Prifysgol Denver
 | |
| Math | prifysgol ymchwil, sefydliad addysgol preifat nid-am-elw, prifysgol breifat  |
|---|---|
| Sefydlwyd |
|
| Daearyddiaeth | |
| Sir | Denver |
| Gwlad |  Unol Daleithiau America |
| Cyfesurynnau | 39.678333°N 104.962222°W |
 | |
| Sefydlwydwyd gan | United Methodist Church |
Prifysgol breifat a leolir yn Denver, Colorado, Unol Daleithiau America, yw Prifysgol Denver (Saesneg: University of Denver). Dyma'r brifysgol hynaf yn nhalaith Colorado.
Sefydlwyd Coleg Diwinyddol Colorado ym Mawrth 1864 gan John Evans, Llywodraethwr Tiriogaeth Colorado, a oedd yn fab i fewnfudwyr o Gymru. Rhodd Evans bedair llain o dir cyferbyn â'i dŷ, yn strydoedd Fourteenth ac Arapahoe yn Denver, i ddarparu safle ar gyfer campws y coleg.[1] Rheolwyd y coleg diwinyddol gan Eglwys y Methodistiaid Unedig, sydd yn dal yn gysylltiedig â Phrifysgol Denver; fodd bynnag, nid sefydliad addysg enwadol mohono. Dyrchafwyd y sefydliad yn brifysgol ym 1880, gyda statws di-dreth a'r hawl i wobrwyo graddau israddedig.[2] Ym 1890, sefydlwyd campws newydd yn ne-ddwyrain y ddinas, eto ar dir a roddwyd gan Evans, a dyna safle bresennol y brifysgol.[1] Dechreuodd Prifysgol Denver gynnig addysg i fyfyrwyr uwchraddedig ym 1891.[2]
Mae Prifysgol Denver yn cynnig cyrsiau israddedig ac uwchraddedig yn y celfyddydau a'r gwyddorau, ac mewn pynciau proffesiynol megis seicoleg, peirianneg, busnes, gwaith cymdeithasol, a'r gyfraith. Mae cyfadrannau ac chanolfannau ymchwil y brifysgol yn cynnwys yr ysgol fusnes, yr ysgol astudiaethau rhyngwladol, Ysgol Gerdd Lamont, Coleg y Menywod, Sefydliad Defnydd Tir y Mynyddoedd Creigiog, y Ganolfan Ymchwil i Fabanod a Phlentyndod, y Ganolfan Datblygu Hawliau, ac Arsyllfa Meyer-Womble a leolir ar Fynydd Evans, un o'r arsyllfeydd seryddol uchaf yn y byd.[2]
Ymhlith y cyn-fyfyrwyr nodedig o Brifysgol Denver mae'r newyddiadurwr a darlledwr Lowell Thomas, y banciwr ac economegydd David Malpass, y diplomydd ac academydd Condoleezza Rice, a'r dramodydd Neil Simon.
Cyfeiriadau
[golygu | golygu cod]- ↑ 1.0 1.1 (Saesneg) "Governor John Evans", History Colorado. Adalwyd ar 20 Tachwedd 2022.
- ↑ 2.0 2.1 2.2 (Saesneg) University of Denver. Encyclopædia Britannica. Adalwyd ar 20 Tachwedd 2022.