Marcellinus (Bischof vu Rom)

Dr hailig Marcellinus († 304) isch noch em Liberische Kadelog am 30. Juni 296 zum Bischof vu Rom gwehl wore. Im Martyrologium hieronymianum, dr Depositio episcoporum oder au dr Depositio martyrum wird er nit gnännt.

Em Marcellinus sy Episkopat het unter em Chaiser Diokletian aagfange, wu aber nonig mit syre Chrischteverfolgig aagfange het. Är het em Chrischtedum Freihaite gee, un d Chilche isch gwachse. Dr Cäsar Galerius het d Haidebewegig gege d Chrischte aagfiert un het dr Diokletian schließli 302 gege s Chrischtedum chenne ufbringe. Zerscht hän chrischtligi Soldate d Armee mieße verloo, speter isch chilchlige Bsitz konfisziert un chrischtligi Biecher sin verbrännt wore. No zwai Fyyr in sym Palascht het dr Diokletian zue hertere Maßnahme griffe: Chrischte hän mieße ihre Glaube widerruefe un si sin zum Dod verurdailt wore.

Dr Liber Pontificalis – wu uf d Schrift Was dr Hailig Marcellinus gmacht het zruggoht, eme hit verlorene Täxt – brichtet, ass in dr Zyt vu dr Verfolgig dur dr Diokletian dr Marcellinus dr Dod as Märtyrer gfunde het. Speter isch e Stryt driber entstande, eb dr Marcellinus nit in Wohret em Glaube abgschwore gha het go sy Lääbe rette. Dää Stryt isch bis in s 6. Johrhundert gfiert wore.

Dr Marcellinus isch dr erscht Bischof vu Rom, wu mer dr Titel papa (Papscht) het chenne noowyse. Sälber het er si aber nit eso gnännt.

Noch em Liber Pontificalis isch dr Marcellinus am 26. April 304 in dr Priscilla-Katakombe vergrabe wore, uf der Via Salaria, 25 Däg no sym Martyrium. Dr Liberisch Kadelog nännt dr 25. Oktober. Noch ere lengere Sedisvakanz isch dr Marcellus I. no ihm chuu, wu mänkmol mit em verwächslet woren isch wäg dr ähnlige Näme.

• Eckhard Reichert: Marcellinus. In: Biographisch-Bibliographisches Kirchenlexikon (BBKL). Band 5, Herzberg 1993, ISBN 3-88309-043-3, Sp. 769.
• Ytrag in d Catholic Encyclopedia, Robert Appleton Company, New York 1913 (änglisch)

 Commons: Marcellinus – Sammlig vo Multimediadateie

• Gsamtwärch vu Migne Patrologia Latina mit Inhaltsverzaichnis

Dä Artikel basiert uff ere fräie Übersetzig vu dere Version vum Artikel „Marcellinus_(Bischof_von_Rom)“ vu de dütsche Wikipedia. E Liste vu de Autore un Versione isch do z finde.