Elmol (Talpidae)

Elmol Talpidae
giltafa pulara
Bliind	Animalia
Dansok	Chordata
Volveydansok	Vertebrata
Pula	Mammalia
Volveypula	Theria
Tolvolveypula	Eutheria
Veem	Soricomorpha
yasa
Talpidae
G. Fischer, 1814
Tuveli icde Sulemopa

Elmol (Talpidae) tir tana moukolafa yasa ke SORICOMORPHA veem. Gan G. Fischer bak 1814 taneon zo pimtayar.

Talpidae yasa tir dem san-toloyi oxi is san-lerdoya katca. Bat dunol sotid ordon suxas : va erilt dun suxad ise koe levesid va blira loedje tiskid. Ke Talpidae elmol, va lavedafa ok pakon lavedafa vox katecton levesidafa katca soe trasid. Jadion batman elmol va abrotcafo is akintafo alto dir ; pezay tir otsaf gu tec varzot is prantaf is pimakoraf is abrotcaf is imiskaf. Iteem tir pinapaf is fereon besanaf gu alma. Elmol va divefa oblaka somedir. Kota inia va aluboy gelt sodir isen loi oxi tenafa niska ke gelt va rowipine vasizefe belaxare ok toloya vidila did. Suxasa katca va abduiniapeem dem tanoy loplekufa niska ( buprakorafa ) sodid. Oxi vas angabol tid toloyi dem tanoya katca fuxe oxi.

Rossiaf angabol ( Desmana moschata ) vagetalte Europa is isttalte Asia tigir. Ault tir xuon azekackaf ise in va yon ducak ekwon ice ault dir, batdume va adalafa dakela ke lonta gidivdaaker. Va ault is beweem ton abduplatis mergil koe lava faver. Im tir dem listapaf myot dem trelaf is vaf is pibapaf levbiy ; almaga tir kum lodabrotcaf is lodolgaf im. Uka ke inafa bia tir kerabertre ik lukopte. Akangol tir levedaf dunol abdualbas va domega ke voa lizo salt tir lepof. Runak ke tawaz koe mid sotigir, titsuyon umeke sulem rokopujer, bak dace fentugal ugale lava oprar. Idja ke tawaz vamoe lavek luxeon tigir. Tawaz vugviele tir ke tum gubeon faven gan konak sulem.

Wivga tid vrandega is lesko is broza is lonadunol is beza is ato ke kabay is salmey is toka is kabayam. Soe sin va ruxaf tor dere gimalestud. Jijacek ke ocagugal tir vas mon balem-sanoy viel. Baroy ok balemoy oc koblid, tison mewis is talgiskaf is riwe imiskaf. Remi bar-sanoy viel di mouvad. Lontakiraf akangol ko kuksaxopo ke europafa Rossia dile divlizer.

Katcolk ke Talpinae volveyyasa vas gubef europaf elmol ( Talpa europaea ) ruldad. Vuwaf ronekaf elmol ( Euroscaptor micrura ) tir abiceke lopinaf ; male Barata kale Mongola is Nipona is Taiwana tigir.

Scalopinae volveyyasa vas san-toloya katca ruldar : anyustoya tid dem grugildes oblakot. Ke sina, Urotrichus talpoides katca koe Nipona koe aala is meftaxo ontinon ice mon 2000 m- blir. Vas akangol vektar. Neurotrichis gibbsii elmol tir nuxapaf ise kene taltefa krimta ke Lentefa Amerika male British Columbia kale idja ke California, ontinon ice mon 2500 m- tigir.

