З Вікіпедыі, свабоднай энцыклапедыі
Пустарогія (Bovidae) — буйное сямейства жуйных парнакапытных. Да яго адносяцца буйвалы, бізоны, антылопы, газелі, быкі, авечкі і горныя казлы.
Сямейству пустарогіх належаць 140 відаў, ад 1000-кілаграмовага бізона да 5-кілаграмовага дзікдзіка. Важным адрозненнем з'яўляюцца рогі: іх амаль заўсёды двое (выключэннем з'яўляецца род чатырохрогіх антылоп), а даўжыня можа складаць ад 2 см да 1,5 метра. У некаторых відаў рогі маюцца толькі ў самцоў, аднак у большасці яны сустракаюцца ў абодвух палоў. Гэта касцяныя структуры, цвёрда звязаныя з чэрапам. У адрозненне ад аленевых і віларогіх, у пустарогіх рогі ніколі не разгалінаваныя.
Асноўная частка пустарогіх жыве ў адкрытых мясцовасцях. Афрыканскія саваны з'яўляюцца для многіх відаў ідэальнай жыццёвай прасторай. Існуюць таксама віды, якія жывуць у гарыстай мясцовасці або ў лясах.
