Gran Premiu de la FIDE de 2022

Gran Premiu de la FIDE de 2022
Xeneral
Tipu de competición	Grand Prix de la FIDE (es)
Deporte	axedrez
Organizador	Federación Internacional d'Axedrez
Competición
Web oficial

El Gran Premiu de la FIDE de 2022 foi un circuitu de trés torneos d'axedrez que se celebraron ente'l 4 de febreru y el 4 d'abril de 2022. Los dos primeros clasificaos —Hikaru Nakamura (campeón) y Richárd Rapport (segundu puestu)— clasificarónse pal Tornéu de Candidatos de 2022, la competición na que se decide l'aspirante al Campeonatu del Mundu d'axedrez.

El primer y el caberu tornéu xugáronse en Berlín (Alemaña), mientres que la sede del segundu foi la ciudá de Belgráu (Serbia). Caún de los xugadores taba incscritu en dos de los tres torneos, ganando puntos pa la clasificación final en función del so puestu en caún d'ellos. Antes de que la fase de desempate del últimu tornéu terminara, Nakamura yá algamara puntos suficientes pa ganar el Gran Premiu, y amás tamién taba claro que nengún otru semifinalista podía algamar el segundu puestu de Rapport.

Daes les llimitaciones de viaxe que supunxo l'andanciu de la COVID-19 de mano pensóse en facer los trés torneos na mesma ciudá y non en varies como nes ediciones anteriores.

El circuitu taba organizáu pola empresa World Chess Limited, qu'escoyó la ciudá de Berlín al traviés d'una votación popular. Más tarde anunciaríen que dos de los trés torneos diben ser en Berlín y ún en Belgráu.

Al aniciu fueron venticuatro los xugadores convidaos al Gran Premiu:

- Los clasificaos del 3ᵘ al 8ᵘ na Copa del Mundu de 2021 sacante'l campeón del mundu o los que yá tuvieren plaza nel Tornéu de Candidatos de 2022. Clasificáronse asina cinco de los seis xugadores posibles, porque'l campeón del mundu Magnus Carlsen resultara terceru naquella competición.

- Los clasificaos del 3ᵘ al 8ᵘ puestu nel Tornéu Gran Suizu de la FIDE de 2021 que nun fueran el campeón del mundu y qu'entá nun tuvieren plaza nel Tornéu de Candidatos o nel Gran Premiu.

- Hikaru Nakamura, convidáu pol presidente de la FIDE.

- Daniil Dubov, convidáu pola organización.

- Les otres ocho places llenáronse colos xugadores cola puntuación Elo más alta nel llistáu FIDE d'avientu de 2021 y que xugaren la Copa del Mundu de la FIDE 2021 o polo menos nueve partíes puntuables ente febreru y avientu de 2021. Asina, Viswanathan Anand, Wnag Hao y Veselin Topalov nun yeren escoyibles pola so inactividá. Orixinalmente fuese fasta'l puestu númberu 23 de la llista, pero'l postreru arrenunciu de Wei Yi fizo que'l númberu 25 mundial Pentala Harikrishna tamién se clasificara d'esti mou.

Ding Liren y Dmitry Andreikin nun pudieron competir nel primer tornéu del circuitu por temes de salú y problemes col visáu respeutivamente, y fueron sustituyíos por Andrey Esipenko y Radosław Wojtaszek. Ding tampoco pudo xugar nel segundu tornéu, y Andreikin sustituyólu nél, esti nunu pudo participar nel tercer tornéu por razones personales y foi sustituyíu por Espinenko.

