Dah lama dah kita tak borak-borak dih! Apa haba suma, ambo selalu mengharapkaen muma sokmo dok dalaeng sehat sejahtera.....

Museng panaeh haek dok melanda kita kho dok gi dah....Loni kho-kho dok ujan lae pulak.

Buleh kata langik dok gelaek gelemaek sokmo.Napak gayanya, pokok-pokok napak sega lae sikik, tak lae dok layu macaeng dulu-dulu, masa haek museng panaeh tuh!

Tadi, kapong ambo, kapong kita lae gak, hujan lagi..... bila panaeh teghek tiba-tiba ujan tughong, apa lagi dok di langik tu?Danung lae! heh....heh....heh.....!

Muma tahu dak natang penama tu? Setengah oghang kata pelangi, bebudak loni kata rainbow, tapi otai macaeng ambo dan oghang dulu-dulu panggei benda alah ni 'DANUNG' kuang...kuang...kuang!.

Muking oghang muda atawa jugak oghang haek lama meghato jauh tak ingat atawa juga ingat-ingat lupa pekataan tu kan? Bagi ambo ia satu sebutan yang cukok unik, cukok menawang ambo punya kelebu (kalbu).hah...nostalgia sunggoh!

Dulu kalu danung tubik (terbit) oghang tak bagi tunjok, takok jaghi tangan jadi ceding letek jey! Ambo ingat lagi kalu ada danung, mucung jey mulok dok tunjuk, nak tunjuk dengan jaghi tak buleh deh! Denga gak ceghita kata danung ni tughong minug ai di belakang bukik, danung minung ai dalam batil mas. Wah!cukok hebat ceghita ghoyat oghang tua dulu. Sapa-sapa beghani gi lae caghi batil mas tu. Gerenti jadi kaya punya, Tapi seingat ambo tak dak sokghang pong haek beghani gi caghi batil mas danung ni.....Tak kaya pong takpa lae kok dih!

Bagi ambo, ambo sangat suka tengok danung ni. Molek sunggoh pada ambo! Tu lae sebahagian daghi kenangan ambo masa kecik-kecik dulu.

Ambo begheti di sini dih, haghi laing kita borak-borak lagi........ wasalam.

Wah...wah...wah.... lama bena kita tak bejupa. Ambo haghap muma suma dok sehaek sokmo. Ambo kae dok lagu tu lae juga. Kadang ghasa sehaek, kadang tu ghasa sue badan. Oghyang tua lae dih.Walo apa pong ambo bersyukur pada Yang maha Berkuasa paksae sapey loni ambo tetaek macam ni, hepi, banyak sehat daghi sakik, selegha makan sokmo tak beghubah.......heh...heh....heh.........

Natang pa nak begebang ngan muma hah? Dok meghipuk banyak dah, haaaa.... ambo ghoyaek lagu ni lae... jeng...jeng...jeng..... Nak denga dak?

Ambo dulu, di tahong tahong awal 80an, ambo memang suka menulih, cerpeng kae, sajak kae.

Lepaeh tu banyak lae gak haek kua dalam sughat haba (surat khabar) dan majalah. Ambo memang ghasa seghenok bila berkarya. Tu paksae ambo loni suka buka blog ' kamalia'

tuh. Susahnya dulu paksae belong banyak lagi komputer, nak tengok ghupa komputer balaeh mana pong tak tahu. Jadi ambo pong lepaeh tulis ataeh keghetaeh, taip lae pula . Kighanya banyak buang masa lae.Lengoh tangan pong ya juga.

Walo apapong ambo tetap ghasa segenok apalagi cerpeng-cerpeng dan sajak-sajak ambo tersiar didada akhbar dan majalah. Ek tak kata gena lae, tapi ek soghang-soghang lae.....heh...heh..heh.

Nak tahu nama samarang ambo masa tu? Tak lheing tak bukaeng.... Asmin haji Abdullah...kuang...kuang...kuang....!Selalu lae ambo besaing dengan cerpenis masa tu...Norlis Sanusi. Beysa gak novelis yang memberi pandangan dan komen pada tulisan2 ambo tu. Antaranya Saudara Zahari Affandi dan Saudara Yahya Samah..... hua....ghasa syok sunggoh!

Selalu nya cerpeng dan sajak ambo disiarkan dalam akhbat tabloid Mingguan Perdana, Mingguan Wanita.Selaing daghi tu dalam akbar mingguan Malaysia, URTV dan Jelita.

Ni lae majalah dan akhbar yang selalu ambo hata karya ambo.

Selaing dapat memenuhi tuntutan hati, ambo dapat gak duek pokek, tak banyak masa tu, sebuah cerpen ambo dapat lebih kughang tiga pat puluh ghinggik ringgit) jey, sajak lagi kecik bayaran dia, lebih kughang belaeh2 ghinggik jey. Mukeng begatong pada sesebuah penerbitan tu kok. Apapong ambo seghenok.

Banyak kawan yang bagi dorongan, tak kughang jugak yang mengkondem kita. Tak kisah lae. Tapi boss ambo masa tu sangat baik. Belio banyak bagi sokongan dan dorongan kat ambo. Tapi bagi ambo lae, antagha cerpeng ngan sajak, ambo lebih suka sajak, paksae susun katanya yang padat dan tepat tapi penuh puitis.

Daghi dorongan dan impian hati, ambo belaja pula wat novel. Yang sedehnya sapey loni novel ambo tak siap-siap. Bila hati ambo ghasa ghindu, ambo belek-belek lae buku draf novel ambo haek dah jadi warna kuning tuh! Idea tak dak woiii... Keghing kotang! Tapi sedihnya, bila ambo menikah ambo dah malas nak mengaghang, last masa ambo beghanak haek sulong, karya ambo tersiar dalam majalah Timang, lepaeh tu ambo dah tak menulih lagi sapey lae ke loni.

Tu lae sebahagian daghi sisipan diari hidok ambo dulu-dulu. Ambo banyak bermaing dengan perasaan. Bukan apa nak megheka cerpen deh.... kena lae gak syok sendiri....heh...heh...heh...

Insyaallah, suatu waktu nanti, kalu di izinkan Allah, ambo akan berkarya lagi........bye .....!