Dominique Strauss-Kahn

Dr Dominique Gaston André Strauss-Kahn [dɔmiˈnik stʀosˈkan] bzw. [dɔmiˈnik ʃtʀosˈkan] (* 25. April 1949 z Neuilly-sur-Seine) isch e franzesischer Bolitiker (Parti socialiste). Z Frankrych nännt mer ihn vilmol nume DSK. Vu 1997 bis 1999 isch er Wirtschafts- un Finanzminischter unter em Premierminischter Lionel Jospin gsi. Vum 1. Novämber 2007 bis zum 18. Mai 2011 isch er dr Gschäftsfierend Direktor vum Internationale Währigsfond (IWF) gsii.

Dr Dominique Strauss-Kahn in eme Vorort vu Paris uf d Wält chuu as Suhn vum Gilbert Strauss-Kahn, eme Rächts- un Styyrberoter us ere aschkenasische Familie, un dr Jacqueline Fellus, ere Journalischti us ere sephardische russisch-tunesische Familie. Sy Großvater vu dr Vatersyte här, dr Gaston Strauss, stammt vu Bíschwiller im Elsass.

D Familie isch anne 1951 uf Agadir, Marokko uusgwanderet, noch em Ärdbidem 1960 aber uf Monaco zoge, wu dr Dominique Strauss-Kahn uf d Primarschuel gangen isch. Speter sin syni Eltere wider uf Paris, wun er uf d Sekundarschuel un s Gymnasium gangen isch.

Är het an dr Wirtschaftshochschuel École des Hautes Études Commerciales un an dr Sciences Po Paris (au bekannt as Institut d’études politiques de Paris) studiert un 1977 in Ökonomi promoviert. Vu 1977 bis 1980 het er e Professur fir Wirtschaft an dr Hochschuel vu Nancy gha, derno isch er ab 1981 an d Universitet vu Nanterre un d Verwaltigshochschuel ENA. Bis 2007 het er Kurs in Mikroökonomi un Makroökonomi an dr Sciences Po Paris gee.

Anne 1971 het er am Zäntrum fir Forschig iber Sparverhalte gforscht un het 1982 e Buech vereffetligt unter em Titel L’épargne et la retraite. Im nämlige Johr het e Stell im Blanigsamt aadrätte un isch dr stellverdrättend Laiter vu däm wore.

1986 isch er zum Abgordnete vu dr Haute-Savoie gwehlt wore, zwai Johr speter isch er fir s Val-d’Oise widergwhlt wore. Im Ramme vu däne Mandat het er dr Vorsitz vum Finanzuusschuss ibernuu.

Unter em Bresidänt François Mitterrand isch er anne 1991 delegierte Minischter fir Induschtri un Ussehandel in dr Regierig vu dr Édith Cresson wore. Au in d Regierig vum Pierre Bérégovoy het er des Amt wider ibernuu, bis er 1993 no dr Wahle zu dr Nationalversammlig as Aawalt ins Juschtizwäse gwächslet isch.

Im däm Johr het er d Laitig vun ere Expertekummission in dr Sozialistische Bartei ibernuu un het glychzytig d Kanzlei DSK Consultants grindet, wu sich uf Lobbyarbet z Brüssel kunzentriert het. No syre Wahl zum Burgermaischter vu Sarcelles 1995 het er d Anne Sinclair ghyrote, wu dertemol Reporteri bim Färnsehsänder TF1 un Moderatori vun eme Bolitspiegel gsii isch.

Wu dr Lionel Jospin 1997 d Regierig ibernuu het, het dää dr Strauss-Kahn zum Minischter fir Wirtschaft, Finanze un Induschtri ernännt. Dodermit isch dr Strauss-Kahn zue aire vu dr Hauptfigure vum Kabinett wore. Di uuszaichnete Ergebnis vu dr franzesische Wirtschaft, vor allem dr Ruckgang vu dr Arbetslosequote, hän syy Stellig au in dr Bartei gfeschtigt.

1999 isch er in e Juschtizskandal verwicklet wore, wu mit syre Detigkait as Aawalt in Verbindig gstande isch, un isch derno as Minischter zruckdrätte. Am Änd isch er vollständig vu däne Vorwirf entlaschtet wore, är het sich derno wider fir s Val-d’Oise erneut zur Wahl gstellt un isch 2002 widergwehlt wore. Am Änd vum Johr 2004 isch er näb em Jack Lang un dr Martine Aubry wider in d Spitz vu dr Sozialistische Bartei ufgstige.

