Établissement public de coopération intercommunale

Établissement public de coopération intercommunale (EPCI, die dytsch öffentligi Aastalt für interkommunaali Zsämmenaarbet) isch dr Ooberbegriff für alli Arte vo Gmäindiverbänd in Frankriich. Es git verschiideni Tüpe vo EPCI, wo sich im Umfang vo iire Kompetänze und in dr Mindestzaal vo de Iiwwooner, wo si verdräte, underschäide. Sit em Joor 2013 muess jeedi franzöösischi Gmäind noch Gsetz zum ene EPCI ghööre.^[1] Sit 2014 wärde d d Rööt vo de Gmäindiverbänd diräkt vom Volk gweelt.^[1]

Die verschiidene Tüpe vo EPCI si im allgemäine Gsetzbuech für Gebietskörperschafte (franzöösisch Code général des collectivités territoriales, CGCT) festgläit. Es git die Arte vo Gmäindiverbänd:^[1]

• Syndicat de communes (sit 1890) mit verschiidene Wariante, drunder em Syndicat intercommunal à vocation multiple (SIVOM)
• Communauté de communes (sit 1992)
• Communauté urbaine (sit 1966)
• Communauté d’agglomération (sit 1999)
• Syndicat d’agglomération nouvelle (sit 1983)
• Métropole (sit 2010, maassgääblig gändert im Joor 2014)
• Établissement public territorial (sit 2016, zur Undergliiderig vo dr Métropole du Grand Paris)

D EPCI si Körperschafte vom öffentlige Rächt. Si si e Form vo Établissements publics und eso anders as d Gmäinde, wo sich in iine zsämmeschliesse, sälber käni äigeständige Gebietskörperschafte (Collectivités territoriales). Im Bsundere si iiri Kompetänze uf die Gebiet begränzt, wo si dur s Gsetz oder dur Abkomme zwüsche de Gmäinde, wo mitmache, übercho häi.^[1]

Wo d Gsetzänderig vom 27. Januar 2014 in Chraft drätte isch, si d EPCI mit ere Stüürkompetänz unde mindestens 400'000 Iiwooner im ene Balligsruum vo mee as 650'000 Iiwooner zu Métropoles worde. Usnaame si d Métropole du Grand Paris und d Métropole d’Aix-Marseille-Provence, wo am 1. Januar 2016 respektiiv am 28. August 2015 bildet worde si.^[1]

 Commons: Gemeindeverbände in Frankreich – Sammlig vo Multimediadateie

Dr Ardikel «Établissement public de coopération intercommunale» uf dr dütsche Wikipedia

1. ↑ ^{1,0 1,1 1,2 1,3 1,4} Quels sont les mécanismes de fonctionnement des EPCI ? In: vie-publique.fr. 19. Januar 2015, abgrüeft am 2. Januar 2016 (franzöösisch).