Вікіпедыя:Найменне артыкулаў

Назвы артыкулаў грунтуюцца на тым, наколькі беларускамоўныя надзейныя крыніцы або аўтарытэтныя спасылаюцца на тэму артыкула.

Першае слова назвы артыкула праз тэхнічныя абмежаванні заўсёды пачынаецца з вялікай літары. Рэгістр першых літар наступных слоў назвы выбіраецца згодна з правіламі беларускай мовы. Калі назва артыкула павінна пачынацца з малой літары, неабходна дадаць у самы пачатак артыкула шаблон {{загаловак з малой літары}}.

У назвах артыкулаў як апостраф рэкамендуецца выкарыстоўваць друкарскі апостраф «’» (код U+2019), а не «звычайны» апостраф «'» (код U+0027, на клавіятуры — Alt+39) ці «ʼ» (U+02BC).

У назвах артыкулаў варта выкарыстоўваць натуральны парадак слоў: напрыклад, Дыпламатычны імунітэт (а не Імунітэт дыпламатычны). Пажадана таксама зрабіць перасылкі на асноўны артыкул з найбольш ужывальных варыянтаў назвы, у тым ліку з энцыклапедычнай.

Назвы артыкулаў павінны быць напісаны ў адзіночным ліку, назоўным склоне, за некаторымі выключэннямі: Нажніцы, Арабскія лічбы, Металы, Стракозы і т.п.

Калі адзін тэрмін мае некалькі значэнняў, назвы адпаведных артыкулаў падаюцца з удакладненнямі: пасля слова пішацца прабел і ўдакладненне ў дужках, з малой літары.

Калі адно са значэнняў з’яўляецца шырока распаўсюджаным і агульнаўжывальным, то, як правіла, назва артыкула з гэтым значэннем падаецца без удакладнення ў дужках: ліхтар і ліхтар (архітэктура), бяроза і Бяроза (горад). Таксама дапушчальны пэўны беларусацэнтрызм у назвах: Брэст і Брэст (Францыя).

У тых выпадках, калі простага ўдакладнення недастаткова (напрыклад, ёсць дзве станцыі з аднолькавай назвай у розных рэгіёнах ці краінах), выкарыстоўваецца дадатковае ўдакладненне, праз коску. Прыклад: Кастрычніцкая (станцыя метро, Мінск), Кастрычніцкая (станцыя метро, Масква).

У пачатку ўсіх аманімічных артыкулаў даецца спасылка на старонку вырашэння неадназначнасцей для гэтага амоніма з дапамогай шаблонаў {{іншыя значэнні}}, {{перанакіраванне}}, {{іншая назва}} ці {{іншыя значэнні тэрміна}}.

У назвах артыкулаў пра людзей захоўваецца натуральны парадак — Імя Імя па бацьку (Сярэдняе імя) Прозвішча. Пажадана па магчымасці рабіць перанакіраванні з назваў Імя Прозвішча, І. Прозвішча, І. Іпб. Прозвішча.

Калі геаграфічны аб’ект мае ўнікальную назву, то ў назве артыкула пра гэты аб’ект яна выкарыстоўваецца без усялякіх удакладненняў: Віцебск, а не Горад Віцебск ці Віцебск (горад).

Пры найменаванні вуліц, праспектаў, бульвараў, плошчаў, завулкаў назва артыкула павінна змяшчаць уласнае імя аб’екта і яго родавую назву. Пры гэтым родавая назва можа быць як перад, так і пасля ўласнага імя ў залежнасці ад кантэксту, напрыклад: плошча Свабоды, праспект Машэрава, вуліца Янкі Купалы (родавая назва перад уласным імем), Прывакзальная плошча, Ігуменскі тракт (родавая назва пасля ўласнага імя).

Артыкулы пра дні года называюцца ў фармаце Дзень Месяц (род. скл.): 1 студзеня. Артыкулы пра гады называюцца ў фармаце НумарГода без удакладнення год: 2000. Артыкулы пра стагоддзі называюцца ў фармаце РымскіяЛічбы стагоддзе, пра тысячагоддзі — АрабскіяЛічбы тысячагоддзе. Удакладненне да н.э. дадаецца пасля прабелу: НумарГода да н.э., РымскіяЛічбы стагоддзе да н.э., АрабскіяЛічбы тысячагоддзе да н.э.

Асноўны артыкул знаходзіцца на старонцы з разгорнутай назвай, а на старонцы з адпаведнай абрэвіятурай робіцца перанакіраванне на асноўную. Прыклад: БНР і Беларуская Народная Рэспубліка.

Артыкулы пра таксоны называюцца беларускай назвай, калі яна зафіксавана ў акадэмічных беларускіх выданнях, такіх як даведнікі і энцыклапедыі, пры гэтым яўна адносіцца да канкрэтнага віду (роду, сямейства і г. д.). Калі такіх назваў некалькі (сінонімы), то ў якасці назвы артыкула бярэцца найбольш распаўсюджаная, астатнія прыводзяцца ў пачатку артыкула.

У выпадку, калі акадэмічных крыніц на беларускую назву таксона няма, то артыкулу даецца лацінская навуковая назва. Недапушчальна даваць беларускую назву артыкулу на падставе самастойнага перакладу (у тым ліку «па аналогіі»), а таксама неакадэмічных крыніц.

