Interpretilo

En komputado interpretilo estas programa aŭ aparata rimedo, kiu analizas komandojn aŭ frazojn de la programo kaj tuj plenumas ilin imitante la funkciadon de virtuala komputilo kies komandoj estas la frazoj de la koncerna programlingvo; ĉiu komputilo estas interpretilo por sia maŝinkodo (kontraste al tradukilo, kiu unue tradukas la tutan programmodulon en la cellingvon por nur poste ĝin ruli).

Tuja interpretilo funkcias ĝuste tiel, kiel oni kutime difinas (ankaŭ kiel estas difinite ĉi-supre): ricevinte komandon (de klavaro aŭ el komanda dosiero), ĝi tuj ĝin plenumas. Ekz-e tiel funkcias la komandlinia interpretilo.

Traduka interpretilo konsistas el tradukilo, kiu transformas la fonttekston en iun internan prezenton (ekz-e duonkodon aŭ maŝinkodon de iu fizike nehavebla komputilo), kaj proprasenca interpretilo, kiu interpretas tiun internan prezenton.