Orden	Nome	Vía de clasificación	Elo (avientu 2021)	Puestu mundial (avientu 2021)
1	Ding Liren	Llistáu FIDE (3rd)	2799	3
2	Levon Aronian	Llistáu FIDE (6ᵘ)	2772	6
3	Anish Giri	Llistáu FIDE (7ᵘ)	2772	7
4	Wesley So	Llistáu FIDE (8ᵘ)	2772	8
5	Shakhriyar Mamedyarov	Llistáu FIDE (9ᵘ)	2767	9
6	Alexander Grischuk	Llistáu FIDE (10ᵘ)	2764	10
7	Richárd Rapport	Llistáu FIDE (11ᵘ)	2763	11
8	Maxime Vachier-Lagrave	Gran Suizu (6ᵘ)	2761	12
9	Leinier Domínguez	Llistáu FIDE (15ᵘ)	2752	15
10	Hikaru Nakamura	Convidáu pol presidente de la FIDE	2736	–
11	Nikita Vitiugov	Llistáu FIDE (19ᵘ)	2731	19
12	Vidit Gujrathi	Copa del Mundu (5ᵘ-8ᵘ)	2727	22
13	Dmitry Andreikin	Llistáu FIDE (23ᵘ)	2724	23
14	Daniil Dubov	Convidáu pola organización	2720	24
15	Pentala Harikrishna	Llistáu FIDE (25ᵘ)	2717	25
–	Andrey Esipenko	Convidáu pol presidente de la FIDE[N. 1]	2714	26
16	Yu Yangyi	Gran Suizu (4ᵘ)	2713	27
17	Sam Shankland	Copa del Mundu (5ᵘ-8ᵘ)	2708	29
18	Alexei Shirov	Gran Suizu (8ᵘ)	2704	31
19	Vladimir Fedoseev	Copa del Mundu (4ᵘ)	2704	32
–	Radosław Wojtaszek	Convidáu pol presidente de la FIDE[N. 2]	2686	45
20	Alexandr Predke	Gran Suizu (7ᵘ)	2682	52
21	Grigoriy Oparin	Gran Suizu (3ᵘ)	2681	55
22	Vincent Keymer	Gran Suizu (5ᵘ)	2664	74
23	Amin Tabatabaei	Copa del Mundu (5ᵘ-8ᵘ)	2643	108
24	Étienne Bacrot	Copa del Mundu (5ᵘ-8ᵘ)	2642	111

Caún de los xugadores participaba en dos de los trés torneos, lo que facía 16 participantes por tornéu, xugaos con un formatu de dos fases.

- Na primer fase, los xugadores dividíense en cuatro grupos de cuatro, xugándose en caún de los grupos una lliga a doble vuelta. Los cuatro ganadores de grupu pasaben a la segunda fase.

- Na segunda fase, los cuatro clasificaos xugaben en formatu eliminatoria les semifinales y la final. Dambes rondes consistíen en dos partíes de ritmu clásicu más desempate, si ficiera falta.

Los xugadores recibíen puntos pal Gran Premiu en función de la so posición final en cada tornéu, clasficándose pal Tornéu de Candidatos de 2022 los dos participantes cola mayor puntuación final.

El control de tiempu pal ritmu clásicu ye de 90 minutos pa 40 movimientos más un añadíu de 30 minutos dempués del movimientu 40, con un incrementu de 30 segundos por movimientu dende'l primeru.

Los desempates de dambes fases (tanto la de grupos como la d'eliminatories) teníen el formatu darréu:

- Dos partíes o una lliga a una vuelta, dependiendo si l'empate yera ente dos o trés xugadores, con un ritmu rápidu de 15 minutos más 10 segundos por movimientu.

- Si l'empate se caltenía, dos partíes o una lluga a una vuelta, dependiendo si l'empate yera ente dos o trés xugadores, con un ritmu rellámpagu de 3 minutos más 2 segundos por movimientu.

- Si dempués de lo anterior tovía había xugadores empataos, una partida de muerte repentina: el xugador de blanques tien 5 minutos y el de prietes 4, pero gana en casu de tables; dambos sumen dos segundos por movimientu dende'l númberu 61. Nel casu de triple empate, rífase los dos que xueguen la primer partía y el xugador apartáu comparte segundu puestu col perdedor de la partida de muerte repentina.

Nel casu de cuádruple empate, los xugadores dividiríense en pareyes al debalu y caúna xugaría un desempate según lo anterior, repitiéndose'l procesu colos dos ganadores y compartiendo tercer y cuartu puestu del grupu los perdedores.

Los xugadores que comparten puestu, comparten tamién los puntos de Gran Premiu de los puestos compartíos.

En casu d'empate na clasificación final del Gran Premiu, los criterios pa desempatar yeren:

- Númberu de torneos como campeón.

- Númberu de torneos como finalista.

- Númberu de puntos nes partíes con tiempu llímite normal.

- Númberu de victories nes partíes con tiempu llímite normal.

- Rifa.