З Вікіпедыі, свабоднай энцыклапедыі
Чорны пальмавы какаду, таксама чорны какаду, таксама арападобны какаду (Probosciger aterrimus) — птушка сямейства какаду. Адзіны від роду. Жыве на поўначы Аўстраліі, паўвостраве Кейп-Ёрк, у Новай Гвінеі і бліжэйшых астравах.
Даўжыня цела — 70-80 см, хваста — 25 см; вага — 500—1000 г. Афарбоўка чорна-грыфельнага колеру з ледзь заўважным зялёным адценнем. Дзюба — буйная, да 9 см, магутная, чорная, вельмі падобная да дзюбы ара. Чубок вялікі з вузкіх доўгіх, закручаных назад, стужкападобных пёраў. Шчокі без апярэння і маюць мясны, а пры ўзбуджэнні пунсова-чырвоны колер. Голыя ўчасткі вакол вачэй чорныя. Радужка цёмна-карычневая. Ногі шэрыя. Самка драбнейшая, з меншай дзюбай.
Засяляюць высокаствольныя трапічныя лясы і саванны з асобнымі групамі дрэў. Жывуць паасобку ці невялікімі групамі. Сілкуюцца насеннем эўкаліпта, акацый, фігавых дрэў і лічынкамі насякомых, якіх лёгка дастаюць сваёй моцнай дзюбай з-пад кары дрэў і галін. У пошуках ежы яны вельмі спрытна лазяць па галінках вялікіх і высокіх дрэў. Голас, нават у спакойным стане, даволі непрыемны, рыпучы, ва ўзбуджаным стане вельмі гучны, рэзкі і вельмі непрыемны.
Жывуць да 90 гадоў. У адносіны з самкамі самцы ўступаюць у сталым узросце. Гэта робіць гэты від наогул унікальным сярод большасці птушак і папугаяў, якія звычайна імкнуцца як мага раней пачаць адносіны. Пары захоўваюцца на ўсё жыццё.