Dr Dominique Strauss-Kahn isch im Novämber 2006 dr Ségolène Royal as Kandidat vu dr franzesische Sozialischte fir d Bresidäntschaftswahl 2007 unterläge, d Royal isch mit iber 60 % vu dr Stimme vu dr Barteimitglider zue dr Bresidäntschaftskandidati gwehlt wore.

Dr 2007 nei gwehlt konservativ Bresidänt Nicolas Sarkozy het dr Strauss-Kahn fir dr Boschte vum Direktor vum Internationale Währigsfond vorgschlaa. Mit dr Unterstitzig vu dr EU un dr Verainigte Staate isch dr Dominique Strauss-Kahn am 28. Septämber 2007 zum Noofolger vu bishärige IWF-Direktor Rodrigo de Rato gwehlt wore. Är het syy Amt zum 1. Novämber 2007 aadrätte.^[1]

Mitti Oktober 2008 isch bekannt wore, ass dr IWF e Untersuechig geg dr Strauss-Kahn yyglaitet het. Extärni Aawält hätte solle briefe, eb dr Direktor vum IWF syy Amt fir e sexuelli Beziehig zuen ere Mitarbeiteri missbruucht heb. No aigene Aagabe het dr Strauss-Kahn mit dr Ermittler zämmegschafft un het d Affäre e „Vorfall, wu sich in mym Privatläbe abgspilt het“ gnännt. Är het dementiert, syy Machtposition missbruucht z haa.^[2] Dr IWF het dr Strauss-Kahn noch ere Untersuechig entlaschtet, het dr Vorfall aber glychzytig beduurlig gnännt.^[3]

Am 14. Mai 2011 isch dr Strauss-Kahn am John F. Kennedy International Airport z New York feschtgnuu wore.^[4] Är isch vu dr New Yorker Staatsaawaltschaft aagchlagt wore wäge versuechter Vergwaltigung, sexueller Beleschtigung un Freihaitsberaubig vun ere Aagstellte vum New Yorker Hotel Sofitel.^[5][6][7] Ass er gege Kaution freigloo wird, het d Haftrichteri wäge Fluchtgfohr abglähnt, dr Strauss-Kahn isch derno uf New Yorker Gfängnisinsle Rikers Island verlait wore. Am 18. Mai 2011 isch er vu sym Amt as gschäftsfierende Direktor vum IWF zruckdrätte.^[8][9] Am 19. Mai 2011 het e New Yorker Griicht entschiide, ass dr Strauss-Kahn gege ne Kaution in Millionehechi zum 20. Mai 2011 gege Uflage freigloo wird. Är stoht unter Huusarräscht un wird rund um d Uhr iberwacht, ihm isch au ne elektronischi Fueßfessle aaglait wore.^[10]

No begrindete Zwyyfel vu dr Staatsaawaltschaft an dr Glaubwirdigkait vum muetmaßlige Opfer isch dr Huusarräscht vum Strauss-Kahn am 1. Juli 2011 dur e New Yorker Richter unter Uflage ufghobe wore.^[11]

Im Augschte 2011 het s muetmaßlig Opfer e Zivilchlag gege dr Strauss-Kahn yyglaitet.^[12]

Am 22. Augschte 2011 het d Staatsaawaltschaft s Gricht bätte, d Chlag geg dr Strauss-Kahn gheiezloo. Des het si mit dr Zwyfel an dr Glaubwirdigkait vum muetmaßlige Opfer begrindet.^[13] Am 23. Augschte het s Gricht entschide, d Aachlag gheiezloo.^[14]

Noch ere Strofaazaig dur d Autori Tristane Banon wäg em Vorwurf vu dr versuechte Vergwaltigung anne 2003 het d Staatsaawaltschaft z Frankrych am 8. Juli 2011 Vorermittlige geg dr Strauss-Kahn yyglaitet.^[15] Dr Strauss-Kahn het d Aaschuldigige zruckgwise un het d Banon wäge Verlyymdig aazaigt.^[16]

• 1986–1988: Abgordnete
• 1988–1991: Abgordnete
• 1989–1990: Mitglid vum Gmairot vu Sarcelles (Val-d’Oise)
• 1990–1995: Mitglid vum Gmairot vu Sarcelles (Val-d’Oise)
• 1991–1992: Delegierte Minischter fir Induschtri un Ussehandel (im Finanzminischterium)
• 1992–1993: Minischter fir Induschtri un Ussehandel
• 1995–2001: Mitglid vum Gmairot vu Sarcelles (Val-d’Oise)
• 1995–1997: Burgermaischter vu Sarcelles (Val-d’Oise)
• 1997: Abgordnete
• 1997–2001: Stellverdrättende Burgermaischter vu Sarcelles (Val-d’Oise)
• 1997–1999: Minischter fir Wirtschaft, Finanze un Induschtri
• 2001–2002: Abgordnete

