Norwèhen

Kerajaan Norwèhen Kongeriket Norge (Nor Buku) Kongeriket Noreg (Nor Baru) Norgga gonagasriika (Sami Lor) Vuona gånågisrijkka (Sami Lulé) Nöörjen gånkarïjhke (Sami Kidul) Norjan kuninkhaanvaltakunta (Kwèn)
Ibu negeri	Oslo
Nama pengendek	Nor

Norwèhen (hurup Arab Gundul: نورويهن atawa نورويخن; basa Nor Buku: Norge; basa Nor Baru: Noreg; basa Sami Lor: Norga) atawa Norwègen (hurup Arab Gundul: نورويݢن) atawa resminya Kerajaan Norwèhen (hurup Arab Gundul: كراجأن نورويهن; basa Nor Buku: Kongeriket Norge; basa Nor Baru: Kongeriket Noreg; basa Sami Lor: Norgga gonagasriika; basa Sami Lulé: Vuona gånågisrijkka; basa Sami Kidul: Nöörjen gånkarïjhke; basa Kwèn: Norjan kuninkhaanvaltakunta) entu atu negara di blèlirnya Èropa. Ni negara juga' bagèan kulonnya Semenanjung Skandinawi. Norwèhen punya daratan utama dikulilingin ama Laot Lor èn Laotan Atlantik di bekulonnya, srènta watesan ama Ruslan, Pinlan, èn Swèden di blètannya. Panté kidulnya ngelingkup Oslopior, Skagerak, èn Laot Lor. Adapun ni negara punya hopstad^[1] nama Oslo.

Kerajaan Norwèhen udah merdéka dah tu semprakan tahon 1814. Dia punya hop negara entu raja, sekarang Raja Harald V (per tahon 2022). Saben tanggal 17 Méi diperingetin ari nasional, nyang dalem rangka ari wèt dasar^[2] Norwèhen tahon 1814. Parlemènnya digero' Stortinget èn anggotanya dipili liwat pemilian umum saben 4 tahon sekali.

Ada sekitaran 5 juta orang nyang tinggal di Norwèhen. Adapun orang Norwèhen bisa digero' sebagé orang Nor (hurup Arab Gundul: اورڠ نور).

Basa resminya ni negara entu basa Nor. Cuman, ni negara punya basa resmi ada punya dua ragem pakem nyang digero' sebagé basa Nor Buku (Bokmål) ama basa Nor Baru (Nynorsk). Selaèn entu, ada juga' basa Sami Lor nyang juga' atu deri 3 ragem basa Sami nyang di Norwèhen nyang paling banyak dipaké. Hata, basa Sami Lor juga' jadi atu basa resmi di beberapa haminté^[3].

1. ↑ Hopstat atawa hopstad (hurup Arab Gundul: هوفستت atawa هوفستاد) – ibukota (Indo.); capital (Ing.); hoofdstad (Wld.).
2. ↑ Wèt dasar (hurup Arab Gundul: ويت داسر) – konstitusi (Indo.); constitution (Ing.); grondwet (Wld.).
3. ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Haminté (hurup Arab Gundul: همينتى atawa خمينتى) – munisipalitas (Indo.); municipality (Ing.); gemeente (Wld.).