Rebecca Romijn

Rebecca Romijn
Vida
Nacimientu	Berkeley, 6 de payares de 1972[1] (51 años)
Nacionalidá	Estaos Xuníos
Llingua materna	inglés
Familia
Casada con	John Stamos (1998 – div. 2005) Jerry O'Connell (2007 – )
Estudios
Estudios	Universidá de California en Santa Cruz Berkeley High School
Llingües falaes	inglés[2]
Oficiu	actriz, modelu, actriz de televisión, actriz de cine, actriz de voz
Pesu	57 kg
Altor	180 cm
IMDb	nm0005381

Rebecca Alie Romijn (6 de payares de 1972, Berkeley) ye una actriz y exmodelu d'Estaos Xuníos. Mientres el so matrimoniu con John Stamos foi conocida como Rebecca Romijn-Stamos.

Romijn (nació en Berkeley, California). Ye fía de Jaap Romijn, un fabricante de muebles y Elizabeth Kuizenga, profesora d'inglés nuna escuela pública y autora de llibros de testu. Peles sos venes cuerre sangre holandés, yá que'l so padre ye nativu de la llocalidá holandesa Barneveld y la so madre ye fía de padres holandeses.

Rebecca estudió secundaria nel Berkeley High School au yera conocida como la Jolly Blonde Giant, daqué como "l'allegre rubia xigante", anque ella almitió que nunca se lo tomó a mal [1].

Mientres estudiaba música na Universidá de California, empezó a trabayar como modelu pa consiguir dineru y treslladóse a París mientres 2 años. Amás del inglés, tamién fala francés y holandés.

Romijn trabayó como modelu de bañadores ente otros pa Sports Illustrated^[3] y Victoria's Secret. Tamién trabayó de 1998 a 2000 pal programa de la MTV House of Style, dedicáu a la moda. Dotada d'una estraordinaria guapura, ta considerada por munchos como una de les muyeres más fermoses del mundu, Rebecca siempres apaez nes llistes añales de les más belles en revistes como Maxim (2003, 2004, 2005, 2006), AskMen.com (2001, 2002, 2003, 2005, 2006) y FHM (2000, 2001, 2002, 2003, 2004, 2005).

Rebecca tuvo'l so primer papel importante en X-Men (2000) interpretando a Mística, papel que repitió en X-Men 2 (2003) y en X-Men: The Last Stand (2006). Nestes películes, el so traxe consistía en maquillaxe azul y delles prótesis estratéxicamente asitiaes sobre'l so cuerpu desnudu. En X-Men 2, amás, apaez col so aspeutu "normal" nuna escena na que ta nun chigre. Tamién apaez col so aspeutu "normal" nuna escena en X-Men: The Last Stand, cuando pierde los sos poderes y apaez col pelo negru. Tamién foi la protagonista principal de la película Femme Fatale (2002) de Brian De Palma. En 1997 apaeció na serie Friends interpretando a Cheryl.

En 2006 protagonizó la serie de televisión Pepper Dennis, onde demostró'l so talentu pa la comedia, el drama y como cantante. Tamién apaeció na serie Ugly Betty (2007), la versión americana de Yo soi Betty, la fea, interpretando'l papel d'Alexis Meade, una muyer transexual, hermana del protagonista de la serie Daniel Meade. Abandonó la serie nos primeros episodios de la tercer temporada, por cuenta del so estáu de xestación tan avanzáu na vida real.

Una vegada que Rebecca tuvo a les sos fíes ximielgues apaeció como protagonista en serie de l'ABC Eastwick que trataba sobre bruxes. La serie tuvo poco ésitu y foi atayada na so primer temporada.

Casóse col actor John Stamos el 19 de setiembre de 1998. Mientres el so matrimoniu ella usó'l nome de Rebecca Romijn-Stamos tantu na so vida personal como profesional. La pareya anunció la so separación el 12 d'abril de 2004 y divorciáronse el 1 de marzu de 2005. Dempués ella volvió utilizar el so nome de nacencia, anque llegalmente ésti nun camudara.^[4]

En setiembre de 2005 anunció'l so compromisu col actor Jerry O'Connell. Casáronse'l 14 de xunetu de 2007 en California. El 28 d'avientu de 2008 nacieron les sos primeres fíes, les ximielgues Dolly Rebecca Rose y Charlie Tamara Tulip.