New Age

New Age (engl.: »Nois Zittalter«) isch e (post)moderni spirituelli Entwicklig, wo sich i de zwoot Hälfit vom 20. Joorhundert uusbildet het. Es isch e typischi westlichi Entwicklig, wo ufem Konzept vo Individualität, Gliichhait und Ganzhaitlichkait uufbaut. E gnaui Abgrenzig vom Bigriff isch nume chuum mögli. Hüffig werd New Age mit allne mögliche und unmögliche spirituelle und esoterische Strömige gliichgsetzt. De Bigriff New Age het hütt e negativi Konnotation und werd i de Regle numeno bruucht, um sich vo anderne abzgrenze.

De Bigriff New Age isch i de 1970er Joor mit de Hippiebiwegig im tütschsproochige Ruum bikannt wore, im angelsächsische Ruum aber scho länger bikannt. D New Age-Biwegig isch ab denn Hand i Hand mit de Fridesbiwegig und mit de Grüene Revolutioo ggange und isch drumm eener im linke politische Laager aaztreffe.

New Age loot sich nöd aifach lo definiere. Doch chönd verschidnigi typischi Konzept erfasst were, wo New Age umriisset. New Age isch di ultimativi Misch-Masch-Relegioo und stoot em Christetum schlichtweg diametral gegenöber^[1]. Enttraditionalisierig vo de alte Relegioone, d Privatisierig vo de Spiritualität und e starchi Individualisierig sind zentrali Pünkt. Obwoll ernsthafti New Ager gege en oberflächlichi Konsumhaltig sind, isch e staarchi Vermaartig vo de New Age-Spiritualität z biobachte, bsunders im Biriich vom Buechhandel, im alternative Hailwese und im Wellnessbiriich. New Age isch nöd organisiert und spirituelli und esoterischi Uuslegige wered noch de Regle vom fraie Maart verbraitet.

New Age loot sich guet is moderni, gschäftigi und stressige Alltagslebe loo integriere, wells kai festi Ritual, Termin oder Plätz chennt und onöd uf bistimmti Persone, wiene Priesterschaft oder Guru aagwisen isch. New Age ermöglicht anere as sinnentleerte empfundnige Well e noije Sii oder "Zauber" z gee und inere starch rational uusgrichtete Welt Irrationalismus uuszlebe. Bigründet werd New Age hüffig mit eme persönliche Bidürfnis s Weltliche und s Spirituelli in e wiiteri kosmischi Orrnnig iizbinde.

Di typischte Merchmool vo de New Age-Spiritualität sind:

• Holismus: Ales isch mitenand verbunde und drum bis zomene gwösses Grad vonenand abhängig. Us dem Gidanken use werd au d Gliichait vo allne Mentsche oder Relegione bitoont.
• Evolutionismus: d Mentschhait entwicklet sich as Ganzes, indem sich s Individuum entwicklet. Demit verbunde isch e Mischig vo spirituelle und psychische Entwickligkonzept. D Selbstfindig und d Verbindig mit em Höchere Selbst geltet as wichtigi Ziil. S östliche Konszeot vo de Widergiburt ermöglicht a de ainzelne Seel verschidnigsti Erfaarige z sammle, demit si sich entwickle cha.
• Nois Zittalter: i abseebarer Zuekumpft werd e nois hööchers Zittalter choo, wo mengisch as Wassermaazittalter (Age of Aquarius) bizaichnet werd. Us dem Grund globet d New Ager nöd, as im Dezember 2012 d Welt undergoot, sondern si verchündet villmee, as denn d Mentschhait e groosse Biwusstsiischub öberchunnt.
• Gsellschaftskritik: moderni Ströömige i de Gsellschaft, wie Konsumismus oder aisiitigi Wösseschaftsgloibigkait, wered verurtailt. New Ager interessieret sich för d Wösseschaft, bsunders för d Physik, doch sind si misstrauisch gegenöber de Wösseschaft. Si globet as eri gaistige Konzept, wo hütt villmool bilächlet wered, i Zuekumpfft as s woori Wösse erchennt wered.
• Alternativi Hailmethode bildet e wiite Beriich vom New Age. D Schuelmedizin werd as aisittigi und nödganzhaitlichi Wösseschaft empfunde, wo nume d Chranket und de Körper, nöd aber de ganzi Mentsch dehinter gsiet.
• Mueter Erde: D Eerde werd as e lebige Organismus aagluegt (Gaia-Hypothese) und i dem Zämehang as "Muetter Erde" bizaichnet. Doch werd si nöd as e Göttin uufgfasst, wie im Noihaidetum, sondern mee wien e biwusste Organismus, wo de Mentsch achte und schütze mues. D Natuur und de Umweltschutz sind zentrali Aalige vo New Age.