Назвы спартыўных клубаў варта падаваць па-беларуску ў фармаце Від спартыўнага клуба Назва, напрыклад:

• ФК БАТЭ
• ХК Брэст

Дапушчальнымі скарачэннямі віда спартыўнага клуба з’яўляюцца:

• ФК — для футбольных клубаў
• ХК — для хакейных клубаў (хакей з шайбай)
• ГК — для гандбольных клубаў

Клубы іншых відаў спорту, а таксама амерыканскіх хакейных ліг, падаюцца без скарачэння віда спорту згодна з агульнымі прынцыпамі наймення артыкулаў:

• Цмокі-Мінск
• Гродна-93
• Вашынгтон Кэпіталз
• Лос-Анджэлес Лэйкерс
• Далас Каўбойз
• Мінск (бейсбольны клуб)

У пераважнай большасці выпадкаў да ўласна назвы клуба дадаецца назва горада, які прадстаўляе гэты клуб, нават у выпадку калі іншыя клубы з такой назвай невядомыя:

• ФК Дынама Мінск
• ФК Дынама Масква
• ФК Хваля Пінск
• ФК Лех Познань
• ФК Грасхопер Цюрых
• ХК Нёман Гродна
• ГК Борац Баня-Лука

Горад не дапісваецца ў наступных выпадках:

• Назва клуба паходзіць ад назвы раёна горада і больш нідзе не сустракаецца: ФК Чэлсі, ФК Фулхэм, ФК Тотэнхэм Хотспур, ФК Шальке 04, ФК Андэрлехт, ФК Бешыкташ (аднак ФК Абалонь Кіеў)
• Назва клуба паходзіць ад прамысловага прадмпрыемства, якое знаходзіцца менавіта ў пэўным горадзе: ФК БАТЭ, ФК Нафтан, ФК Белшына, ФК Тарпеда-БелАЗ, ФК Амкар, ФК Брук-Бэт Тэрмаліка
• Назва клуба прадстаўляе асноўную, змененую ці неперакладзеную назву горада, ці змяшчае яго частку: ФК Пары Сен-Жэрмен, ФК Рома, ФК Напалі, ФК Тарына, ФК Клечаск, ФК Кайсерыспор
• Іншыя выпадкі, калі назва клуба не можа мець іншых значэнняў і заўсёды ўжываецца без назвы горада: ФК Рэал Сасьедад, ФК Сампдорыя, ФК ПАОК, ФК Панатынаікос

Варта адзначыць, што ўдакладненні віду спорту (ФК, ХК, ГК) ужываюцца толькі ў назвах артыкулаў. У тэксце артыкулаў і іншых старонак варта запісваць проста назву, напрыклад: [[ФК Дынама Мінск|«Дынама» (Мінск)]].

Назвы рэгулярных спартыўных спаборніцтваў падаюцца ў выглядзе: <Назва спаборніцтва> па <від спорту> <год>. У выпадку, калі год не з’яўляецца каляндарным, ён запісваецца двума поўнымі чатырохзначнымі лічбамі, падзеленымі слэшам, напрыклад:

• Чэмпіянат свету па хакеі з шайбай 2018
• Кубак Беларусі па футболе 2009/2010

Назвы артыкулаў пра Алімпійскія гульні падаюцца настуным чынам: <Зімовыя/Летнія> Алімпійскія гульні <год>, напрыклад:

• Зімовыя Алімпійскія гульні 1994
• Летнія Алімпійскія гульні 2008

Назвы катэгорый, якія змяшчаюць старонкі ігракоў пэўных клубаў, ствараюцца паводле наступных прынцыпаў:

Калі назва артыкула пра клуб змяшчае згодна з правіламі скарачэнне віда клуба (ФК, ХК, ГК), то назва катэгорыі запісваецца ў выглядзе "Катэгорыя:Ігракі <від спартыўнага клуба> <назва клуба>". Пры гэтым канструкцыя <від спартыўнага клуба> <назва клуба> мусіць дакладна супадаць з назвай артыкула пра клуб.

Напрыклад: Катэгорыя:Ігракі ФК БАТЭ, Катэгорыя:Ігракі ФК Лех Познань, Катэгорыя:Ігракі ФК Лос-Анджэлес Гэлаксі, Катэгорыя:Ігракі ГК Канстанца, Катэгорыя:Ігракі ХК Віцебск, Катэгорыя:Ігракі ХК Фролунда, Катэгорыя:Ігракі ФК Мінск.

Калі назва артыкула пра клуб не змяшчае скарачэння віда клуба, то назва катэгорыі запісваецца з ужываннем двукоссяў у выглядзе "Катэгорыя:Ігракі «<назва клуба>»". Пры гэтым канструкцыя <назва клуба> мусіць дакладна супадаць з назвай артыкула пра клуб.

Напрыклад: Катэгорыя:Ігракі «Цмокі-Мінск», Катэгорыя:Ігракі «Лос-Анджэлес Лейкерс», Катэгорыя:Ігракі «Вашынгтон Кэпіталз».

Назвы катэгорый, якія змяшчаюць пералікі асоб, падаюцца ў выглядзе: Катэгорыя:Постаці X. Напрыклад, Катэгорыя:Постаці Мінска, Катэгорыя:Постаці Беларусі, Катэгорыя:Постаці тэатра.

• падстаронкі