Aktuelli Mandat:

• Abgordnete fir s Département Val-d’Oise
• Stellverdrättende Burgermaischter vu Sarcelles, Val-d’Oise
• Vorsitzende vu dr Gmai-Agglomeration Val de France (Sarcelles un drei wyteri Kommune)

• Ehredoktortitel vu dr Universitet Friburg i. Ü. (Novämber 2005)

• La flamme et la cendre („Die Flamme und die Asche“), 2002
• Oui! Lettre ouverte aux enfants d’Europe („Ja! Offener Brief an die Kinder Europas“), 2004

 Commons: Dominique Strauss-Kahn – Sammlig vo Multimediadateie

• Dominique Strauss-Kahn in de Internet Movie Database (änglisch)
• IWF: Biografi vum Dominique Strauss-Kahn
• Dominique Strauss-Kahn uf dr Webpräsenz vu dr franzesische Nationalversammlig zur 13. Legislaturperiod (franzesisch)

1. ↑ Neue Zürcher Zeitung: Strauss-Kahn wird neuer Chef des Währungsfonds vum 28. Septämber 2007 (abgruefen am 16. Mai 2011)
2. ↑ Süddeutsche Zeitung: Strauss-Kahn wegen Sex-Affäre in Bedrängnis vum 18. Oktober 2008 (abgruefen am 16. Mai 2011)
3. ↑ Radio France Internationale: Begünstigungsaffäre beim IWF: Dominique Strauss-Kahn entlastet vum 26. Oktober 2008 (abgruefen am 16. Mai 2011)
4. ↑ The New York Times: I.M.F. Chief, Apprehended at Airport, Is Accused of Sexual Attack vum 14. Mai 2011 (abgruefen am 16. Mai 2011)
5. ↑ FAZ: Strauss-Kahn festgenommen (Site cha nüme abgrüeft wärde; Suche im Webarchiv)[1] [2] Vorlage:Toter Link/www.faz.net vum 15. Mai 2011 (abgruefen am 16. Mai 2011)
6. ↑ Die Zeit: IWF-Chef Strauss-Kahn wegen versuchter Vergewaltigung angeklagt vum 15. Mai 2011 (abgruefen am 16. Mai 2011)
7. ↑ Die Welt: Strauss-Kahn wegen Sex-Attacke verhaftet vum 15. Mai 2011 (abgruefen am 16. Mai 2011)
8. ↑ IMF Managing Director Dominique Strauss-Kahn Resigns. Pressemitteilung in: IWF vom 18. Mai 2011
9. ↑ IWF-Chef Strauss-Kahn tritt zurück in: Spiegel Online vum 19. Mai 2011
10. ↑ Strauss-Kahn kommt gegen Kaution frei (Spiegel Online vum 19. Mai 2011)
11. ↑ Ex-IWF-Chef Strauss-Kahn kommt frei, Focus, 1. Juli 2011
12. ↑ Zimmermädchen fordert von Strauss-Kahn Schadensersatz in: Spiegel Online vom 9. August 2011
13. ↑ dpa/ZDF: Fall Strauss-Kahn. ZDF heute.de, 23. August 2011, abgruefen am 23. August 2011: „Jetzt räumt die Staatsanwaltschaft ein, sie sei möglicherweise einer "notorischen Lügnerin" aufgesessen.“  (Site cha nüme abgrüeft wärde; Suche im Webarchiv)[3] [4] Vorlage:Toter Link/www.heute.de
14. ↑ New York: Staatsanwaltschaft zieht Anklage gegen Strauss-Kahn zurück. Archivlink (Memento vom 24. Februar 2012 im Internet Archive) Video in: tagesschau.de vum 23. Augschte 2011
15. ↑ Ermittlungen gegen Strauss-Kahn in Frankreich in: Focus Online vom 8. Juli 2011
16. ↑ Banons Geständnis bei Wein und Kerzenschein in: Tages-Anzeiger vum 11. Juli 2011

Dä Artikel basiert uff ere fräie Übersetzig vum Artikel „Dominique_Strauss-Kahn“ vu de dütsche Wikipedia. E Liste vu de Autore un Versione isch do z finde.