Griifesee

 

De Griifesee liit inere Landschaft, won vom Rhy-Linthgletschär gformt worden isch. Im Weschte isch de Pfannestììl, im Oschte fangt s Zürcher Oberland aa. S Wasser vom Griifesee chunnt vor allem us em Aabach. Z Fällande flüsst d Glatt us em See use. Bis im 12. Jahrhundert hät de Griifesee drum au Glattsee gheisse. Früener isch de Griifesee bis uf Dübedorf gange, won er sich anere Ändmoräne gschtaut hät. Dur Verlandig und Melioration isch de See über d Jahrtuusig chlinner worde,^[1] was mer no guet cha gsee a de Moor rund um en ume. Sini hütigi Form hät de Griifesee, sit 1890/91 d Glatt kanalisiert worden isch.

Di erschte Mänsche händ i de Mittälsteizyt, öppe 8000 Jaar vor Chrischtus, am Seeufer gläbt. Am Oscht- und am Nordufer hät mer e paar Pfahlboute gfunde.

Im 12. Jahrhundärt hät mer z Griifesee s Schloss Griifesee pout, won im Alte Zürichrieg e Rolle gspilt hät. Am 24. April 1944 isch en abgschossne B-17-Bomber vo de Amerikaner in See gheit.

S Gebiet um de Griifesee isch sit 1941 under Naturschutz.

Nume s Stedtli Griifesee isch diräkt am Seeufer. Nideruschter, Schwärzebach, Muur und Fällande ligget hinder em Ufergürtel us Riedwise. Au Uschter und Mönchaltorf sind wiiter hine, usserhalb vom füechte Ufersträife.

De Griifesee isch hützutags vor alem es Naaerholigsgebiet. Rund um de See tüent d Lüüt wandere und Velo faare. Rund um de See häts mängi Badaaschtalt zum bade und schwüme. Im Härbscht ränned Sportler am Griifeseelauf um de See ume. Uf em See häts zwar vili Böötli, aber privati Motorboot sind uf em Griifesee verbote. Nume d "Schifffahrtsgsellschaft Griifesee", wo 1890 gründet worden isch, hät Motorschiff für Rundfahrte und d Personefääre vo Muur uf Nideruschter. S git ein Pruefsfischer uf em Griifesee.

Schiff uf em Griifesee

 

 

 

Di ganz Uferzone vom Griifesee staht under Naturschutz. S Gebiet um de Griifesee isch dicht besidlet. Au d Landwirtschaft nutzt d Umgäbig starch. Drum isch de See zimli fescht mit Phosphat belaschtet gsi und d Alge sind vill z starch gwachse. Sit 1970 hät mer das Problem halbwägs im Griff. D EAWAG beobachtet de Griifesee gnau. De Phosphatghalt isch immer no zhöch und im Summer hät de See zwenig Suurstoff. Mer überläit sich drum, öb mer de See im Summer wie de Pfäffikersee sött belüfte.

  Commons: Griifesee – Sammlig vo Multimediadateie

• Griifesee-Stiftig
• Schifffahrtsgesellschaft Griifesee
• Verband zum Schutz vom Griifesee VSG
• ASUG Arbetsgruppe Naturschutz Griifesee
• greifensee.ch - Sehenswürdigkeite
• Wätterstazion am Griifesee
• Diethelm Zimmermann: Griifesee (See). In: Historisches Lexikon vo dr Schwiiz.

1. ↑ Charles Knapp, Maurice Borel, Victor Attinger, Heinrich Brunner, Société neuchâteloise de géographie (Uusegäber): Geographisches Lexikon der Schweiz. Band 2: Emmenholz – Kraialppass. Verlag Gebrüder Attinger, Neuenburg 1904, S. 438  f., Stichwort Greifensee  (Scan vo der Lexikon-Site).
2. ↑ St. Niklausen Schiffgesellschaft Genossenschaft

Schwiizer Seeä Schwiizer Seeä mit ere Flächi vo über 1 km² (ohni d Spiicherseeä): Ägerisee | Baldeggersee | Bielersee | Bodesee | Brienzersee | Gämfersee | Gryfäsee | Hallwilersee | Lac de Joux | Langesee | Lauerzersee | Luganersee | Murtesee | Nöiäburgersee | Oeschinesee | Pfäffikersee | Sarnersee | Sempachersee | Silsersee | Silvaplanersee | Thunersee | Vierwaldstättersee | Walesee | Zugersee | Zürisee