Purun

?Purun Rentang fosil: Eosen?–Sekarang[1] PraЄ Є O S D C P T J K Pg N
Cyperus polystachyos
Klasifikasi ilmiah
Karajaan: Plantae (tidak termasuk) Monokotil (tidak termasuk) Komelinid Ordo: Poales Famili: Cyperaceae Juss.[2]
Genera
lihat teks.

Purun marupakan tanaman khas nang ada di dairah baruh. Purun bamacam-macam janisnya, ada purun tikus (Eleocharis dulcis), purun danau (Lepironia articulata Retz.) dan purun bajang.^[3]

Purun di prupinsi Kalimantan Selatan khususnya di kabupaten Hulu Sungai Utara (HSU) manjadi paluang usaha karajinan tangan nang kawa mahasilakan pamasukan duit. Pruduk ulahan Purun bahkan manjadi ciri khas atawa icon kabupatin Hulu Sungai Utara.^[4]

Sacara umum katiga macam tanaman Purun baisian morfologi nang parak sama. Purun Tikus atawa Eleocharis dulcis marupakan tanaman khas dairah baruh nang baisian batang cagat kada bacabang, babalang habu ruku sampai hijau mangkilap, panjang tanaman Purun antara 50 sampai 200 cm, tabal batangnya sakitar 2-8 mm. Daunnya bahalus sampai ka bagian basal, palapahnya nipis nang kaya membran, hujungnya kada sama atawa asimetris, daunnya babalang habuk sampai kahabangan.^[5]

Biarpun ciri morfologisnya parak sama, tagal Purun Danau ukurannya taganal amun dibanding lawan Purun Tikus atawa Purun Bajang, daun Purun Danau karas nang kaya tumbuhan bakayu, ruas bukunya talihat labh jalas dari pada Purun nang lain. Purun Danau baisian rungga nang kaya paring.^[6]

Purun Bajang, sacara panampilan kada talalu balain matan Purun nang lain, nang jadi pambida antara Purun ini yaitu kakuatannya. Purun Bajang kada talalu kuat manahan daya tarikan amun dibanding lawan janis Purun nang lain, panampakannya labih mangkilap dibanding Purun lain.^[7]

Purun tamasuk kadalam janis tanaman khas dairah baruh atawa dalam ilmu taksonomi disambat tanaman gulungan cyperaceae. Pada dasarnya samunyaan janis tanaman Purun katuju hidup di tanah nang banyunya pasang surut, lawan sipatnya tadapat sulfat masam.^[5]

Ciri khusus dairah nang dikatujui janis Purun Tikus yaitu hidup di tanah nang baisian katinggian tanah paling hingkat 2.700 mdpl, lingkungan sakitar tumbuhnya satangah tabuka, tanah nang hanyar dibuka, di pinggir sungai, tanah nang bakas kamandahan, lawan di tanah kabun atawa taman. Purun mamarluakan unsur natrium nang banyak gasan tumbuh, jadi lamunnya batatai tumbuh lawan tanaman nang lain kawa manyababakan tanaman lain tahambat partumbuhannya sababnya kakurangan natrium.^[5]

Salain kawa dulah gasan bahan anyaman, tanaman Purun kawa jua bapungsi gasan malindungi tanaman banih matan hama, digunaakan gasan pupuk organik, biofilter, lawan panyarap unsur nang baracun.Hama penggerek rapun banih putih katuju maandak hintalunya di tanaman Purun Tikus dari pada di tanaman Banih. Ayunganya, tanaman Purun kawa digulungakan ka dalam tanaman parangkap hama.^[8]

Tanaman Purun basian kadar banyu nang banyak, manurut panalitian dalam tanaman Purun mangandung banyu sabanyak 92,68 %, kundisi ini dipangaruhi ulih tampat Purun tumbuh. Purun jua mangadung serat nang bangaran selulosa nang tinggi sabanyak >30%, sabab itu jua tanaman Purun pas banar digunaakan gasan industri anyaman.^[5]

Biasanya, nang manggawi karajinan anyaman Purun adalah kaum babinian. Wayah banyu surut marupakan waktu nang nyaman gasan maambil Purun matan baruh manggunakan parang atawa harit. Imbah itu, Purun dibarasihi lawan cara mambuang bagan pangkal lawan hujungnya, imbah itu dijamur lawan ditumbuk sampai gipih manggunakan kayu. Lamunnya sudah pipih, Purun dibalangi lawan pawarna nang dilanah ka dalam banyu panas. Langkah salanjutnya, Purun dianyam manjadi barang-barang karajinan tangan nang kaya tikar, tas, dumpit, atawa barang lainnya.^[3]

