Equus grevyi

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Zebra de Grevy

Equus grevyi.

Estato de conservación

En periglo.

Clasificación scientifica

Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Perissodactyla
Familia:	Equidae
Chenero:	Equus
Especie:	E. grevyi

Nomenclatura binominal

Equus grevyi

Oustalet, 1882

Distribución de la Equus grevyi en Africa.

A cebra de Grevy (Equus grevyi (Oustalet, 1882)) ye una cebra en grau recesión d'o centro-este d'Africa. Ye la mas gran de todas las cebras y tien muitas rayas verticals que son muit chuntas, mas que no en as altras especies, y tamién as orellas grans y redondas que la fan de reconoixer cuan la se veye. Anque ye de plano mas gran y mas fuerte que no la cebra d'as planas, ye mas deficil d'entrenar-la, por lo que nunca no la s'ha mirato de domesticar.

Una carateristica social d'a cebra de Grevy ye que por contra de como fan as altras especies de cebras, os mastos d'ésta no forman harems. A suya estratechia ye prener lo control d'una pieza de terreno y mirar de cobrir-ie cualsiquier fembra que trascruce por o suyo territorio.

Distribución

O tamanyo d'esta cebra y las suyas colors la fan inconfundible.

As cebras de Grevy habitan o norte de Kenya, dende la ribera d'o río Tana dica l'este d'o laco Turkana. Solament que existe n'esta parte d'o norte de Kenya y n'una parte mas d'Etiopía, a on que se cobillan só que cualques millars d'eixemplars. A cebra de Grevy ocupa lo nincho d'entre meyo d'a cebra común (mas dependedera de l'augua) y los burros salvaches (d'ambients mas xucos). Habita en as planas d'o centro d'Africa, a on que i troba hierba y lastons anque sean xucos pa paixentar-se. En a naturaleza, s'asocia en ramadas con as cebras comuns, ramadas en as cuals siempre predominan as Grevys. Se conoixe que a tamas d'a suya convivencia las dos especies no s'hibridan en o medio natural.

Comportamiento

De día u de nueit, a cebra de Grevy tien un comportamiento social de raso diferent d'a cebra común. A suya sociabilidat ye similar, anque sindembargo la cebra de Grevy ye territorial y forma grupos obiertos, sin de cohesión. A la contra que la cebra común, l'aseyo reciproco no lo han muito orminoso. A unidat basica d'a suya sociedat ye una fembra con o suyo potro, u con os suyos dos u tres potros mas chóvens. Estas familias son combinadas en grupos de 2 a 10 fembras con os suyos chóvens, anque son poco duraderas y se desfan facilment. Os grupos tamién pueden incluyir atras especies de cebras, como las comuns, y incluso especies d'antilopes. En as sequeras, os grupos solen incluyir muitos mas eixemplars, con rebanyos mixtos de 100 u 200 eixemplars, que a ormino brincan ta os 450 animals. Os rebanyos migran chuntos ta buscar-se millor pasto anque dempués se dispersan pa no fer-se estorbo cuando falta la hierba.

Os mastos adultos son solitarios y territorials. Cheneralment, han territorios d'uns 6 km², las buegas d'os cuals solen a coincidir con accidents topograficos como la lera d'un arrueyo u similar. Os bartos marcan os lemites d'os suyos dominios con orina y pilas de bonya, antimás de tener lo costumbre de fer-se notar a presencia fisica con o suyo grito, contracia d'o relinco d'o somero y lo ronque d'o hipopotamo. A ormino, y si las condicions d'augua y alimento son adecuatas, os mastos mas territorials pueden permaneixer incluso en os suyos territorios por mientres tot l'anyo, sin de chuntar-se con as migracions con as cuals solo marcharían as fembras, que las pueden aguardar que tornarán con o tempero de criar. Os mastos territorialss tamién socializan en as buegas d'os suyos territorios por mano de tot un ligallo de rituals, y ocasionalment con barallas eventuals en as cuals as bestias se pretan os cuellos y mosigan o suyo adversario y se sueltan firmes calces.