Categoría taxonomica

Una categoría taxonomica ye cadagún d'os rans u livels hierarquicos a os que se troba ligau un taxón, seguntes a taxonomía y a cladistica. A biolochía sistematica se basa en un sistema hierarquico de livels inclusivos, en cadagún d'os cual se troba incluidos atros menors, y que a la suya vegada ye incluido en un livel superior.

Os taxons que corresponden con as categorías taxonomicas tienen un nombre cientifico formau por una sola parola que ye en latín, sacando o caso d'a categoría taxonomica "especie", en o que o nombre d'o taxon ye formau de dos parolas latinas. Especie y os suyos subordinaus (subespecie, variedat, etc.) tamién se consideran una categoría taxonomica.

Os regles d'escritura, en Biolochía, dexichen que os nombres de taxon que corresponden con as diferents categorías taxonomicas s'escriban, a demás d'en latín, con a inicial en mayuscula. En o livel d'especie, o nombre cientifico s'ha d'escribir con a inicial d'a primer parola (que coincidirá con o chenero) en mayuscula y con o nombre especifico tot en minuscula. En o caso de que s'escriba a maquina, o nombre d'especie s'escribirá además tot en cursiva.

As principals categorías taxonomicas son:

• Dominio.
• Reino.
• Filo (en animals y plantas) u División en Botanica.
• Clase.
• Orden.
• Familia.
• Chenero.
• Especie.

Anque cadaguna d'ellas puede tener subdivisions y supradivisions que tamién se considera categorías, como o superreino, a subclase, superorden, suborden, subchenero y belatras no tan obvias, como a tribu, que ye una subdivisión d'a familia.

• Taxón.
• Clado.
• Taxonomía.