Salah sabuting dairah nang manjadi sentral anyaman Purun adalah kacamatan Haur Gading di kabupaten Hulu Sungai Utara, Kalimantan Selatan. Parak samunyaan babinian di dairah ini bagiwian maanyam Purun, banyak hal nang maulah industri anyaman Purun di dairah ini tarus dilastariakan misalnya katarampilan maanyam Purun marupakan katarampilan nang tarus diwarisakan matan urang tuha ka kakanakan, banyaknya tanaman Purun di dairah ini nang kawa dimanpaatakan, lawan adanya kauntungan ekonomi matan maulah karajinan Purun.^[9]

1. ^ Shribbs, John (2021). "Sedges in our wetlands". Petaluma Wetlands Alliance. Diakses tanggal 21 February 2024. Fossil sedges are known from as early as the Eocene 56 to 33.9 million years ago (mya) and modern sedges are very similar to ancient fossils. 
2. ^ Angiosperm Phylogeny Group (2009). "An update of the Angiosperm Phylogeny Group classification for the orders and families of flowering plants: APG III". Botanical Journal of the Linnean Society. 161 (2): 105–121. doi:10.1111/j.1095-8339.2009.00996.x . 
3. ^ ^{a b} "Purun, si Tanaman Gambut untuk Anyaman". Tabloid Sinar Tani (dalam bahasa Inggris). Diakses tanggal 2023-03-09. 
4. ^ Wahdah, Rofiqah; Amalia, Henny Septiana (2017-03-01). "PENGEMBANGAN DAYA SAING PRODUK PADA SENTRA KERAJINAN PURUN DI KABUPATEN HULU SUNGAI UTARA KALIMANTAN SELATAN". JURNAL ILMIAH BISNIS dan KEUANGAN (dalam bahasa Indonesia). 6 (2). ISSN 1978-2721. 
5. ^ ^{a b c d} Sunardi, Sunardi (2021-08-01). "ANALISIS KANDUNGAN KIMIA DAN SIFAT SERAT TANAMAN PURUN TIKUS (Eleocharis dulcis) ASAL KALIMANTAN SELATAN". BIOSCIENTIAE. 9 (2): 15. doi:10.20527/b.v9i2.3807. ISSN 2808-1838. 
6. ^ Dhonanto, Donny; Pujowati, Penny; Nugroho, Agung Enggal; Safitri, Apdila; Indana, Khoiru; Kurniadinata, Odit Ferry (2022-08-31). "EKSPLORASI DAN IDENTIFIKASI PURUN DANAU (Lepironia articulata) LOKAL SEBAGAI ADSORBEN ALAMI PADA IKLIM TROPIKA LEMBAB DI KALIMANTAN TIMUR". Jurnal Agroteknologi (dalam bahasa Inggris). 13 (1): 9–16. doi:10.24014/ja.v13i1.18836. ISSN 2356-4091. 
7. ^ Harsono, Dwi (2013-12-31). "SIFAT FISIS DAN MEKANIS PURUN BAJANG SEBAGAI SUBSTITUSI PURUN DANAU DAN PURUN TIKUS". Jurnal Riset Industri Hasil Hutan. 5 (2): 45. doi:10.24111/jrihh.v5i2.1218. ISSN 2503-0779. 
8. ^ Asikin, S.; BALITTRA; Thamrin, M.; BALITTRA (2013-04-30). "Manfaat purun tikus (eleocharis dulcis) pada ekosistem sawah rawa". 2541-0822. doi:10.21082/jp3.v31n1.2012.p%p. Diarsipkan dari versi asli tanggal 2023-03-09. Diakses tanggal 2023-03-09. 
9. ^ Mardiana, Mardiana; Salma, Aima Jatul; Halimah, Noor; Sarijannah, Sarijannah (2021-09-01). "EKSISTENSI ANYAMAN PURUN SEBAGAI PENOPANG PEREKONOMIAN MASYARAKAT DI DESA HAUR GADING". Al-Khidma: Jurnal Pengabdian Masyarakat. 1 (1): 57–80. doi:10.35931/ak.v1i1.700. ISSN 2807-7903.