Rexón ultraperiférica de la Xunión Europea

Les rexones ultraperifériques de la Xunión Europea (RUP) son los nueve territorios que, magar que tán xeográficamente alloñaos del continente européu, formen parte indivisible de dalgún de los 27 estaos miembros de la Xunión Europea^[1]. Trátase de cinco departamentos franceses d'ultramar: Guadalupe, Guyana Francesa, Martinica, Reunión y Mayotte; la coleutividá d'ultramar francesa de San Martín; la comunidá autónoma española de Canaries; y les rexones autónomes portugueses de Madeira ya Azores.

A diferencia de los países y territorios d'ultramar de la Xunión, considérense parte integral del territoriu européu. Formen parte del espaciu Schengen, y nellos aplícanse les lleis y direutrices de la Xunión. Sicasí, poles cláusules del tratáu d'Ámsterdam, reciben tratu estremáu en distintos seutores.

Estes rexones faen que la Xunión tenga un territoriu marítimu perestensu, y axuden tamién a diversificar la so economía, especialmente l'agrícola, una y bones nelles prodúcense, ente más coses, ron, zucre de caña, plátanos y bayura d'otres frutes y verdures exótiques. Al traviés d'elles la Xunión establez llazos más estrenchos colos países vecinos d'elles, y representen tamién un emplazamientu atractivu pa delles instalaciones rellacionaes cola investigación y l'alta tecnoloxía: l'Institutu Astrofísicu de Canaries, el Puertu espacial de Kourou (Guyana Francesa), de l'Axencia Espacial Europea, o el Departamentu de Pesca y Oceanografía de la Universidá de les Azores.

Pesie a ello, la so insularidá, la so dependencia de monocultivos, el so clima xeneralmente tropical, el so suelu, mayormente montañosu y volcánicu, y el so alloñamientu de la Europa continental son factores que torguen el so desarrollu. A ello contribúi tamién que, pesie a que tienen una densidá de población non despreciable, la so importancia demográfica, económica y territorial con rellación al conxuntu de la Xunión son pequeñes. Resúlta-yos difícil consiguir economíes d'escala y xenerar beneficios a partir de grandes inversiones, y esto, xunto colos baxos salarios y el altu nivel de paru (especialmente na población más moza), alcuéntrense ente les rexones más probes de la Xunión.

• Web oficial Archiváu 2016-03-05 en Wayback Machine (en castellanu)