Middelzentrum

E Middelzentrum bezäichnet in dr Ruumordnig und dr Wirtschaftsgeografii e zentraale Ort uf dr middlere Stuefe noch em Süsteem vo de zentraale Ort, wo dr Geograaf Walter Christaller 1933 entwicklet het und wird as Begriff vor allem z Dütschland brucht. D Bedütig vom ene Ort chunnt weniger vo sinere Gröössi und mee vo sinere Infrastruktur im Vergliich zur nööchere Umgäbig. Mä underschäidet drei Stuefe: Oberzentrum – Middelzentrum – Unterzentrum oder Grundzentrum und in e baar Bundesländer brucht mä no s "Middelzentrum mit Däilfunkzioonen vom ene Oberzentrum".

W Middelzentrum het mindestens 35.000 Iiwooner im Ort sälber und dr diräkte Umgääbig (Verflächtigsberiich). Es het no witeri Kriterie wie äifach es isch, dört aane z choo, mit was es usgstattet isch, wie belastbar dr zentraali Ort isch und ass si Iizugsberiich äidütig zuen em ghöört.

D Middelzentre si Aalaufpünkt für d Versorgig mit Waren, Dienstläistige und Infrastrukturaagebot, wo s in de Underzentre drum ume nid git. Näbe dr Grundversorgig, wo s au in Underzentre git, umfasst s Aagebot vo de Middelzentre dr periodisch Bedarf, bsundrigs:

• witerfüerendi Schuele und Bruefsschuele
• Chrankehüüser
• Fachärzt
• Notar, Rächtsaawält, Stüürberooter
• Kino, kulturelli Aagebot
• Waarehüüser
• Schwümmbeeder.

Waare und Dienstläistige, wo über e allgemäin und periodisch Bedarf uusegöön, cha mä im neggste Oberzentrum überchoo.

Zwüschen em Middel- und em Oberzentrum git s in e baar Bundesländer vo Dütschland no s Middelzentrum mit Däilfunkzioone vom ene Oberzentrum.

Sonigi häi usser de Versorgigsfunkzioone vom Middelzentrum au Funkzioone, wo dr dr spezialisierti, hööcheri Bedarf decke, häi aber nid dr vollständigi Funkzioonsumfang vom ene Oberzentrum. Si verbessere d Versorgig vo dr Bevölkerig und sterke eso dr Ländligi Ruum und möchen en attraktiver. D Lääbens- und Arbetsbedingige si dank iine in alle Däilrüüm vom Land mee gliichwärtig und eso verhindere si, ass Arbetsblätz abbaut wärde.

In de Landesemtwickligsblään oder -Ruumordnigsbrogramm wird festgläit, weli Ort z Dütschland als Middel- und Oberzentre sölle fungiere. Baade-Würtebärg het zum Bischbil 14 Oberzentre und äbbe 90 Middelzentre. Im Durchschnitt in Middelzentre zwüsche 10'000 und 50'000 Iiwooner im Ort sälber, und no mee in Regioone, wo seer dicht besiidlet si. Am mäiste Iiwooner im ne Middelzentrum het Gelsechirche (270'000), was allerdings drvo chunnt, ass d Oberzentre Bochum und Essen ganz nooch si. Im ganze git s in Nordrhii-Westfaale 16 Oberzentre und mee as 190 Middelzentre, mee Middelzentre as Underzentre.

• Landesentwickligsblaan 2002 Bade-Württebärg (PDF-Datei; 8,05 MB)
• Ruumkategorie, Aggse und Zentrali Ort (Ruumstrukturcharte) für Saggse (gif, 0,39 MB)

Dä Artikel basiert uff ere fräie Übersetzig vum Artikel „Mittelzentrum“ vu de dütsche Wikipedia. E Liste vu de Autore un Versione isch do z finde.