Arno Funke

Arno Martin Franz Funke (* 14. Meaz 1950 in Berlin (Rudow) is a Autor und Grafika. Anno 1988 und vo 1992 bis 1994 hod a Kaufhaus-Eapressunga duachgfiat. In da Effentlichkeit bekannt worn is a 1992 untam Pseudonym Dagobert. Da Funke hod duach Phantasie, technischn Fehigkeitn und ausgfinklte Taktik de Polizei sea schlecht ausschaugn lossn und so de Sympathie vo an grossn Tei vo da Effentlichkeit gwunna. Dea Eapressungsfoi, wo ois Dagobert gfiat wead, is da lengste und afwendigste in da deitschn Kriminalgschicht.

Da Funke is da Sohn vo ana Norwegarin und vo an Berlina, dea wo oba boid de Famij valossa hod. Afgwoxn is a z Berlin. Scho ois Kind hod a gean zeichnet und gmoit. In da Schui is a zwoamoi sitzn bliebm (obwoi eam noch seine Vahoftung a geniale Intelligenz bstetigt worn is). Sei easchte Lea ois Fotograf hod a obrocha, de zwoate ois Schuidamola obgschlossa. Nacha is a vo an Job zan andan ghupft: Schuidamola, Discjockey, LKW-Foara, Huifsorbata am Bau. Vo 1980 bis 1993 hod a freiberuafli ois Kustmola und Fotograf gorbat. Davo hod a oba ned sein Lebmsuntahoid bestreidn kena, deshoib hod a haptberuafli ois Kunstlackiera in ana Kfz-Weakstod gorbat.

Ban Lackian hod a joarelang Lesungsmiddl eingotmet. So is ba eam a hianorganischa Schodn entstandn, wo wearend seina Hoft diagnostiziat und eafoigreich bhandlt worn is. Dees und private Probleme hom za ana schwaan Depression gfiat. In seim zwoatn Prozess is dees ois schuidmindand onakonnt worn.^[1]

Zwegn sein chronischn Gejdmangl und wei a Sejbstbstetigung gsuacht hod, is a af de Idee mit de Eapressunga keman.

Da Arno Funke hod anno 1988 s KaDeWe ('Kaufhaus des Westens') z Berlin um 500.000 DM eapresst. De easchte Bombm, wo a im Kaufhaus glegt ghobt hod, hod vasogt. De easchte Gejtibagob is gscheidat. Drauf hod a weidane Bombm glegt, wo im KaDeWe explodiat is und an Schodn vo 250.000 DM ogricht hod. Ba da foigendn Gejdibagob hod a nacha de 500.000 DM kriagt.

Wie s Gejd vo da Eapressung afbraucht wor und da Funke zweng ana Depression kuaz vorm Freitod gstandn is, hod a si entschlossn sowos no amoi z mocha. Ban zwoatn Eapressungsvasuach anno 1992 hod vasuacht znaxt 1 Million, spoda 1,4 Milliona DM vom Karstadt-Konzern z eapressn. Zwoa Joar lang hod a an grossn, afwendign Stob vo da Polizei duach seine raffiniatn Gejdibagobevasuache bscheftigt.

Eascht im Aprui 1994 is a vahoftet worn. Am 14. Meaz 1995 is a wegn "schwaara raibarischa Eapressung" za siebm Joa und nein Monat Hoft vauateit worn^[2] De Stootsowoitschoft is in de Revision ganga. Am 14. Juni 1996 is da Funke nacha za 9 Joar Hoft vauateit worn.^[1] und zuasetli zua Leistung vo an Schodnseasotz in da Heh vo 2,5 Milliona DM an Karstadt. Noch sechs Joar und via Monat is a am 13. August 2000 wegn guada Fiarung entlossn worn.

Obwoi a in da Schui zwoamoi sitzn bliebm is und de Schui scho mit 15 valossn hod, guit da Funke ois hochintelligent, technisch begobt und vuiseiti talentiad. Seine raffiniatn, trickreichn Gejdibagobevasuache hom dees scho odeidd. Guatachta hom ban Funke an Intelligenzquotient (IQ) vo 120 (= beste 10% vo da Bevökarung) und in am Test ohne Sproch sogar an IQ vo 145 (genial, schwaa z Ibatreffn) festgstejt^[3].

Seit seina Entlossung ausm Häfn anno 2000 is da Funke ois Karikaturist und Autor eafoigreich. Anno 1998 hod a sei Autobiografie („Mein Leben als Dagobert“) und 2004 a Buach mit Karikaturn und Gschichtn („Ente kross“) vaeffentlicht. Do hod a aa mit da Comicfigur "Dagobert" obgrechnt, mit dea wo a bis heit identifiziat wead.

• Die Entenjagd Dagobert. In: der kriminalist, Nr. 2, 3, 5, 2004, ISSN 0722-3501

• „Dagobert“ – Der Kaufhauserpresser, aus der Sendereihe "Die großen Kriminalfälle" SWR 2007
• Räuber und Gendarm - der Fall "Dagobert", Spiegel Geschichte 2012

• Mein Leben als Dagobert. Die Bekenntnisse des Kaufhauserpressers, Ch. Links, Berlin 1998, ISBN 3-86153-164-X
• Ente kross. Cartoons und Geschichten, Eulenspiegel, Berlin 2004, ISBN 3-359-01489-8

1. ↑ ^{1,0 1,1} Dagobert - länger hinter Gittern und hohe Schulden@1@2Vorlage:Toter Link/www.berlinonline.de (Seite nicht mehr abrufbar; Suche in Webarchiven); Artikel in der Berliner Zeitung vom 15. Juni 1996.
2. ↑ Arno Funke muß fast acht Jahre hinter Gitter; Artike in da Berliner Zeitung vom 15. Meaz 1995.
3. ↑ Bei Dagobert sprang der Funke über auf Welt Online.

• Literatur von und über Arno Funke im Katalog der Deutschen Nationalbibliothek
• Das Phantom – Die Jagd nach Dagobert in da Internet Movie Database
• Arno Funke in da Internet Movie Database
• Die großen Kriminalfälle: „Dagobert“ – Der Kaufhauserpresser bei daserste
• Poster illustriat vom Arno Funke