Rems
| Rems | ||
 D Rems churz vor ihre Mindig in dr Neckar bi Remseck | ||
| Date | ||
|---|---|---|
| Laag | Dytschland, Bade-Wirttebärg | |
| Flusssystem | Neckar→Ryy | |
| Quelle | Quälle bi Essenge 48° 0′ 0″ N, 9° 0′ 0″ O | |
| Quellhöchi | 551 m ü. NN | |
| Mündig | Neckar bi NeckarremsKoordinate: 48° 0′ 0″ N, 9° 0′ 0″ O 48° 0′ 0″ N, 9° 0′ 0″ O | |
| Mündigshöchi | 203 m ü. NN | |
| Höchiunterschiid | 348 m | |
| Lengi | 78 km | |
| Iizugsgebiet | 567 km²
| |
| Abfluss | MQ |
6,98 m³/s |
| Mittelgroossi Stedt | Gmẽẽd, Schorndorf, Woeblenge | |
| Dialäkt: Markgreflerisch (Obfige) |
D Rems isch e Fluss z Bade-Wirttebärg. Si entspringt in ere Hechi vu 551 m NN in dr Nechi vu dr Gmei Essenge bi Oole im Oschtalbkrois am Fueß vu dr Schwebische Alb un mindet no uugfehr 78 km bi Remseck im Landkreis Ludwigsburg uf 203 mm NN as rächte Näbefluss in dr Neckar.
Stedt un Gmeine an dr Rems
[ändere | Quälltäxt bearbeite]- Oschtalbkrois: Essenge, Megglenge, Bebenge, Gmẽẽd, Lorich
- Rems-Murr-Krois: Bliiderhouse, Urbach, Schorndorf, Wẽnderbach, Reemshalde, Waistadt, Woeblenge
- Landkrois Ludwigsburg: Remseck
Lauf vu dr Rems
[ändere | Quälltäxt bearbeite]Vu ihrem Ursprung bi Essenge ab fließt d Rems e churz Stock no Norde un nimmt derno d Richtig no Weschte. Si bildet e breit Dal un wird do begleitet vu dr Bundesstroß 29 un dr Remsbahn. Doderdur isch s Remsdal e wichtigi Verchehrsagse vu Balligsruum Stuegert no Oschtwirttebärg un s weschtlig Bayern. No dr Gmeine Essenge, Megglenge un Bebenge wird d Bsidlig dichter, au Gwärb- un Induschtriiaalage wäre zahlrycher. D Rems chunnt jetz zue dr Große Chreisstadt Gmẽẽd. No Lorich verlosst si dr Oschtalbkrois un wägslet iber in d Rems-Murr-Krois. Hinter Bliiderhouse un Urbach chunnt si zu dr Große Chreisstadt Schorndorf, wu vu rächts dr einzig wichtig Näbefluss yymindet, d Wiislauf, wu vu Norde us em Naturpark Schwäbisch-Fränkischer Wald chunnt. Ab do findet mer an dr Dalhäng Räbe - s Remsdal isch eis vu dr greschte Wyyböugebiet vu Wirttebärg. Am Fluss lige Wẽnderbach, Reemshalde un d Stadt Waistadt, wu us verschiedene Ortschafte bildet woren isch un Sitz vu dr Remstalkellerei isch, dr greschte Gnosseschaft vu dr Remsdäler Räbbure. Näbe Räbe het s au viil Flechine mit Obst, vor allem mit Chriese.
Schließli chunnt d Rems uf Woeblenge, dr Verwaltigssitz vum Rems-Murr-Krois. Ab do ändere sich dr Verlauf un d Gstalt vum Remsdal stark. D Bundesstroß un d Remsbahn gehen graduus wyter no Weschte in Richtig Stuegert, d Rems biegt ab no Nordweschte. Vu dr weiche Keuprerstapfle chunnt si jetz in s herter Muschelchalchbiet, s Dal wird änger. Unterhalb vu Woeblenge-Neustadt fließt si am Stammhuus vu dr Motorsäginefabrik Stihl verbyy un wird vum 45 m hoche un 230 m lange Viadukt vu dr Murrbahn iberquert. Derno goht si mit mächtige Mäander dur s Naturschutzgebiet Unters Remsdal. D Prallhäng sin hite zmeischt bewaldet; zum Deil cha mer aberr no Muurräscht vu friejere Räbbärg säh. Di flachere Gleithäng wäre no landwirtschaftlig gnutzt. Churz noch em Ibertritt in dr Landkrois Ludwigsburg mindet d Rems bi Remseck in dr Neckar.
-
Im Remsdal bi Hegnach
-
D Rems z Remseck
Hochwasserschutz
[ändere | Quälltäxt bearbeite]
Am 21. März 2002 het s im Remsdal e groß Hochwasser gee, bi Schorndorf isch mit eme Pegelstand vu 5,12 m fascht dr sognännt 100-jehrig Wasserstand (5,20 m) erreicht wore[1].
Dr Wasserverband Rems het in dr letchte Johre ne Konzäpt zum Hochwasserschutz entwicklet, wu vor allem dr Böu vu Ruckhaltebeckine umfasst. Doderzue isch in dr Johre 2005 un 2006 e Hochwasserruckhalteruum unterhalb vu Schorndorf un eine oberhalb vu Lorch gschaffe wore. E wytere isch bi Lorich-Waldhouse syt em Summer 2006 im Böu. Är wird uf Cheschte vu 9,6 Millione Euro veraasschlat. S Land Land Bade-Wirttebärg ibernimmt dodervu 6,7 Millione Euro. Kritiker – dodrunter zem Byschpel Bund für Umwelt und Naturschutz Deutschland – halte dergege, ass vor allem d Flechineversigelig dra schuld sej, ass d Hochwasser all meh un all schlimmer wäre. No Schetzige vum Land wird d Sidligsflechi im Remstal bis 2014 um wyteri 14 % zuenimmt.[2]
Weblinks
[ändere | Quälltäxt bearbeite]Commons: Rems – Sammlig vo Multimediadateie
Fueßnote
[ändere | Quälltäxt bearbeite]- ↑ Hochwasser-Vorhersage-Zentrale Baden-Württemberg: Pegelstammdaten. Archiviert vom Original am 29. September 2007; abgruefen am 28. Juli 2009.
- ↑ Gmünder Tagespost vum 7. April 2006