mab an den

"Mab an den" a zo un anv a vez lakaet hepken war vuzelloù Jezuz-Krist en Avieloù, un dro-lavar a adkaver gantañ ouzhpenn 70 gwech. Un doare eo evitañ da gomz anezhañ e-unan ha d'ober al liamm gant an Testamant Kozh. N'her c'haver ket a-hent all e brezhoeng nemet en 'Instructionoù christen 1824' : "Map Doue a so en em c'hret map an den", pa c'hortozer kentoc'h "den" hepmuiken. Petra a dalvez eta an dro-lavar-mañ war vuzelloù Jezuz ?

En Testamant kozh

Awenet int diwar arroudoù 'zo eus an Testamant kozh. En Testamant kozh e kaver endeo an dro-lavar-mañ a zo heñvelster gant "un ezel eus 'gouenn an dud', en hebraeg : ur mab da Adam. Met gant Jezuz e vez implijet evit kome eus breskted an den evel den, e reuzeudigezh e skoaz hollc'halloudegezh an Aotrou Doue. Daoust da se, Doue a ra anezhañ "mestr ar Grouadelezh" hag e ro dezhañ kement a zo ezhomm evit kemer perzh en evurusted an Neñvoù goude e chomadenn war an douar. Setu aze perak e lenner er Salm 8,5 : "Petra eo an Den evit ma peus soñj anezhañ, petra en Mab an Den evit kaout soursi anezhañ ?

E levr Daniel (Daniel 7, 13) e ra dave "Mab an Den" da drec'her galloudegezhioù ar bed, e stumm loened ferv. Trec'h eo Mab an den hag e resev ar galloud ar roue war ar bed-holl.

E parabolennoù Henoc'h ez eo Mab an Den un den kevrinus, o chom e kichen Doue, dezhañ galloud ar Justis. Dleout a ra dont da zibenn an amzerioù hag ec'h azezo war e dron glorius a varner eus ar bed-holl, salver ha dialour ar re just a vo bet gantañ goude e zasorc'hidigezh.

En Avieloù

Tu zo da gompren an dro-lavar-mañ "Mab an Den" evit merkañ ez eo Jezuz ur gwir den, deuet un diskennadur denel, diwar un tiegezh, hag en deus mignoned, ur vicher, ur gêr e-lec'h en deus e annez. E gwir ne ziskuilh ket e natur a Zoue hag an dro-lavar "Mab an Den" a vir ouzh an dud da welout ennañ ar Mesias a oa gortozet gant ar Juzevien, met oc'h ober dave evelkent da gomzoù Daniel hag Henoc'h pergen.

Komz a ra ken mat eus Doue ma kompren an dud e c'houlennata, hervez an Avieloù (Yn 5 da skouer) ez eo Jezuz "Mab an Den", pimpatrom an den eta, ha "Mab Doue" e fin ar gont, dre ma komz eus "e Dad a zo en Neñv". Sed aze perak e tiskler an holl Ilizoù kristen ez eus ennañ div natur, ez eo gwir Doue ha gwir den. Met an dro-lavar soutil-se a lez ur frankiz klok d'an dud. N'int ket rediet da ober pelloc'h anaoudegezh gantañ. Lavarout a ra Jezuz dezho "Neb en deus divskouarn, ra glevo !", hervez ar Feiz kristen, ne dalv da netra rediañ unan da grediñ ha pa vfe ggant prouennoù, ar Spered Santel eo a ro ar sklerijenn-ret, ur c'hras eo, gradus, na c'hell bezañ roet nemet "d'an dud a volontez vat".