Amnesia

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

L' amnesia^[1] ye un deficit en a memoria causau per una malotía cerebral u un danyo cerebral,^[2] pero tamién puede estar causau temporalment per l'emplego de cuantos sedants y drogas hipnoticas. A memoria puede perder-se total u parcialment a resultas d'a magnitut d'o mal causau. I hai dos tipos prencipals d'amnesia: amnesia retrograda y amnesia anterograda. L'amnesia retrograda ye la incapacidat de recuperar información que s'adquirió antis d'una calendata determinada, per un regular a calendata d'un accident u una operación. En cualques casos, a perda de memoria puede extender-se decenios dezaga, mientres que en atros, a persona puede perder nomás uns poquez meses de memoria. L'amnesia anterograda ye la incapacidat de transferir nueva información de l'almagazenamiento a curto plazo a l'almagazenamiento a luengo plazo. As personas con amnesia anterograda no pueden fer memoria de cosetas mientres largos periodos de tiempo. Istos dos tipos no son mutuament excloents; toz dos pueden ocurrir de vez.^[3]

Os estudios de casos tamién amuestran que l'amnesia per un regular s'asocia con mal en o lobulo temporal meyo. Amás, arias especificas de l'hipocampo (a rechión CA1) son embrecadas con a memoria. A investigación tamién ha contrimostrau que cuan se danyan arias d'o diencefalo, puede ocurrir amnesia. estudios recients han contrimostrau una correlación entre la deficiencia d'a proteína RbAp48 y la perda de memoria. Os cientificos podioron trobar que los ratez con memoria danyada tienen un livel mas baixo de proteína RbAp48 en comparanza con os ratez normals y sanos.^[4] En as personas con amnesia, encara se conserva la capacidat de fer memoria d'información immediata,^[5] y ye posible que encara puedan formar nuevas alcordanzas. Manimenos, se puede observar una severa reducción en a capacidat d'aprender material nuevo y recuperar información antiga. As personas pueden aprender nuevas conoixencias procedimentals. Amás, a preparación (tanto perceptiva como conceptual) puede aduyar a los amnesicos a aprender nuevas conoixencias no declarativas. As personas con amnesia tamién retienen habilidaz intelectuals, lingüisticas y socials substancials tot y con as fundas deficiencias en a capacidat de recordar información especifica trobada en episodios d'aprendizache previos.^[6]