Fanny Oschwald

D Fanny Oschwald, wo am 30. Nofämber anne 1840 z Länzbrg uf d Wält cho und am 24. Augschte 1918 z Basel gstorben isch, isch e Schwiizer Autorin gsi.

Si isch d Dochter vom Johann Rudolf Ringier vo Länzbrg gsi und het dr Vorname Victoria Francisca übercho; me het ere aber gly eifach d Fanny gseit, und bi däm Näme isch si sälber au blibe. Nach dr Schuelzyt z Länzbrg isch d Fanny Ringier uf Stuegert is Katharineschtift wyter go lehre. 1863 het si dr Gschäftsmaa Theodor Oschwald ghürootet.

D Fanny und dr Theodor Oschwald händ zwöi Chind gha, und si händ drno au no d Chind vom Brueder zue sech gnoo, wo früh gstorben isch. S einte isch d Martha Ringier gsi, wo spöter au e Mundartdichtere ggä het.

D Fanny Oschwald het gärn Theater gspilt, und si het sälber au Theaterstück gschribe, wo im Aargau dozmol mit vil Erfolg ufgfüert worde sind. E Deil vo dene Stück und es par Gschichte het si i dr Länzbrger Mundart gschribe.

D Martha Ringier het d Läbensgschicht vo dr Fanny Oschwald, irere zwöite Muetter, zämegfasst für d Nöiusgaab vom Wärch Alti Liebi anne 1942.

• Fest-Spiel zur Bundes-Feier in Lenzburg, 1891
• Lasst hören aus alter Zeit, 1895
• Aller Gattig Lüt, 1897
• Strubi Zyte, 1904
• Alti Liebi, 1919

Maya Widmer: Fanny Oschwald In: Historisches Lexikon vo dr Schwiiz.