĝi Alta Protektanto de la 99-a Universala Kongreso (UK) de Esperanto.

La kongresejo de la 99-a UK estis la hotelo Panamericano Hotels & Resort apud la Obelisko de Bonaero en la centro de la urbo. La solena inaŭguro, la malfermo kaj diversaj aliaj eventoj okazis en Teatro Metropolitan ĉe la avenuo Corrientes.

La kongresa temo de la bonaera UK en 2014 aludis al poemo de Ludoviko Lazaro Zamenhof "Ĉu la nepoj nin benos? Streboj al daŭripova estonteco". La temo estis diskutata en diversaj laborgrupoj kaj enfluis al la fina rezolucio de la kongreso.

La solena inaŭguro okazis la 27-an de julio en la Teatro Metropolitan en ĉeesto de diplomatoj (ambasadoro de Korea Respubliko, ambasadoro de Ukrainio kaj kultura ataĉeo de Svislando. Speciala gasto estis Roselyne Dewilde, praparencino de L.L. Zamenhof, vivanta en Argentino. Malferman paroladon flanke de la gastiganta urbo faris s-ro Carlo Regazzoni, subsekretario en la urba ministerio pri edukado. Dum la inaŭguro oni anoncis ke la brazila eldonisto Gersi Alfredo Bays estas elektita kiel honora membro de UEA. Post salutado de la 56 reprezentataj landoj la inaŭguro fermiĝis per la tradicia kantado de la himno.^[2]

Pro la geografia situo de Argentino la 99-a UK laŭ nombro de partoprenantoj apartenas al la plej malgrandaj universalaj kongresoj. Ĝis la limdato por anticipa aliĝo registriĝis 659 aliĝintoj el 56 landoj.^[3] Dum la kongreso aliĝis pliaj 48 personoj, tiel ke la fina nombro estis 706 kongresanoj el 57 landoj.^[4]

Pli detalaj informoj troveblas en artikolo Futbala matĉo inter la Selektitaro de Esperanto kaj la Armen-devena Argentina Komunumo.

Universala Esperanto-Asocio unuan fojon partoprenis oficialan futbalmatĉon de la NF-Konsilia (Ne-Fifa-Konsilio) kontraŭ la teamo de la argentinarmena komunumo. Komento de kongresano: "La rezulto en tiu ludo estis tute duaranga, kio gravis estis la solidareco, amikeco kaj plezuro. La esperantistoj sukcese perdis 3:8, sukcese, ĉar ili gajnis la korojn de la lokanoj." Per tiu unua oficiala ludo UEA nun akiris la rajton aktive partopreni en NF-Konsilio kaj estas la ideo, ke tia ludo fariĝos nova kongresa tradicio. La ludo okazis en la sportejo "Polideportivo Colegiales" en Bonaero la 31-an de julio 2014.^[5]

En la kongresa rezolucio, 706 partoprenantoj de la UK el 57 landoj diskutinte la kongresan temon konstatis, ke Esperanto estas aktuala fenomeno ligita al la okazanta tutmondiĝo, ke ĝi bone kongruas kun daŭripovo kaj ke daŭripovaj iniciatoj malofte atentas la lingvan flankon, pro kio Esperantistoj aparte atentu ĝin. La rezolucio plie alvokas Esperantistojn inde viciĝi inter la ceterajn pordaŭripovajn movadojn kaj nomas la valorojn necesajn por starigo de daŭripova monda socio kernaj valoroj de la Esperanto-movado, antaŭvidante ke Esperanto havos apartan sencon ĝuste en mondo, kiu konservos diversecon, pacon kaj justecon.^[4]

Dum la solena fermo estis anoncitaj la rezultoj de la belartaj konkursoj de UEA. Estis atribuitaj premioj en la kategorioj "poezio", "prozo", "eseo", teatraĵo" kaj "infanlibro de la jaro". La unua premio en la kategorio "poezio" estis atribuita al "Soneto de la lumturo" de Jesus Moinhos Pardavila el Galegio/Hispanio. La premio "infanlibro de la jaro 2013" estis atribuita al la eldonejo Grafokom, Kroatio por "Padma, la eta dancistino".^[6]

de la 99-a Universala Kongreso de Esperanto en Bonaero

Ni, 706 partoprenantoj en la 99-a Universala Kongreso de Esperanto, venintaj el 57 landoj de ĉiuj mondopartoj al Bonaero, Argentino,

Diskutinte en pluraj sesioj pri la temo Ĉu la nepoj nin benos? Streboj al daŭripova estonteco;

Konstatinte,

ke Esperanto reprezentas plene aktualan strebadon, kun evidentaj ligoj al aliaj esencaj agadoj kadre de la nuntempaj tutmondigaj tendencoj,

ke la celado al sanaj, dauripovaj socioj, bazitaj sur paco, justeco, demokratio kaj ekonomio servanta al la homoj kun respekto al la vivosubtenaj sistemoj de la naturo, kongruas al la interkultura solidareco kiu ĉiam motivis la Esperanto-movadon,

kaj ke en la diversaj aliroj al daŭripovo ofte mankas sufiĉa atento al la ligo inter la lingvaj demandoj kaj aliaj esencaj agadoj, kio donas al ni la taskon daŭre kaj pli efike labori tiukampe;

Alvokas

ĉiujn subtenantojn de Esperanto fari ĉion eblan por plenumi nian apartan rolon kiel movado por justa, konscia multlingvismo, kaj viciĝi inter la diversaj sociaj movadoj por interkultura kaj kontraŭdiskriminacia edukado, homaj rajtoj, naturprotektado, popola klerigado, rimedosparaj vivstiloj kaj aliaj;

Deklaras,

ke la valoroj necesaj al la konstruado de daŭripova monda socio estas kernaj valoroj de nia movado, ĉar mondo, en kiu Esperanto daŭre havos sencon, estos mondo, kiu ekonomie kaj ekologie, politike kaj kulture, konservas diversecon, pacon kaj justecon.

• La kongreso

• Oficiala retejo Arkivigite je 2014-05-18 per la retarkivo Wayback Machine
• UK 2014 Arkivigite je 2014-09-29 per la retarkivo Wayback Machine en la retejo de UEA
• La 99-a Universala Kongreso de Esperanto en Facebook
• Artikoloj pri UK 2014 esperante

	Universalaj Kongresoj
1905-1915 • 1920-1939 • 1940-1980 • 1981-2010
Prago 1996 • Adelaide 1997 • Montpellier 1998 • Berlino 1999 • Tel-Avivo 2000
Zagrebo 2001 • Fortalezo 2002 • Gotenburgo 2003 • Pekino 2004 • Vilno 2005
Florenco 2006 • Jokohamo 2007 • Roterdamo 2008 • Bjalistoko 2009 • Havano 2010
Kopenhago 2011 • Hanojo 2012 • Rejkjaviko 2013 • Bonaero 2014 • Lillo 2015
Nitro 2016 • Seulo 2017 • Lisbono 2018 • Lahti 2019 • kronvirusa pandemio
kronvirusa pandemio • Montrealo 2022 • Torino 2023 • Aruŝo 2024 • Brno 2025