Elmol dem bitejkoraf pez ( Condylura cristata ) koe Kanada is Tanarasokeem tigir. Tigixo tir koe abdaxo ik diblaxo. Alto tir abrotcafo vas 10 ik 13 cm- voxen ault vas 5.6 ik 8.4 cm-. Aldo ke milgik tir vas 40 ik 85 g-. Im tir vaf is acagisaf is gilavaf, solve uka ke bia tir lerkebeltafa ik ebeltackafa. Lodadalafa kira ke bat dunol tir pezay otsaf gu limega dem san-toloy cotkiraf bent ( san-tanoy bene kot kril ). Sin dum kinti zekad, satcon viele olkik va sinka kaaneyar. Ape tir dis va uzasafa vila. Wali acku ke balemeaksat is acku ke teveaksat, elmolya va tanoy occek dem toloy ik peroy oc tandeon nazbar. Divaxo ke erilt ko abdaxo sye tigir, vox dile rontion ko mid : bat sulem grutid donaf pujesik isu estobasik ; fentugalon valeve opra dace grupujed. Dalafa sinka moe ludev ke tourka is voa zo narir, ise tir kum broza is tul is lavabeza is dace kabayam.

• Veem : Soricomorpha
• Yasa : Talpidae
• Lum : abrotce ke taka is alto vas 18 ik 25 cm-, is ault vas 17 ik 21.5 cm-
• Talgeem : 3.1.4.3 / 3.1.4.3 = 44 talga
• Nazbarugal : Imwugal is idulugal
• Ocagugal : 45 viel
• Occek : 3 ik 4 oc
• Ikralukruca : 6 ik 12 aksat

Sedme Mammal Species of the World (siatos ke 2005), bata yasa vas 17 oxi ruldar :

• Elmol (Condylura) (Illiger, 1811)
• Elmol (Parascalops) (True, 1894)
• Elmol (Scalopus) (E. Geoffroy, 1803)
• Elmol (Scapanulus) (Thomas, 1912)
• Elmol (Scapanus) (Pomel, 1848)
• Elmol (Neurotrichus) (Günther, 1880)
• Elmol (Scaptonyx) (Milne-Edwards, 1872)
• Elmol (Euroscaptor) (Miller, 1940)
• Elmol (Mogera) (Pomel, 1848)
• Elmol (Parascaptor) (Gill, 1875)
• Elmol (Scaptochirus) (Milne-Edwards, 1867)
• Elmol (Talpa) (Linnaeus, 1758)
• Elmol (Dymecodon) (True, 1886)
• Elmol (Urotrichus) (Temminck, 1841)
• Elmol (Uropsilus) (Milne-Edwards, 1871)
• Angabol (Desmana) (Güldenstaedt, 1777)
• Angabol (Galemys) (Kaup, 1829)

• Kotava winugaf moukolaf ravlemak (Kotava, Latinava, 2019)
• Elmol dene www.europalingua.eu

Yaseem is oxieem ke Elmoldunol (Soricomorpha)

Vimkol (Nesophontidae) ⇒ Vimkol (Nesophontes) | Vimkol (Soricidae) ⇒ Vimkol (Crocidura) • Vimkol (Diplomesodon) • Vimkol (Feroculus) • Vimkol (Paracrocidura) • Vimkol (Ruwenzorisorex) • Vimkol (Scutisorex) • Vimkol (Solisorex) • Vimkol (Suncus) • Vimkol (Sylvisorex) • Vimkol (Congosorex) • Vimkol (Myosorex) • Vimkol (Surdisorex) • Vimkol (Anourosorex) • Vimkol (Blarinella) • Vimkol (Blarina) • Vimkol (Cryptotis) • Vimkol (Chimarrogale) • Vimkol (Chodsigoa) • Vimkol (Episoriculus) • Vimkol (Nectogale) • Vimkol (Neomys) • Vimkol (Nesiotites) • Vimkol (Soriculus) • Vimkol (Megasorex) • Vimkol (Notiosorex) • Vimkol (Sorex) | Elmol (Talpidae) ⇒ Elmol (Condylura) • Elmol (Parascalops) • Elmol (Scalopus) • Elmol (Scapanulus) • Elmol (Scapanus) • Angabol (Desmana) • Angabol (Galemys) • Elmol (Neurotrichus) • Elmol (Scaptonyx) • Elmol (Euroscaptor) • Elmol (Mogera) • Elmol (Parascaptor) • Elmol (Scaptochirus) • Elmol (Talpa) • Elmol (Dymecodon) • Elmol (Urotrichus) • Elmol (Uropsilus) | Dingol (Solenodontidae) ⇒ Dingol (Solenodon)