Obwoll sich hüt numeno wenig Mentsche as New Ager bizaichnet und en Abgrenzig zo anderne noie religiöse Religioone schwirig isch, chönd drai Type vo New Ager underschide were^[2]:

• De voll engagierti New Ager (fully engaged) setzt sich tüüfgründig mit de Spiritualität usenand het de konventionelli Lebesstil uufgee. Die Gruppe macht de chlinnsti Aatail uus. Vili hend eri Spiritualität mit em Bruefslebe verbunde, si schriibet Büecher, gend Seminaar, füeret esoterischi Buechläde, oder alternativi Hailpraxene.
• De "Tailzitt-New Ager" (serious tart-timer) schwankt zwöschet Perioode, won er e me oder weniger oberflächlichs weltlichs Lebe füert und Perioode won er sich ernsthaft tüüffer mit Spiritualität usenander setzt. sin Lebesstiil bliibt aber witterhin konventionell.
• De "Glegehaits New-Ager" (casual part-timers) zaichnet sich dör e oberflächlichi Konsumhaltig uus. Spirituelli und esoterischi Literatur werd ooni tüfferi Reflektion konsumiert, dezue chömed Seminar und spirituelli Happenings wo in erster Lini em egoistische Bidürfnis noch Woolfüele (Wellness) tiened. E Legitimation vo der Haltig werd uusdruckt, dör di holistischi Haltig: "Goots mer guet, goots au a minere Umwelt guet".

Grad de hööchi Aatail vo Persone, wo waalloos Spiritualität oberflächlich konsumieret und ständig mit de noie Ströömige mitschwümet, löst starchi Kritike vo verschidnige Richtige uus. D Tatsach as Esoterikläde, Esoterikmessene und Wellnessagiboot mit Yoga und Meditation, en iiträgliche Esoterikmaart gschaffe hend, füeret zo de Kritik, ass Spiritualität egoistisch vermaterialisiert werd. Debii werd aber hüüffig vergesse, as die ernsthafte Suecher sich selber vo de braite konsumistische Masse abgrenzet und vonere "happy Häppli-Esoterik" redet.

A de New Age-Biwegig werd hüffig vorgworffe, as si vor alem östlichi spirituelli Traditione, wie de Hinduismus oder de Buddhismus plünderet. Z Indie, wo starch mit spirituelle Suecher us em Weste konforntiert werd, isch drum au de Bigriff "temple-shopping" gloiffig.

Hüüffig aber wiitet Kritiker de Bigriff New Age vill zwiit uus und biurtailet d New Age-Biwegig ahand vo Uuswüüchs vo anderne spiritielle Ströömige, wo nöd vill mit New Age z tue hend. So hend de Dave Hunt und de Thomas A. McMohan im Buech The New Spirituality d New Age-Spiritualität mit agebliche Mentschenopfer und em Nationalsozialismus zämebroocht, obwoll Gwaltfraihait (Flower Power)) und Universalismus typischi Erschiinige vo de New Ager sind.

1. ↑ Stephen J. Hunt: Alternative Religions; Burlington 2003. ISBN 0-7546-3409-4.
2. ↑ P. Heelas: The New Age Movement; Oxford 1996

• Stephen J. Hunt: Alternative Religions; Burlington 2003. ISBN 0-7546-3409-4